ବନ୍ଧୁକ କିଣାବିକା ବେଳେ ୨ ବନ୍ଧୁକ ବେପାରୀ ସମେତ ୭ ଗିରଫ

କଟକ ଚାଉଳିଆଗଞ୍ଜ ଥାନା ପୁଲିସ ଆଜି ୨ ଜଣ ବନ୍ଧୁକ ବେପାରୀଙ୍କ ସମେତ ୭ ଜଣଙ୍କୁ ଗିରଫ କରିଛି। ସେମାନଙ୍କ ନିକଟରୁ ୭ଟି ବନ୍ଧୁକ ଓ ୬୫ ରାଉଣ୍ଡ ଗୁଳି, ଏକ କାର୍‍, ଗୋଟିଏ ବାଇକ୍‍, ଏକ ହିରୋ ଆକ୍ଟିଭା ଗାଡି ଓ ୬ଟି ମୋବାଇଲ୍‍ ଜବତ କରିଛି ପୁଲିସ। ଏ ନେଇ ପୁଲିସ କମିଶନର ସୌମେନ୍ଦ୍ର ପ୍ରିୟଦର୍ଶି କହିଛନ୍ତି ଯେ, ଚାଉଳିଆଗଞ୍ଜ ଥାନା ଅନ୍ତର୍ଗତ କାଳିଆବୋଦା ମଠ ପାଖ ଗୁରୁକ୍ଷେତ୍ର ପଡ଼ିଆ ନିକଟରେ ବନ୍ଧୁକ କିଣାବିକା ନେଇ ଡିଲ୍‍ ଚାଲିଥିବା ବେଳେ କୌଣସି ସୂତ୍ରରୁ ଖବର ପାଇ ପୁଲିସର ଏକ ସ୍ୱତନ୍ତ୍ର ଟିମ୍‍ ସେଠାରେ ଚଢ଼ଉ କରିଥିଲା। ଘଟଣାରେ ବନ୍ଧୁକ ବେପାରୀ କେନ୍ଦ୍ରାପଡ଼ାର ଦୁର୍ଦ୍ଦାନ୍ତ ଅପରାଧୀ ବିଜୟ ନାୟକ ଏବଂ ବିଜୟର ଅନ୍ୟତମ ସହଯୋଗୀ ଜଗା ଦାଶକୁ ପୁଲିସ ଗିରଫ କରିଛି। ମାମଲାରେ ଅନ୍ୟ ୫ ଜଣଙ୍କୁ ମଧ୍ୟ ପୁଲିସ ଗିରଫ କରିଛି।

ସୂଚନା ଅନୁଯାୟୀ, ବିଜୟ ଟିଟୋ ଗ୍ୟାଙ୍ଗର ସଦସ୍ୟ ଏବଂ ଗ୍ୟାଙ୍ଗଷ୍ଟାର୍‍ ସୁଲେମାନ ହତ୍ୟାକାଣ୍ଡର ଅନ୍ୟତମ ଅଭିଯୁକ୍ତ ଥିଲା। ସେ ନିକଟରେ କୋର୍ଟରୁ ଜାମିନ୍‍ ପାଇବା ସହ ଜେଲରୁ ମୁକୁଳିଛି। ବନ୍ଧୁକ କାରବାର ନେଇ ବିହାରର ମୁଙ୍ଗେର ସହ ଏମାନଙ୍କ ଲିଙ୍କ୍‍ ଥିବା ପୁଲିସ କହିଛି।

Comments
Loading...