ବ୍ୟୁନସ୍ ଐରିସ୍ : ଆର୍ଜେଣ୍ଟିନା ବିପକ୍ଷ ଏଫ୍ଆଇଏଚ୍ ପ୍ରୋ-ଲିଗ୍ ହକିର ପ୍ରଥମ ମ୍ୟାଚରେ ଭାରତ ବିଜୟ ହାସଲ କରିଛି। ଶନିବାର ବୋନସ୍ ଏରିଜ୍ରେ ଖେଳାଯାଇଥିବା ଲିଗ୍ର ପ୍ରଥମ ମ୍ୟାଚରେ ଭାରତ ସୁଟ୍ଆଉଟ ୩-୨ ଗୋଲରେ ଅଲିମ୍ପିକ୍ସ ଚମ୍ପିଆନ ଆର୍ଜେଣ୍ଟିନାକୁ ପରାସ୍ତ କରିଛି।
ଖେଳର ପ୍ରଥମ କ୍ବାର୍ଟର ଗୋଲଶୂନ୍ୟ ଭାବେ ଶେଷ ହୋଇଥିଲା। ୨୧ ମିନିଟ୍ରେ ଭାରତ ପକ୍ଷରୁ ହରମନପ୍ରୀତ୍ ସିଂହ ଗୋଲ ଦେଇ ଦଳକୁ ୧-୦ରେ ଆଗୁଆ କରିଥିଲେ। ଗୋଟିଏ ଗୋଲ ପଛରେ ରହିବା ପରେ ଆର୍ଜେଣ୍ଟିନା ମ୍ୟାଚକୁ ଦୃଢ଼ତାର ସହିତ ପ୍ରତ୍ୟାବର୍ତ୍ତନ କରିଥିଲା। ୨ ୮ ମିନିଟ୍ରେ ଆର୍ଜେଣ୍ଟିନା ପକ୍ଷରୁ ମାର୍ଟିନ ଫେରାରିଓ ଗୋଲ ଦେଲ ମ୍ୟାଚକୁ ୧-୧ ବରାବର ସ୍ଥିତିକୁ ଆଣିଥିଲେ। ୩୦ ମିନିଟରେ ମାର୍ଟିନ ୨ୟ ଗୋଲ ସ୍କୋର କରିଥିଲେ। ପ୍ରଥମାର୍ଦ୍ଧରେ ଆର୍ଜେଣ୍ଟିନା ୨-୧ ଗୋଲରେ ଆଗୁଆ ରହିଥିଲା। ୩ୟ କ୍ବାର୍ଟରରେ ଉଭୟ ଦଳ କେହି କାହାରିକୁ ଗୋଲ ଦେଇ ପାରିନଥିଲେ। ଅନ୍ତିମ କ୍ବାର୍ଟର ତଥା ଖେଳର ଶେଷ ମିନିଟ୍ରେ ଭାରତ ପକ୍ଷରୁ ହରମନପ୍ରୀତ୍ ବ୍ୟକ୍ତିଗତ ତଥା ଦଳ ପାଇଁ ୨ୟ ଗୋଲ ଦେଇ ମ୍ୟାଚକୁ ୨-୨ ବରାବର କରିଥିଲେ। ନିର୍ଦ୍ଧାରିତ ସମୟରେ ମ୍ୟାଚ୍ ନ ସରିବାରୁ ଟାଇବ୍ରେକର ପେନାଲ୍ଟି ସୁଟ୍ଆଉଟ୍ ହୋଇଥିଲା। ଏଥିରେ ଭାରତ ୩-୨ରେ ବିଜୟୀ ହୋଇଥିଲା। ଭାରତ ପକ୍ଷରୁ ଗୋଲ୍ରକ୍ଷକ ପି.ଆର୍. ଶ୍ରୀଜେଶ ଚମତ୍କାର ପ୍ରଦର୍ଶନ କରି ଗୋଲ ବଞ୍ଚାଇବାରେ ସକ୍ଷମ ହୋଇଥିଲେ। ଶ୍ରୀଜେଶ ଆର୍ଜେଣ୍ଟିନା ଖେଳାଳି ଲ୍ୟୁକାସ ଭିଲା, ମାର୍ଟିନ ଫେରାରିଓ ଓ ଇଗ୍ନାସିଆ ଅଟ୍ରିଜ୍୍ଙ୍କ ସଟ୍କୁ ରୋକିବାରେ ସକ୍ଷମ ହୋଇଥିଲେ। ଆର୍ଜେଣ୍ଟିନାର ଅଭିଜ୍ଞ ଗୋଲ୍ରକ୍ଷକ ୟୁଆନ ଭିଭାଲ୍ଡିଙ୍କୁ ପରାସ୍ତକରି ଦିଲପ୍ରୀତ୍ ସିଂହ ଶେଷ ସୁଟ୍ଆଉଟ୍ ଗୋଲ ଦେବାରେ ସକ୍ଷମ ହୋଇଥିଲେ। ହରମନପ୍ରୀତ୍ ସିଂହ ପ୍ଲେୟର ଅଫ ଦି ମ୍ୟାଚ୍ ହୋଇଥିଲେ। ଭାରତ ୭ଟି ମ୍ୟାଚରୁ ୧୨ ପଏଣ୍ଟ ପାଇ ୫ମ ଓ ଆର୍ଜେଣ୍ଟିନା ୧୧ ପଏଣ୍ଟ ସହ ୬ଷ୍ଠ ସ୍ଥାନରେ ରହିଛନ୍ତି। ଉଭୟ ଦଳ ମଧ୍ୟରେ ୨ୟ ମ୍ୟାଚ ରବିବାର ରାତିରେ ଖେଳାଯିବ।
Comments are closed.