କୌଣସି ବୟସରେ କେଶ ଝଡିବା ଏକ ସାଧାରଣ କଥା। ଏଥିପାଇଁ କେଶର ବିଶେଷ ଯତ୍ନ ନେବା ଆବଶ୍ୟକ ହୋଇଥାଏ। ସଠିକ୍ ସମୟରେ ସଫା କରିବା ଏବଂ ତେଲ ମାଲିସ୍ କରିବା କେଶର ସ୍ୱାସ୍ଥ୍ୟ ପାଇଁ ଜରୁରୀ। ତେବେ ଏହା ସହିତ କଣ୍ଡିସନିଂ କରିବା କେଶକୁ ମଜବୁତ କରିଥାଏ।
ପ୍ରାୟତଃ କେଶ ସଫା ବା ଶାମ୍ପୋ କରିବା ପରେ ଅନେକ ୨-୩ମିନିଟ ଯାଏ କଣ୍ଡିସନର ଲଗାଇ ରଖିଦିଅନ୍ତି ଏବଂ ପରେ ପୁଣି ଧୋଇ ଦେଇଥାନ୍ତି। କେଶ ପାଇଁ ଯେକୌଣସି କଣ୍ଡିସନର ଉପକାରୀ ହୋଇପାରେ ନାହିଁ। ତେଲିଆ, ରୁକ୍ଷ, ରେଶମୀ ଆଦି ପ୍ରକାର କେଶ ପାଇଁ ଭିନ୍ନ ଭିନ୍ନ କଣ୍ଡିସନର ବଜାରରେ ଉପଲବ୍ଧ।
କେଶର କଳାପଣ ଏବଂ ଚମକ ବଢାଇବା ଲାଗି କେବଳ ଶାମ୍ପୋ ବା କଣ୍ଡିସନିଂ ଆବଶ୍ୟକ ହୋଇନଥାଏ। ଏଥିପାଇଁ ନିୟମିତ ତେଲ ମାଲିସ୍ କରିବା ଜରୁରୀ। ଏହାଦ୍ୱାରା କେଶମୂଳକୁ ପୋଷକ ତତ୍ତ୍ୱ ମିଳେ। ଫଳରେ କେଶର ଘନତ୍ୱ ବଢେ। ତେଣୁ କେଶ ଧୋଇବାର ୧-୨ଘଣ୍ଟା ପୂର୍ବରୁ ଏହାର ମୂଳରେ ସୋରିଷ କିମ୍ବା ନଡିଆ ତେଲ ମାଲିସ କରିବାକୁ ଚେଷ୍ଟା କରନ୍ତୁ। ଏହାପରେ ଶାମ୍ପୋ କରି କଣ୍ଡିସନର ଲଗାନ୍ତୁ। ମାସକୁ ୨ଥର କଣ୍ଡିସନର ବ୍ୟବହାର କରିବା କେଶ ପାଇଁ ଯଥେଷ୍ଟ।
ଶୁଦ୍ଧ ନଡ଼ିଆ ତେଲ, ଅଲିଭ ଓ ବାଦାମ ତେଲ କେଶ ନିମନ୍ତେ ଖୁବ୍ ଉତ୍ତମ। ସପ୍ତାହରେ ୨ ରୁ ୩ଥର ଏହି ତେଲର ମିଶ୍ରଣକୁ କେଶମୂଳରେ ଲଗାଇଲେ କେଶ ଝଡ଼ା ବନ୍ଦ ହୋଇଥାଏ।
ଓଦା କେଶ ନ ଶୁଖିବା ପର୍ୟ୍ୟନ୍ତ କେଶରେ ତଉଲିଆ ଘୋଡ଼ାଇ ରଖନ୍ତୁ। ଏହା ମଧ୍ୟ କେଶ ଝଡ଼ାରୁ ରକ୍ଷା କରେ।
କେଶର ଘନତ୍ବ ବଢ଼ାଇବା ପାଇଁ ଅଣ୍ଡା ସପ୍ତାହକୁ ୨ ଥର ଲଗାଇବା ଉପକାରୀ।
ଅଲିଭ ତେଲ ଓ ଚନ୍ଦନ ତେଲର ମିଶ୍ରଣ ମଧ୍ୟ କେଶ ପାଇଁ ମହୌଷଧି ପରି କାମ କରିଥାଏ।
ଆଣ୍ଟି-ଅକ୍ସିଡାଣ୍ଟ ଓ ସଲଫର୍ ଭରପୂର ପିଆଜ ରସ ମଧ୍ୟ କେଶକୁ ଆବଶ୍ୟକ ପରିମାଣରେ ପୋଷକତତ୍ତ୍ବ ଯୋଗାଇଥାଏ। ପିଆଜ ରସରେ ନଡ଼ିଆ ତେଲ ମିଶାଇ କେଶରେ ଲଗାଇ ୨୦ ମିନିଟ୍ ପରେ ଧୋଇନେବେ। କେଶ ଅଧିକ ଝଡ଼ୁଥିଲେ ପିଆଜ ରସ ୧ ସପ୍ତାହ ଲଗାଇଲେ ଫରକ୍ ଜାଣିପାରିବେ।
କେଶ ଝଡିବା ସମସ୍ୟାରୁ ମୁକ୍ତି ପାଇଁ ଡାଲଚିନି, ତରଭୁଜ, ଅଙ୍ଗୁର ଆଦି ସେବନ କରିବା ଉଚିତ୍ । ଏହା ଦ୍ବାରା ଶରୀରକୁ ଅତ୍ୟାବଶ୍ୟକ ପୌଷ୍ଟିକ ତତ୍ତ୍ବ ମିଳିଥାଏ । ଯାହା କେଶକୁ ସୁସ୍ଥ ରଖିଥାଏ ।
Comments are closed.