ଜି.ଉଦୟଗିରିରେ ୮୬ତମ ଉତ୍କଳ ଦିବସ ପାଳିତ

ଜି.ଉଦୟଗିରି : ଜି.ଉଦୟଗିରି ସ୍ଥିତ ଉପଖଣ୍ଡ ସୂଚନା ଓ ଲୋକସମ୍ପର୍କ ବିଭାଗ ଆନୁକୁଲ୍ୟରେ ଆୟୋଜିତ ୮୬ତମ ଉତ୍କଳ ଦିବସ ସ୍ଥାନୀୟ ଅତିରିକ୍ତ ଉପ-ଜିଲ୍ଲାପାଳ କାର୍ଯ୍ୟାଳୟ ପରିସରରେ ବରିଷ୍ଠ ସାମ୍ବାଦିକ ଶିଶିର କୁମାର ପଟ୍ଟନାୟକଙ୍କ ସଭାପତିତ୍ବରେ ଅନୁଷ୍ଠିତ ହୋଇଯାଇଛି। ଆୟୋଜିତ କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ସ୍ଥାନୀୟ ଗୋଷ୍ଠି ଉନ୍ନୟନ ଅଧିକାରୀ ତଥା ଭାରପ୍ରାପ୍ତ ଅତିରିକ୍ତ ଉପ-ଜିଲ୍ଲାପାଳ ବିଜୟ କୁମାର ପ୍ରଧାନ ଯୋଗ ଦେଇ ଦୀପ ପ୍ରଜ୍ଜ୍ବଳନ କରିଥିବା ବେଳେ ମୁଖ୍ୟ ବକ୍ତା ଭାବେ ସ୍ଥାନୀୟ କଳିଙ୍ଗ ମହାବିଦ୍ୟାଳୟର ଓଡିଆ ଅଧ୍ୟାପକ ଡଃ.ନଳିନୀ କୁମାର ପାଣିଗ୍ରାହୀ ଯୋଗ ଦେଇଥିଲେ। କାର୍ଯ୍ୟକ୍ରମ ପୂର୍ବରୁ ସହରର ବନ୍ଧ ଛକରେ ଥିବା ବିପ୍ଳବୀ ବୀର ଚକରା ବିଷୋୟୀ ଓ ଗାନ୍ଧୀ ଛକରେ ଥିବା ମହାତ୍ମା୍ ଗାନ୍ଧୀଙ୍କ ପ୍ରତିମୂର୍ତ୍ତିରେ ଅତିଥି ମାନଙ୍କ ଦ୍ବାରା ପୁଷ୍ପମାଲ୍ୟ ଅର୍ପଣ କରାଯାଇଥିଲା। ଉତ୍କଳ ପ୍ରଦେଶ ଗଠନରେ ଭାଗ ନେଇଥିବା ବୀର ପୁରୁଷ ମାନଙ୍କୁ ମନେ ପକାଇ ସେମାନଙ୍କ ବଳିଷ୍ଠ ଉଦ୍ୟମରେ ଗଠିତ ଉତ୍କଳ ପ୍ରଦେଶ ଯାହାକି ଆଜିର ଓଡିଶା ରାଜ୍ୟକୁ ଏକତ୍ରିତ ଭାବେ ମଜବୁତ କରିବା ସହ ଆମ ଭାଷା ଓଡିଆକୁ ଉପଯୁକ୍ତ ମର୍ଯ୍ୟାଦା ମିଳିଲେ ଆମେ ନିଜକୁ ଗର୍ବିତ ମନେ କରିବା ବୋଲି ଅତିଥି ମାନେ ନିଜ ନିଜ ବକ୍ତବ୍ୟରେ ପ୍ରକାଶ କରିବା ସହ ଉତ୍କଳ ପ୍ରଦେଶ ଗଠନରେ ବଳିଦାନ ଦେଇଥିବା ମହାପୁରୁଷ ମାନଙ୍କ ପ୍ରତି ଏହା ଉପଯୁକ୍ତ ସମ୍ମାନ ବୋଲି ମଧ୍ୟ ମତବ୍ୟକ୍ତ କରିଥିଲେ। ଆୟୋଜିତ କାର୍ଯ୍ୟକ୍ରମରେ ସାମରିକ କର୍ମଚାରୀ ଭୀମସେନ ପ୍ରଧାନ, ଆଦିବାସୀ ନେତା ଉଦେଶନ ପ୍ରଧାନ, ସୁରେନ୍ଦ୍ର ପ୍ରଧାନ ସମାଜସେବୀ ଇ.ହରିଶଙ୍କର ରାଉତ ଓ ପ୍ରଦୀପ କୁମାର ଦାସ, ସାମ୍ବାଦିକ ବନ୍ଧୁଙ୍କ ସହ ସହରର ବହୁ ମାନ୍ୟଗଣ୍ୟ ବ୍ୟକ୍ତି ଉପସ୍ଥିତ ଥିଲେ। ସ୍ଥାନୀୟ ଉପଖଣ୍ଡ ସୂଚନା ଓ ଲୋକସମ୍ପର୍କ ବିଭାଗର ଭାରପ୍ରାପ୍ତ ଅଧିକାରୀ ସୁଦର୍ଶନ ବେହେରା କାର୍ଯ୍ୟକ୍ରମକୁ ପରିଚାଳନା କରିଥିବା ବେଳେ ବିଭାଗୀୟ କର୍ମଚାରୀ ଜ୍ଞାନରଞ୍ଜନ କର ସମ୍ପୂର୍ଣ୍ଣ ସହଯୋଗ କରିଥିଲେ।

Comments
Loading...