ଭାରତ-ଇଂଲଣ୍ଡ ୫ମ ଟେଷ୍ଟମ୍ୟାଚ୍ ଆଜିଠାରୁ
ଏଜ୍ବାଷ୍ଟନ୍: ୧୦ ମାସ ପରେ ଭାରତ ଓ ଇଂଲଣ୍ଡ କ୍ରିକେଟ୍ ଦଳ ଅସମାପ୍ତ ଟେଷ୍ଟ ଶୃଙ୍ଖଳାକୁ ସମାପ୍ତ କରିବାକୁ ଯାଉଛନ୍ତି। ଗତବର୍ଷ ଇଂଲଣ୍ଡରେ ଉଭୟ ଦଳଙ୍କ ମଧ୍ୟରେ ୫ ମ୍ୟାଚ୍ ବିଶିଷ୍ଟ ଟେଷ୍ଟ ଶୃଙ୍ଖଳାର ୪ଟି ମ୍ୟାଚ୍ ପରେ ଖେଳାଳି କରୋନା ସଂକ୍ରମିତ ହେବା ପରେ ଏହା ସ୍ଥଗିତ ରହିଥିଲା। ଭାରତ ସେତେବେଳକୁ ୨-୧ରେ ଆଗୁଆ ଥିଲା। ଶୁକ୍ରବାରଠାରୁ ୫ମ ତଥା ଅନ୍ତିମ ଟେଷ୍ଟମ୍ୟାଚ୍ ଆରମ୍ଭ ହେଉଥିବା ବେଳେ ଏହା ଶୃଙ୍ଖଳା ନିର୍ଣ୍ଣାୟକ ମ୍ୟାଚ୍। ଭାରତ ଜିତିଲେ ୩-୧ରେ ଶୃଙ୍ଖଳା ଜିତିପାରିବ। ଇଂଲଣ୍ଡ ଜିତିଲେ ଶୃଙ୍ଖଳା ଡ୍ର ରହିବ ଏବଂ ଏହା ଡ୍ର ରହିଲେ ୪ର୍ଥ ଥର ଇଂଲଣ୍ଡ ମାଟିରେ ଭାରତ ଟେଷ୍ଟ ଶୃଙ୍ଖଳା ଜିତିବ। ଗତବର୍ଷ ଭାରତ ଟେଷ୍ଟ ଶୃଙ୍ଖଳା ଖେଳିଥିବା ବେଳେ ରବି ଶାସ୍ତ୍ରୀ ମୁଖ୍ୟ ପ୍ରଶିକ୍ଷକ ଓ ବିରାଟ କୋହଲି ଅଧିନାୟକ ଥିଲେ। ହେଲେ ଏଥର ରାହୁଲ ଦ୍ରାବିଡ଼ ମୁଖ୍ୟ ପ୍ରଶିକ୍ଷକ ଓ ରୋହିତ ଶର୍ମା ଅଧିନାୟକ ଅଛନ୍ତି। ଅନ୍ୟପକ୍ଷରେ ଗତ ଶୃଙ୍ଖଳାରେ କ୍ରିସ୍ ସିଲ୍ଭରଉଡ୍ ଇଂଲଣ୍ଡର ପ୍ରଶିକ୍ଷକ ଓ ଜୋ ରୁଟ୍ ଅଧିନାୟକ ଥିବା ବେଳେ ଏଥର ବ୍ରେଣ୍ଡନ୍ ମ୍ୟାକ୍କଲମ୍ ପ୍ରଶିକ୍ଷକ ଓ ବେନ୍ ଷ୍ଟୋକ୍ସ ଅଧିନାୟକ ଅଛନ୍ତି। ୨୦୦୭ ପରେ ଇଂଲଣ୍ଡରେ ଭାରତ ଟେଷ୍ଟ ଶୃଙ୍ଖଳା ଜିତିନାହିଁ।
