ବାହାରେ ବୁଲୁଥିବା ପଶୁଙ୍କୁ ଖାଦ୍ୟ ଯୋଗାଇବ ବିଏମସି

ସମାଜ ପୋର୍ଟାଲ ଡେସ୍କ: କରୋନା ସଂକ୍ରମଣ ଜନିତ ରାସ୍ତାରେ ବୁଲୁଥିବା ପଶୁମାନେ ଖାଇବାକୁ ନ ପାଇ କଷ୍ଟରେ ଥିବା ବେଳେ ସେହି ଅସୁବିଧାକୁ ଦୂର କରିବା ପାଇଁ ଭୁବନେଶ୍ୱର ମହାନଗର ନିଗମ ଆସନ୍ତାକାଲିଠାରୁ (ଏପ୍ରିଲ ୧) ବୁଲା କୁକୁର, ଷଣ୍ଢ ଏବଂ ଗାଈମାନଙ୍କୁ ଖାଇବାକୁ ଦେବାକୁ ଯୋଜନା କରିଛନ୍ତି।ବିଏମସି କମିଶନର ପ୍ରେମ ଚନ୍ଦ୍ର ଚୌଧୁରୀ କହିଛନ୍ତି ଯେ ଲକଡାଉନ୍ ବଳବତ୍ତର ଥିବା ଯାଏଁ ଏହି ପଦକ୍ଷେପ ଜାରି ରହିବ। ଏହା କରୋନା ମହାମାରୀ ସମୟରେ ବାହାରେ ବୁଲୁଥିବା ପ୍ରାଣୀମାନଙ୍କୁ ଖାଦ୍ୟାଭାବ ଦୂର କରିପାରିବ।

ଏଥିପାଇଁ ବିଏମସି ଡେପୁଟି କମିଶନର ଶ୍ୟାମ ସୁନ୍ଦର ସେଠୀଙ୍କ ସୂଚନା ମୁତାବକ ନିର୍ଦ୍ଦେଶାବଳୀ ପ୍ରସ୍ତୁତ କରାଯାଇଛି। ବୁଲା କୁକୁର, ଷଣ୍ଢ ଏବଂ ଗାଈମାନଙ୍କ ପାଇଁ ପ୍ରତିଦିନ ୨୦ ହଜାର ଟଙ୍କା ମୂଲ୍ୟର ଖାଦ୍ୟ ଯୋଗାଇ ଦିଆଯିବ। ସମ୍ଭାବ୍ୟ ଆକଳନ ଅନୁଯାୟୀ ପ୍ରତିଦିନ ବୁଲା କୁକୁରଙ୍କ ପାଇଁ ୧୨ ହଜାର ଏବଂ ଗୋ ସମ୍ପଦ ପାଇଁ ୮ ହଜାର ଟଙ୍କା ଖର୍ଚ୍ଚ ହେବ। ରାଜ୍ୟ ସରକାରଙ୍କ ମତ୍ସ୍ୟ ଓ ପଶୁ ସମ୍ପଦ ବିକାଶ ବିଭାଗ ସେହି ପ୍ରାଣୀଙ୍କ ଖାଦ୍ୟ ପାଇଁ ୩ ଲକ୍ଷ ୬୦ ହଜାର ଟଙ୍କା ପ୍ରଦାନ କରିଛି।

ଏହି କାର୍ଯ୍ୟରେ ବିଏମସି ପ୍ରାଣୀ ଚିକିତ୍ସକ, ଅଧିକାରୀ ଏବଂ କର୍ମଚାରୀ ଏବଂ ପଶୁ କଲ୍ୟାଣ ପାଇଁ କାର୍ଯ୍ୟ କରୁଥିବା ଏନଜିଓ ସାମିଲ ରହିବେ। ଅନ୍ୟ ପକ୍ଷରେ ଏହି କାର୍ଯ୍ୟରେ ଭାଗ ନେବାକୁ ଇଚ୍ଛା କରୁଥିବା କୌଣସି ସଂସ୍ଥା ସିଧାସଳଖ ପଶୁମାନଙ୍କୁ ଖାଦ୍ୟ ବଣ୍ଟନ କରିପାରିବେ ନାହିଁ। ସେମାନେ ଏହି କାର୍ଯ୍ୟକ୍ରମରେ ଭାଗ ନେବାକୁ ଚାହିଁଲେ ବିଏମସି ଡେପୁଟି କମିଶନରଙ୍କ ସହ ଯୋଗାଯୋଗ କରିବାକୁ କୁହାଯାଇଛି।

Comments
Loading...