ନୂଆଦିଲ୍ଲୀ: ପ୍ରଥମେ କଲେଜ ନୁହେଁ, ପ୍ରଥମେ ପ୍ରାଥମିକ ସ୍କୁଲ ଖୋଲିବା ଉଚିତ। ବୟସ୍କମାନଙ୍କ ଅପେକ୍ଷା ପିଲାମାନଙ୍କଠାରେ ରୋଗ ପ୍ରତିଷେଧକ ଶକ୍ତି ବେଶି। ସର୍ଭେ ଅନୁସାରେ ପିଲାମାନଙ୍କଠାରେ ଭାଇରସ ମୁକାବିଲା କ୍ଷମତା ଅଧିକ। ବିଦେଶରେ ବି କୌଣସି ପ୍ରାଥମିକ ସ୍କୁଲ ବନ୍ଦ କରାଯିବା ନଜିର ବହୁତ କମ। ତେଣୁ ଦେଶରେ ପ୍ରଥମେ ପ୍ରାଥମିକ ସ୍କୁଲ ଏବଂ ପରେ ମାଧ୍ୟମିକ ସ୍କୁଲ ଖୋଲୁ। କିନ୍ତୁ ସ୍କୁଲ ଖୋଲିବା ପୂର୍ବରୁ ସମସ୍ତ ସପୋର୍ଟ ଷ୍ଟାଫଙ୍କ ଟିକାକରଣ ଜରୁରୀ ବୋଲି ସେରୋ ସର୍ଭେ ପରେ ଆଇସିଏମଆର ଡିଜି ବଳରାମ ଭାର୍ଗବ ପ୍ରକାଶ କରିଛନ୍ତି। ତେବେ ସ୍କୁଲ ଖୋଲିବା ପୂର୍ବରୁ ସବୁ ଶିକ୍ଷକ ଓ ଡ୍ରାଇଭରଙ୍କୁ ଟିକାକରଣ କରାଯାଉ ବୋଲି ସେ ପ୍ରକାଶ କରିଛନ୍ତି।
ଚତୁର୍ଥ ସେରୋ ସର୍ଭେ ନେଇ ଆଇସିଏମ୍ଆର ଡିଜି ବଳରାମ ଭାର୍ଗବ କହିଛନ୍ତି ଯେ ଏବେ ବି ୪୦କୋଟି ଲୋକ ସମ୍ବେଦନଶୀଳ ଓ ବିଦଦରେ ରହିଛନ୍ତି। ପିଲାଙ୍କଠାରୁ ଆରମ୍ଭ କରି ବୟସ୍କଙ୍କ ପର୍ଯ୍ୟନ୍ତ ଲୋକଙ୍କୁ ନେଇ ସର୍ଭେ ହୋଇଥିଲା। ଦେଶର ୭୦ ଜିଲାରେ ୨୮, ୯୭୫ ଲୋକଙ୍କୁ ନେଇ ସର୍ଭେ ହୋଇଥିଲା। ୭୦ ଜିଲାର ପ୍ରତି ଜିଲାରୁ ୧୦ ଗାଁ ଏବଂ ପ୍ରତି ଗାଁରୁ ୪୦ ନମୂନା ନେଇ ସର୍ଭେ କରାଯାଇଥିଲା। ସର୍ଭେ ଅନୁସାରେ ପ୍ରାୟ ୬୭.୬% ଲୋକଙ୍କଠାରେ ସେରୋ ପ୍ରିଭେଲାନ୍ସ। ୬ରୁ୯ ବର୍ଷ ପିଲାଙ୍କଠାରେ ସେରୋ ପ୍ରିଭେଲାନ୍ସ ୫୭.୨ ପ୍ରତିଶତ। ୧୦ରୁ ୧୭ ବର୍ଷ ମଧ୍ୟରେ ୬୧.୬% ଏବଂ ୧୮ରୁ ୪୪ ମଧ୍ୟରେ ୬୬.୭%। ୪୫ରୁ ୬୦ ବର୍ଷ ମଧ୍ୟରେ ୭୭.୬ ସେରୋ ପ୍ରିଭେଲାନ୍ସ। ସର୍ଭେ ଅନୁସାରେ ଟିକା ନେଇଥିବା ଲୋକଙ୍କଠାରେ ସେରୋ ପ୍ରିଭେଲାନ୍ସ ବେଶି। ଟିକା ନେଇନଥିବା ଲୋକଙ୍କଠାରେ ୬୨.୩ ପ୍ରତିଶତ ସେରୋ ପ୍ରିଭେଲାନ୍ସ। ଗୋଟିଏ ଡୋଜ ଲୋକଙ୍କଠାରେ ୮୧% ଏବଂ ୨ଟି ଡୋଜ ପରେ ୮୯.୮%। ସର୍ଭେ ଅନୁସାରେ ଦେଶର ଦୁଇ ତୃତୀୟାଂଶ ଲୋକଙ୍କୁ ଛୁଇଁ ସାରିଛି କରୋନା ଭୂତାଣୁ। ବାକି ୪୦କୋଟି ଲୋକ ଏବେ ବି ସମ୍ବେଦନଶୀଳ ରହିଛନ୍ତି। ଏବେ ବି ବିପଦ ରହିଛି। ଆଦୌ ଢିଲା ହେବା ଅନୁଚିତ ବୋଲି ସେରୋ ସର୍ଭେ ପରେ ଆଇସିଏମଆର ଡିଜି ବଳରାମ ଭାର୍ଗବ ପ୍ରକାଶ କରିଛନ୍ତି।
Comments are closed.