ନିକଟରେ ଘରୋଇମାଟିରେ ବିଶ୍ବ ଟେଷ୍ଟ ଚମ୍ପିଆନ୍ ନ୍ୟୁଜିଲାଣ୍ଡ ବିପକ୍ଷରେ ଇଂଲଣ୍ଡ ୩-୦ରେ ଟେଷ୍ଟ ଶୃଙ୍ଖଳା ପୋଛିଥିଲା। ହେଲେ ନ୍ୟୁଜିଲାଣ୍ଡଠାରୁ ଭାରତ ଅଧିକ ଶକ୍ତିଶାଳୀ ବୋଲି କ୍ରିକେଟ୍ ବିଶେଷଜ୍ଞ କହୁଛନ୍ତି। ଅନ୍ୟପକ୍ଷରେ ନ୍ୟୁଜିଲାଣ୍ଡ ବିପକ୍ଷରେ ଇଂଲଣ୍ଡ ବ୍ୟାଟ୍ସମ୍ୟାନଙ୍କ ଆକ୍ରମଣାତ୍ମକ ପ୍ରଦର୍ଶନ ଅନେକଙ୍କୁ ଚକିତ କରିଛି। ଏହି ମ୍ୟାଚ୍ ପାଇଁ ଅଧିନାୟକ ଘୋଷିତ ରୋହିତ ଓ ଉପଅଧିନାୟକ କେ.ଏଲ୍. ରାହୁଲ ବାଦ୍ପଡ଼ିବା ଭାରତ ପାଇଁ ଶକ୍କ ଧକ୍କା ହୋଇଛି। ଏଜ୍ବାଷ୍ଟନ୍ରେ ଭାରତ ଆଦୌ ଟେଷ୍ଟମ୍ୟାଚ୍ ଜିତିନାହିଁ। ଗତବର୍ଷ ଅସମାପ୍ତ ଶୃଙ୍ଖଳାର ୪ଟି ଟେଷ୍ଟରେ ରୋହିତ ସର୍ବାଧିକ ୩୬୮ ଓ ରାହୁଲ ୨ୟ ସର୍ବାଧିକ ୩୧୫ ରନ୍ କରିଥିଲେ। ଉଭୟଙ୍କ ଅନୁପସ୍ଥିତିରେ ଦୁଇ ଅଭିଜ୍ଞ ବ୍ୟାଟ୍ସମ୍ୟାନ ବିରାଟ କୋହଲି ଓ ଚେତେଶ୍ବର ପୂଜାରାଙ୍କୁ ବ୍ୟାଟିଂର ଦାୟିତ୍ବ ସମ୍ଭାଳିବାକୁ ପଡ଼ିବ। ଶୁବ୍ମାନ ଗିଲ୍ଙ୍କ ସହ ପୂଜାରା ଇନିଂସ ଓପନ୍ କରିପାରନ୍ତି। ମଧ୍ୟକ୍ରମରେ ଶେୟାସ ଆୟର, ବିରାଟ କୋହଲି, ହନୁମା ବିହାରୀ ଓ ଋଷଭ ପନ୍ତ୍ ଖେଳିବେ। ପେସ୍ ବୋଲର ଭାବେ ଅଧିନାୟକ ଯଶପ୍ରୀତ ବୁମ୍ରା, ମହମ୍ମଦ ସାମି ଓ ମହମ୍ମଦ ସିରାଜ୍ ଖେଳିବା ନିଶ୍ଚିତ ଥିବା ବେଳେ ସ୍ପିନର ଭାବେ ରବୀନ୍ଦ୍ର ଜାଡ଼େଜାଙ୍କ ଖେଳିବେ। ତେବେ ଦଳ ପେସ୍ ବୋଲିଂ ଅଲ୍ରାଉଣ୍ଡର ସାର୍ଦୁଳ ଠାକୁର ନା ସ୍ପିନ୍ ବୋଲିଂ ଅଲ୍ରାଉଣ୍ଡର ରବିଚନ୍ଦ୍ରନ ଅଶ୍ବିନଙ୍କୁ ଖେଳାଉଛି; ତାହା ଦେଖିବାକୁ ବାକିରହିଲା। ଏଣେ ନ୍ୟୁଜିଲାଣ୍ଡ ଶୃଙ୍ଖଳା ପରି ଭାରତ ବିପକ୍ଷ ଟେଷ୍ଟମ୍ୟାଚ୍ରେ ମଧ୍ୟ ଇଂଲଣ୍ଡ ଆକ୍ରମଣାତ୍ମକ ବ୍ୟାଟିଂ ଜାରିରଖିବ ବୋଲି ଅଧିନାୟକ ଷ୍ଟୋକ୍ସ ଓ ମୁଖ୍ୟ ପ୍ରଶିକ୍ଷକ ମ୍ୟାକ୍କଲମ୍ କହି ସାରିଛନ୍ତି। ବଲ୍ ଯଦି ସ୍ବିଙ୍ଗ୍ ହୁଏ; ତେବେ ଭାରତୀୟ ପେସ୍ ବୋଲରଙ୍କ ବିପକ୍ଷରେ ଇଂଲଣ୍ଡର ଏହି ରଣନୀତି ବିଫଳ ହୋଇପାରେ। ଇଂଲଣ୍ଡ ବାତାବରଣ ଓ ପିଚ୍ରୁ ଫାଇଦା ଉଠାଇବାର ଦକ୍ଷତା ୩ ଭାରତୀୟ ପେସ୍ ବୋଲରଙ୍କର ରହିଛି। ତେେବ ବ୍ୟାଟିଂରେ ଭାରତ ସାମାନ୍ୟ ଦୁର୍ବଳ ମନେହେଉଛି। ସେଥିପାଇଁ କୋହଲିଙ୍କଠାରୁ ମ୍ୟାଚ୍ ବିଜୟୀ ଇନିଂସର ଆଶା ରଖିଛନ୍ତି ପ୍ରଶିକ୍ଷକ ଦ୍ରାବିଡ଼। ଇଂଲଣ୍ଡ ମଧ୍ୟକ୍ରମରେ ଜୋ ରୁଟ୍, ଓଲି ପୋପ୍ ଓ ଜନି ବେୟାଷ୍ଟୋ ଚମତ୍କାର ଫର୍ମରେ ଅଛନ୍ତି। ୱିକେଟ ରକ୍ଷକ ସାମ୍ ବିଲିଙ୍ଗ୍ସ ମଧ୍ୟ ଆକ୍ରମଣାତ୍ମକ ବ୍ୟାଟ୍ସମ୍ୟାନ। ପ୍ରଥମ ୪ଟି ଟେଷ୍ଟରୁ ରୁଟ୍ ସର୍ବାଧିକ ୫୬୪ ରନ୍ କରିଥିଲେ। ଦଳର ଏକମାତ୍ର ସ୍ପିନର ଜ୍ୟାକ୍ ଲିଚ୍ ନ୍ୟୁଜିଲାଣ୍ଡ ବିପକ୍ଷ ୩ୟ ଟେଷ୍ଟରେ ୧୦ଟି ୱିକେଟ ନେଇଛନ୍ତି। ଏଜ୍ବାଷ୍ଟନ୍ରେ ପେସ୍ ବୋଲିଂ ଉପଯୋଗୀ ପିଚ୍ ହୋଇଛି। ଇଂଲଣ୍ଡ ଏକାଦଶରେ ଜେମ୍ସ ଆଣ୍ଡରସନ୍, ଷ୍ଟୁଆର୍ଟ ବ୍ରଡ୍, ମାଥ୍ୟୁ ପଟ୍ସ ଓ ବେନ୍ ଷ୍ଟୋକ୍ସଙ୍କ ପରି ଦକ୍ଷ ପେସ୍ ବୋଲର ରହିଛନ୍ତି। ତେଣୁ ଯେଉଁ ଦଳର ବ୍ୟାଟ୍ସମ୍ୟାନ ସଫଳ ହେବେ; ମ୍ୟାଚ୍ର ଫଳାଫଳ ସେହି ଦଳ ସପକ୍ଷରେ ଯିବ ବୋଲି ଅନୁମାନ କରାଯାଉଛି।
Comments are closed.