ଆରଜେଡି ଛାଡ଼ିଲେ ୪ ଥରର ସାଂସଦ ଅଲି ଅଶରଫ ଫାତମି

ପାଟନା : ପୂର୍ବତନ କେନ୍ଦ୍ର ମନ୍ତ୍ରୀ ତଥା ଦରଭଙ୍ଗାରୁ ୪ ଥରର ସାଂସଦ, ରାଷ୍ଟ୍ରୀୟ ଜନତା ଦଳ (ଆରଜେଡି)ର ବରିଷ୍ଠ ନେତା ମହମ୍ମଦ ଅଲି ଅଶରଫ ଫାତମି ବୁଧବାର ଦଳରୁ ଇସ୍ତଫା ଦେଇଛନ୍ତି। ବିଜେପିକୁ ଛାଡ଼ି ଅନ୍ୟ କୌଣସି ଦଳରେ ସେ ସାମିଲ ହୋଇପାରିବେ ବୋଲି କହିଛନ୍ତି। ଏହାସହ ଅପ୍ରେଲ ୧୮ରେ ସେ ମଧୁବନୀ ଲୋକସଭା ଆସନରୁ ନାମାଙ୍କନପତ୍ର ଦାଖଲ କରିବେ ବୋଲି କହିଛନ୍ତି।
ସୂଚନା ଅନୁସାରେ ସେ ମଧୁବନୀ ଲୋକସଭା ଆସନରୁ ଆରଜେଡି ଟକେଟ ଚାହୁଁଥିଲେ। ଆରଜେଡି ତାଙ୍କୁ ସେଠାରେ ପ୍ରାର୍ଥୀ କରିବାକୁ ମନା କରିଦେଇଥିଲା। ଏହାକୁ ନେଇ ସେ ଖୋଲାଖୋଲି ଅସନ୍ତୋଷ ବ୍ୟକ୍ତ କରିଥିଲେ। ଏହାପରେ ଆରଜେଡି ନେତା ତେଜସ୍ୱୀ ଯାଦବ ତାଙ୍କୁ ଫୋନ୍‍ କଲ କରି ୬ ବର୍ଷ ପାଇଁ ଆରଜେଡିରୁ ନିଲମ୍ବନ କରିବାକୁ ଧମକ ଦେଇଥିଲେ। ଏହାର ଗୋଟିଏ ଦିନ ପରେ ସେ ଦଳରୁ ଇସ୍ତଫା ଦେଇଛନ୍ତି। ଇସ୍ତଫା ଦେବା ପରେ ସେ ତେଜସ୍ୱୀଙ୍କୁ କଡ଼ା ସମାଲୋଚନା କରିଛନ୍ତି। ସେ କହିଛନ୍ତି ଯେ ତେଜସ୍ୱୀଙ୍କ ବୟସଠାରୁ ଅଧିକ ଦିନ ସେ ଆରଜେଡିରେ ଥିଲେ। ଲାଲୁ ଯାଦବଙ୍କ ବଡ଼ ପୁଅ ତେଜପ୍ରତାପ ଦଳ ବିରୋଧରେ ସିଧା ସଳଖ ବିଦ୍ରୋହ କରୁଥିବାବେଳେ ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ହେଉନାହିଁ। ହେଲେ ମୋତେ କାର୍ଯ୍ୟାନୁଷ୍ଠାନର ଧମକ ଦିଆଯାଉଛି।

Comments
Loading...