ଉତ୍କଳ ସଂସ୍କୃତି ବିଶ୍ୱବିଦ୍ୟାଳୟ ପ୍ରତିଷ୍ଠା ଦିବସ ଆଜି : ହେବ ନିରାଡ଼ମ୍ବର, ଯୋଗଦେବେନି ଛାତ୍ରଛାତ୍ରୀ

ଭୁବନେଶ୍ୱର : ଉତ୍କଳ ସଂସ୍କୃତି ବିଶ୍ୱବିଦ୍ୟାଳୟର ୨୨ତମ ପ୍ରତିଷ୍ଠା ଦିବସ ଆସନ୍ତାକାଲି (ସୋମବାର) ପାଳନ କରାଯିବ। କୋଭିଡ କଟକଣାରୁ ଦୃଷ୍ଟିରେ ରଖି ସମସ୍ତ ନିୟମ ଅନୁସାରେ ପାଳନ କରାଯିବାକୁ ସ୍ଥିର ହୋଇଛି। ବିଶ୍ୱବିଦ୍ୟାଳୟ ଛୁଟି ଥିବାରୁ ଛାତ୍ରଛାତ୍ରୀ କାର୍ଯ୍ୟକ୍ରମରେ ଯୋଗଦେବେନାହିଁ। ସୀମିତ ଲୋକଙ୍କ ମଧ୍ୟରେ ନିରାଡମ୍ବରରେ ଉତ୍ସବ ପାଳନ କରାଯିବ ବୋଲି ବିଶ୍ୱବିଦ୍ୟାଳୟ କର୍ତ୍ତୃପକ୍ଷ ନିଷ୍ପତ୍ତି ନେଇଛନ୍ତି। ଉତ୍ସବରେ ମୁଖ୍ୟ ଅତିଥିଭାବେ ପର୍ଯ୍ୟଟନ ଏବଂ ଓଡିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗ ମନ୍ତ୍ରୀ ଜ୍ୟୋତିପ୍ରକାଶ ପାଣିଗ୍ରାହୀଙ୍କ ସମେତ ଅନ୍ୟମାନେ ଯୋଗଦେବେ। ଏହି ଅବସରରେ ଛାତ୍ରଛାତ୍ରୀଙ୍କ ଏକ ‘ଆର୍ଟ କ୍ୟାଟଲଗ୍‌’ ଏବଂ ‘ନ୍ୟୁଜ୍‌ ଲେଟର’ ଉନ୍ମୋଚିତ ହେବ ବୋଲି କୁଳପତି ପ୍ରଫେସର ବ୍ୟୋମକେଶ ତ୍ରିପାଠୀ ସୂଚନା ଦେଇଛନ୍ତି। ଅନ୍ୟପକ୍ଷରେ ବିଶ୍ୱବିଦ୍ୟାଳୟ ଖୋଲିବା ନେଇ ଏପର୍ଯ୍ୟନ୍ତ କୌଣସି ସରକାରୀ ନିର୍ଦେଶନାମା ବିଶ୍ୱବିଦ୍ୟାଳୟର ହସ୍ତଗତ ହୋଇନଥିବାବେଳେ ଆସନ୍ତା ୧୧ରୁ ଖୋଲିବା ନେଇ ସମ୍ଭାବନା ରହିଛି। କୋଭିଡ ପାଇଁ ଅନ୍ୟ କୌଣସି କାର୍ଯ୍ୟକ୍ରମ କରାଯିବ ନାହିଁ। ଏକାଡେମୀ ପରିଷଦ ବୈଠକରେ ନିଷ୍ପତ୍ତି ହୋଇ ବୋର୍ଡରେ ଅନୁମୋଦନ କରାଯିବା ପରେ ଯାହାକିଛି ପଦକ୍ଷେପ ନିଆଯିବ ବୋଲି କୁଳପତି ସୂଚନା ଦେଇଛନ୍ତି।

Comments
Loading...