ଭୁବନେଶ୍ବର : କରୋନା ଭାଇରସର ଭୟାବହତା ଦୃଷ୍ଟିରେ ରଖି ଚଳିତ ବର୍ଷ ହୋଲି ଖେଳିବେନି ରାଜ୍ୟପାଳ ପ୍ରଫେସର ଗଣେଶୀ ଲାଲ । ରାଜ୍ୟପାଳ ହୋଲି ଖେଳିବେନି କି କୌଣସି ହୋଲି ମିଳନ କାର୍ଯ୍ୟକ୍ରମରେ ମଧ୍ୟ ଯୋଗଦେବେନି ବୋଲି ଜଣାପଡିଛି। ସାରା ଦେଶରେ କୋରୋନାକୁ ନେଇ ଦେଖାଯାଇଥିବା ଭୟାବହତାକୁ ଦୃଷ୍ଟିରେ ରଖି ରାଜ୍ୟପାଳ ଏଭଳି ନିଷ୍ପତ୍ତି ନେଇଛନ୍ତି। ତାଙ୍କ ପୂର୍ବରୁ ରାଷ୍ଟ୍ରପତି ରାମନାଥ କୋବିନ୍ଦ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ, କେନ୍ଦ୍ର ଗୃହମନ୍ତ୍ରୀ ଅମିତ ଶାହ ପ୍ରମୁଖ ହୋଲି ଖେଳିବେନି ବୋଲି ଘୋଷଣା କରିସାରିଛନ୍ତି।
ଏଥିସହିତ ବିଜେପି ରାଷ୍ଟ୍ରୀୟ ସଭାପତି ଜେପି ନଡ୍ଡା ମଧ୍ୟ ସମସ୍ତ ରାଜ୍ୟ ସଭାପତିଙ୍କୁ ଏକାଠି ହୋଇ ହୋଲି ଖେଳିବାରୁ ବାରଣ କରିଛନ୍ତି। ହୋଲି ଦ୍ୱାରା ସମସ୍ତେ ଗୋଟିଏ ସ୍ଥାନରେ ଏକାଠି ହେବା ଫଳରେ କୋରୋନା ଭାଇରସ ବ୍ୟାପିବାର ସମ୍ଭାବନା ଥିବାରୁ ଏପରି ନିଷ୍ପତ୍ତି ନିଆଯାଇଛି। କରୋନା ସତର୍କତା ଓ ଜନସଚେତନତା ସୃଷ୍ଟି ପାଇଁ ରାଜ୍ୟପାଳ ପରାମର୍ଶ ଦେଇଛନ୍ତି ।
ସାରା ବିଶ୍ୱରେ କରୋନା ଭାଇରାସ ସ୍ଥିତି ଅଣାୟତ୍ତ ହେବାରେ ଲାଗିଛି । ଏନେଇ ଚାରିଆଡ଼େ ଲୋକେ ଭୟଭୀତ ଅବସ୍ଥାରେ ରହିଛନ୍ତି । କରୋନାରେ ବର୍ତ୍ତମାନ ବିଶ୍ବରେ ୩ ହଜାର ୨୦୦ରୁ ଅଧିକ ଲୋକଙ୍କ ମୃତ୍ୟୁ ହୋଇସାରିଥିବା ବେଳେ ୧ଲକ୍ଷରୁ ଅଧିକ ସଂକ୍ରମିତ ଥିବା ଜଣାପଡିଛି। ସେହିପରି ଭାରତରେ ମଧ୍ୟ ୩୧ଜଣ କରୋନାରେ ଆକ୍ରାନ୍ତ ଥିବା ଜଣାପଡିଛି।
Comments are closed.