ଶେଷରେ ଶଙ୍ଖ ଧରିଲେ ପ୍ରଦୀପ ମାଝୀ
ନବରଙ୍ଗପୁର : ଶେଷରେ ବିଧିବଦ୍ଧ ଭାବେ ବିଜେଡିରେ ଯୋଗ ଦେଇଛନ୍ତି ପୂର୍ବତନ ସାଂସଦ ପ୍ରଦୀପ ମାଝୀ । ନବରଙ୍ଗପୁର ସହର ମାଝୀଗୁଡାରେ ଅନୁଷ୍ଠିତ ମିଶ୍ରଣ ପର୍ବରେ ସେ ବିଜେଡିରେ ସାମିଲ ହୋଇଛନ୍ତି । ନିକଟରେ ସେ କଂଗ୍ରେସରୁ ଇସ୍ତଫା ଦେଇଥିଲେ। ବିଜେଡିର ସଂଗଠନ ସମ୍ପାଦକ ପ୍ରଣବ ପ୍ରକାଶ ଦାସ, ହସ୍ତ ତନ୍ତ ଓ ବୟନ ଶିଳ୍ପ ମନ୍ତ୍ରୀ ପଦ୍ମିନୀ ଦିଆନ, ନବରଙ୍ଗପୁର ସାଂସଦ ରମେଶ ମାଝୀ, କ୍ରୀଡା ମନ୍ତ୍ରୀ ତୁଷାରକାନ୍ତି ବେହେରା, ନବରଙ୍ଗପୁରର ବିଜେଡି ବିଧାୟକ ପ୍ରମୁଖଙ୍କ ଉପସ୍ଥିତିରେ ପ୍ରଦୀପ ମାଝୀ ବିଜେଡିରେ ଯୋଗଦେଇ ତୃଣମୂଳ ସ୍ତରରୁ ଦଳକୁ ମଜବୁତ କରିବା ପାଇଁ ମତ ଦେଇଛନ୍ତି ।
ମିଶ୍ରଣ ପୂର୍ବରୁ ପ୍ରଦୀପ ନବରଙ୍ଗପୁର ସହରରେ ନିଜର ଶକ୍ତି ପ୍ରଦର୍ଶନ କରିଥିଲେ । ଚାଉଁରିଆଗୁଡା ଛକ ଠାରୁ ଏକ ବିଶାଳ ଶୋଭାଯାତ୍ରା କରି ସହର ପରିକ୍ରମା କରିଥିଲେ । ସହର ପରିକ୍ରମା ବେଳେ ପାରମ୍ପରିକ ବାଦ୍ୟ, ଯନ୍ନ ନୃତ୍ୟରେ କମ୍ପିଥିଲା ନବରଙ୍ଗପୁର ସହର । ଏହି ଶୋଭାଯାତ୍ରାରେ ପ୍ରାୟ ୪ ହଜାର ସମର୍ଥକଙ୍କ ସମେତ ନବରଙ୍ଗପୁର, କୋରାପୁଟ, ରାୟଗଡା ଓ ମାଲକାନଗିରି ଜିଲ୍ଲାର ପ୍ରାୟ ୩ ଶହରୁ ଅଧୁକ ବରିଷ୍ଠ କଂଗ୍ରେସ ନେତା ପୂର୍ବତନ ବିଧାୟକ, ବିଧାୟକ ପ୍ରାର୍ଥୀ, ବ୍ଲକ ସଭାପତି,ପଞ୍ଚାୟତସ୍ତରରେ ନେତା ଓ ସାଧାରଣ ଜନତା ସାମିଲ ହୋଇ ବିଜେଡିରେ ମିଶିଥିଲେ। ସହର ପରିକ୍ରମା ବେଳେ ପ୍ରଦୀପ ମାଝୀଙ୍କୁ ବିଭିନ୍ନ ସ୍ଥାନରେ ସ୍ବାଗତ ସମ୍ବର୍ଦ୍ଧନା ଦେବା ସହ ସାଧାରଣ ଲୋକେ ନିଜର ସମର୍ଥନ ଜଣାଇଥିଲେ । ସେଠାରେ ବିଜେଡି ସାଂଗଠନିକ ସମ୍ପାଦକ ପ୍ରଣବ ପ୍ରକାଶ ଦାସ ଓ ଅନ୍ୟମାନେ ପ୍ରଦୀପଙ୍କୁ ବିପୁଳ ସ୍ବାଗତ କରିଥିଲେ ।
Comments are closed.