ଆଜିଠୁ ବଢ଼ିବ ଶୀତ : ୬ ଜିଲାରେ ଘନ କୁହୁଡ଼ି

ଭୁବନେଶ୍ବର : ଆସନ୍ତାକାଲିଠାରୁ ରାଜ୍ୟରେ ବଢ଼ିବ ଶୀତ। ଆଭ୍ୟନ୍ତରୀଣ ଜିଲାଗୁଡ଼ିକରେ ୨୪ ଘଣ୍ଟା ପରେ ପାରଦ ୩ ରୁ ୫ ଡିଗ୍ରୀ ଲେଖାଏଁ ଖସିବ ବୋଲି ଭୁବନେଶ୍ବରସ୍ଥିତ ଆଞ୍ଚଳିକ ପାଣିପାଗ କେନ୍ଦ୍ର ପକ୍ଷରୁ ଆକଳନ କରାଯାଇଛି। ଫୁଲବାଣୀ, ବୌଦ୍ଧ, କୋରାପୁଟରେ ରାତି ତାପମାତ୍ରା ବର୍ତ୍ତମାନ ୧୪ ଡିଗ୍ରୀରୁ କମ୍ ରହୁଥିବାବେଳେ ଆସନ୍ତାକାଲିଠାରୁ ଏହା ଏକକ ସଂଖ୍ୟାରେ ପହଞ୍ଚିବ ବୋଲି ପାଣିପାଗ କେନ୍ଦ୍ର ପକ୍ଷରୁ ଆକଳନ କରାଯାଇଛି। ଉପକୂଳବର୍ତ୍ତୀ ଜିଲାଗୁଡ଼ିକରେ ୨ ଦିନ ପରେ ତାପମାତ୍ର ୨ରୁ ୩ ଡିଗ୍ରୀ ଲେଖାଏଁ ହ୍ରାସ ପାଇବ ବୋଲି କୁହାଯାଇଛି। ସୋମବାର ରାତିରୁ ମଙ୍ଗଳବାର ସକାଳ ୮.୩୦ ପର୍ଯ୍ୟନ୍ତ ନୟାଗଡ଼, ବୌଦ୍ଧ, କନ୍ଧମାଳ, ଖୋର୍ଦ୍ଧା, ଜଗତସିଂହପୁର ଓ କଟକ ପ୍ରଭୃତି ୬ଟି ଜିଲାରେ କେତେକ ସ୍ଥାନରେ ଘନ କୁହୁଡ଼ି ଦେଖିବାକୁ ମିଳିବ। ଏହି ପରିପ୍ରେକ୍ଷୀରେ ଉପରୋକ୍ତ ଜିଲାଗୁଡ଼ିକର ଜିଲାପାଳମାନଙ୍କୁ ସତର୍କ ରହିବାକୁ ପରାମର୍ଶ ଦିଆଯାଇଛି। ବିଶେଷ କରି ଯାନବାହନ ଚଳାଚଳରେ ଅସୁବିଧା ସୃଷ୍ଟି ହେବାର ଆଶଙ୍କା ରହିଛି। ଅନୁଗୋଳ, କେନ୍ଦ୍ରାପଡ଼ା, ଯାଜପୁର, ଭଦ୍ରକ, ପୁରୀ, ମାଲକାନଗିରି ଜିଲାରେ କେତେକ ସ୍ଥାନରେ କୁହୁଡ଼ିର ସମ୍ଭାବନା ରହିଛି। ସୋମବାର ଦାରିଙ୍ଗବାଡ଼ିରେ ସବୁଠୁ ଅଧିକ ଶୀତ ଅନୁଭୂତ ହୋଇଥିଲା। ଏଠାରେ ସର୍ବନିମ୍ନ ତାପମାତ୍ରା ୧୩.୫ ଥିଲା।