ଗୁଜରାଟ ଆଡକୁ ମୁହାଁଇବ ବାତ୍ୟା ‘ତୌକ୍ତେ’

ଦକ୍ଷିଣ-ପୂର୍ବ ଆରବ ସାଗରରେ ସୃଷ୍ଟ ଘୂର୍ଣ୍ଣିବଳୟ ବାତ୍ୟା ରୂପ ନେବ। ଏହାକୁ ‘ତୌକ୍ତେ’ ନାମରେ ନାମକରଣ କରାଯାଇଛି। ଆସନ୍ତା ଶନିବାର ଏହା ସାମୁଦ୍ରିକ ଝଡ଼ର ରୂପ ନେବାକୁ ଥିବାବେଳେ ରବିବାର ସୁଦ୍ଧା ଅତି ଭୟଙ୍କର ସାମୁଦ୍ରିକ ଝଡ଼ରେ ପରିଣତ ହେବ। ଏହି ବାତ୍ୟା ଗୁଜରାଟ ଏବଂ ପାକିସ୍ତାନ ଉପକୂଳ ଆଡକୁ ମୁହାଁଇବାର ସମ୍ଭାବନା ଥିବା ଭାରତୀୟ ପାଣିପାଗ ବିଭାଗ (ଆଇଏମଡି) ପୂର୍ବାନୁମାନ କରିଛି।

ଲକ୍ଷାଦ୍ବୀପ ଉପରେ ସୃଷ୍ଟି ହୋଇଥିବା ଲଘୁଚାପ ଶୁକ୍ରବାର ଘନୀଭୂତ ହୋଇ ଅବପାତରେ ପରିଣତ ହୋଇଛି। ଆଇଏମଡି ବାତ୍ୟାକୁ ନିରୀକ୍ଷଣ କରିବା ସହିତ କେଉଁ ଦିଗରେ ଏହା ଗତି କରିବ ତାହା ଉପରେ ନଜର ରଖିଛି। ବାତ୍ୟା ପ୍ରଭାବରେ ମେ ୧୪ରୁ ୧୭ ତାରିଖ ମଧ୍ୟରେ ଲକ୍ଷାଦ୍ବୀପ, କେରଳ, ତାମିଲନାଡୁ, କର୍ଣ୍ଣାଟକ ଉପକୂଳରେ ପ୍ରବଳ ବର୍ଷା ହେବାର ସମ୍ଭାବନା ରହିଛି। ସେହିପରି ଗୋଆ ଏବଂ ଦକ୍ଷିଣ କୋଙ୍କଣ ଅଞ୍ଚଳରେ ମଧ୍ୟମ ଧରଣର ବର୍ଷା ହେବ ବୋଲି ଆଇଏମଡି ପୂର୍ବାନୁମାନ କରିଛି।

Comments
Loading...