ଆଠଗଡ଼: ବାର୍ଷିକ କାରବାର ୨୦ କୋଟି ଟଙ୍କାରୁ ଊର୍ଦ୍ଧ୍ବ। କିନ୍ତୁ ରାଜ୍ୟ ସରକାରଙ୍କ ଜିଏସଟି ଟିକସ ଠିକ୍ ଭାବରେ ଭରଣା ହେଉ ନଥିଲା। ଜିଏସଟି ପୋର୍ଟାଲରୁ ଏଭଳି ଅନିୟମିତତା ଧରାପଡ଼ିବା ପରେ ମଙ୍ଗଳବାର ବାଣୀକଣ୍ଠନଗର ଅଞ୍ଚଳର ଅମ୍ଵର ଏମ୍ପୋରିଅମ ଉପରେ ବିଭାଗ ପକ୍ଷରୁ ଚଢାଉ କରାଯାଇ ବହୁ ଅନିୟମିତତା ଥିବା ଜଣାପଡିଛି। କଟକ ଜିଲ୍ଲା ଜିଏସଟି ଅଧିକାରୀ ବିରଞ୍ଚି ମହାନନ୍ଦିଆଙ୍କ ନେତୃତ୍ବରେ ଏକ ୧୮ ଜଣିଆ ଦଳ ଏହି ଚଢାଉ କରିଥିଲେ। ଅମ୍ଵର ଏମ୍ପୋରିଅମ, ଅମ୍ଵର ଡ୍ରେସେସ ଏବଂ ନୀଳକଣ୍ଠ ଟେକ୍ସଟାଇଲ୍ସ ଭଳି ତିନୋଟି ଫାର୍ମରେ ଏହି ଚଢାଉ କରାଯାଇ ବହୁ ପରିମାଣର ଟିକସ ଫାଙ୍କିର ନମୁନା ସଂଗ୍ରହ କରିଛି ଚଢାଉ କରିଥିବା ସ୍ଵତନ୍ତ୍ର ସ୍କ୍ୱାର୍ଡ। ଜିଏସଟି ପୋର୍ଟାଲ ସହିତ ଅଧିକାରୀ ମାନେ ତିନୋଟି ଯାକ ଫାର୍ମ ରେ ସମସ୍ତ ଜିନିଷର ଗଣତି ସହିତ ବିକ୍ରି ଖରିଦର ସମସ୍ତ ଦସ୍ତାବିଜ ଏବଂ କମ୍ପ୍ୟୁଟରରେ ଥିବା ସମସ୍ତ ଡାଟା ମିଳାଇ ଜବତ କରି ସଂପୃକ୍ତ ମାଲିକଙ୍କୁ ନୋଟିସ ଜାରି କରିଛନ୍ତି। ଆସନ୍ତା ଦୁଇ ଦିନ ମଧ୍ୟରେ ସଂପୃକ୍ତ ଦୋକାନୀ ତାଙ୍କର ପକ୍ଷ ରଖିବେ। ସମସ୍ତ କାଗଜପତ୍ର ଏବଂ ଡାଟା ଯାଞ୍ଚ କଲା ପରେ ଯେତିକି ପରିମାଣର ଟିକସ ଅନିୟମିତତା ଆଶା କରା ଯାଉଥିଲା ତା ଠାରୁ ଢେର ଅଧିକ ଅନିୟମିତତା ହୋଇଥିବା କୁହାଯାଇଛି। ଏହି ଚଢାଉ ରେ ଅତିରିକ୍ତ ଜିଲ୍ଲା ଜିଏସଟି ଅଧିକାରୀ ସୁଶାନ୍ତ କୁମାର ନନ୍ଦ, ବଳରାମ ବିଶ୍ବାଳ ଏବଂ ଅନ୍ୟ ଅଧିକାରୀ ସାମିଲ ହୋଇଥିଲେ।
Comments are closed.