ନୂଆଦିଲ୍ଲୀ: ପରିବେଶ ଓ ଜଙ୍ଗଲ ମନ୍ତ୍ରୀ ପ୍ରକାଶ ଜାଭଡେକର କହିଛନ୍ତି, ଜଳବାୟୁ ପରିବର୍ତ୍ତନ ବିଷୟରେ ଭାରତ ଉନ୍ନତ ଦେଶଗୁଡ଼ିକର ଚାପ ଆଗରେ ମୁଣ୍ଡ ନୁଆଁଇବ ନାହିଁ ଓ ଜଳବାୟୁ ପରିବର୍ତ୍ତନର ସମାଧାନରେ ନିଜର ସ୍ୱାର୍ଥର ସୁରକ୍ଷା କରିବ। ସେ କହିଛନ୍ତି, ମୋଟ୍ ଅଙ୍ଗାରକାମ୍ଳ ଗ୍ୟାସ୍ ନିର୍ଗମନର ଶତକଡ଼ା ୭୦ଭାଗ ଉନ୍ନତ ଦେଶଗୁଡ଼ିକରୁ ହେଉଛି। କିନ୍ତୁ ଭାରତରୁ ମାତ୍ର ଶତକଡ଼ା ୩ଭାଗ ଅଙ୍ଗାରକାମ୍ଳ ଗ୍ୟାସ୍ ନିର୍ଗମନ ହେଉଛି।
ରାଜ୍ୟସଭାରେ ଗୁରୁବାର ଏକ ଧ୍ୟାନ ଆକର୍ଷଣକାରୀ ପ୍ରସ୍ତାବ ବିତର୍କରେ ଉତ୍ତର ଦେଇ ସରକାର ଏ କ୍ଷେତ୍ରରେ ନେଇଥିବା ପଦକ୍ଷେପ ବିଷୟରେ ସେ ଜଣାଇଛନ୍ତି। ସେ କହିଛନ୍ତି, ଭାରତ ନିଜର ମୂଲ୍ୟବୋଧ ଓ ନୀତିକୁ ଭିତ୍ତି କରି ଏହାର ଜୀବନଶୈଳୀ ପ୍ରସ୍ତୁତ କରିଛି ଯାହା ପରିବେଶ ପ୍ରତି କୌଣସି କ୍ଷତି ପହଞ୍ଚାଇବ ନାହିଁ। ଜଳବାୟୁ ପରିବର୍ତ୍ତନର ମୁକାବିଲା ପାଇଁ ସରକାର ନେଇଥିବା ପଦକ୍ଷେପଗୁଡ଼ିକୁ ଅବତାରଣା କରି ଜାଭଡେକର କହିଛନ୍ତି, ଜଳବାୟୁ ପରିବର୍ତ୍ତନ କ୍ରୀୟାନୁଷ୍ଠାନ ଯୋଜନା ୨୯୦କୋଟି ଟଙ୍କାର ବ୍ୟୟ ଅଟକଳରେ ପ୍ରସ୍ତୁତ କରାଯାଇଛି। ଏହା ରାଜ୍ୟ ସରକାରଗୁଡ଼ିକୁ ଜଳବାୟୁ ପରିବର୍ତ୍ତନର ମୁକାବିଲା ପାଇଁ ସେମାନଙ୍କର ପ୍ରତିଷ୍ଠାନ ସ୍ଥାପନରେ ସହାୟତା କରୁଛି।
ମନ୍ତ୍ରୀ କହିଛନ୍ତି, ଦେଶରେ ପୁର୍ନବ୍ୟବହାର କ୍ଷମ ଶକ୍ତିର ବ୍ୟବହାରକୁ ଉତ୍ସାହିତ କରାଯାଉଛି ଓ କମ୍ ଶକ୍ତି ବ୍ୟବହାର, ସ୍ଥାୟୀ ସହର ଓ ପରିବହନ ବ୍ୟବସ୍ଥା କ୍ଷେତ୍ରରେ ପୁଞ୍ଜିନିବେଶ କରାଯାଉଛି। ସେ କହିଛନ୍ତି, ଭାରତ ବର୍ଯ୍ୟବସ୍ତୁ ପରିଚାଳନା ସଂକ୍ରାନ୍ତ ୬ଟି ନିୟମ ପ୍ରଣୟନ କରିଛି ଯାହା ଅଙ୍ଗାକାମ୍ଳ ଗ୍ୟାସ୍ ନିର୍ଗମନକୁ ରୋକିବାରେ ସମ୍ପୂର୍ଣ୍ଣ ସହାୟତା କରୁଛି।
Comments are closed.