ମୁମ୍ବଇ: କରୋନା ଭାଇରସର ପ୍ରକୋପ ଏପରି ହୋଇଛି ଯେ, ଅନେକ ଲୋକ ନିଜକୁ ଘରର ଚାରି କାନ୍ଥ ମଧ୍ୟରେ ଆବଦ୍ଧ କରି ଦେଉଛନ୍ତି। ଗମ୍ଭୀର ସ୍ଥିତିକୁ ଲକ୍ଷ୍ୟ କରି ଅନେକ ବଲିଉଡ଼ ଚଳଚ୍ଚିତ୍ରର ଶୁଟିଂ ଓ ମୁକ୍ତିଲାଭକୁ ମଧ୍ୟ ବାତିଲ କରି ଦିଆଯାଇଛି। କିନ୍ତୁ ଇଏ ତ ବଲିଉଡ଼୍, ଯେଉଁଠି ଜଟିଳ ସମୟରେ ମଧ୍ୟ ନୂଆ ନୂଆ କଳ୍ପନା ବା ଧାରଣା ସାମ୍ନାକୁ ଆସିଥାଏ। ପୁଣିଥରେ ବଲିଉଡ଼ ସମସ୍ତଙ୍କୁ ଚକିତ କରିଦେଇଛି। କରୋନାକୁ ନେଇ ବଲିଉଡ଼ ଚଳଚ୍ଚିତ୍ର ନିର୍ମାଣ ହେବାକୁ ଯାଉଥିବା ସୂଚନା ମିଳିଛି। ଏପରିକି ଚଳଚ୍ଚିତ୍ରର ଟାଇଟଲ ମଧ୍ୟ ଦିଆସରିଛି।
ଏକ ଜାତୀୟ ଗଣମାଧ୍ୟମ ରିପୋର୍ଟ ମୁତାବକ, ଇରୋସ୍ ଇଣ୍ଟର୍ନ୍ୟାସନାଲ୍ ‘କରୋନା ପ୍ୟାର୍ ହୈ’ ନାମରେ ଚଳଚ୍ଚିତ୍ର ନିର୍ମାଣ କରିବାର ଯୋଜନା ଚଳାଇଛି। ଚଳଚ୍ଚିତ୍ରର ନାଁ ହ୍ରିତିକ୍ଙ୍କ ଫିଲ୍ମ ‘କହୋ ନା ପ୍ୟାର୍ ହୈ’ ସହ ମିଶୁଛି। ଏହାକୁ ଏକ ପ୍ରେମ କାହାଣୀ ରୂପେ ନିର୍ମାଣ କରିବାକୁ ପ୍ରସ୍ତୁତି ଚାଲିଛି। ଇରୋସ୍ ଇଣ୍ଟର୍ନ୍ୟାସନାଲ୍ର କୃଷ୍ଣା ଲୁଲ୍ଲା ନିଜେ ଏହି ସୂଚନା ଦେଇଛନ୍ତି।
କୃଷ୍ଣା କହିଛନ୍ତି, ଏବେ ଚଳଚ୍ଚିତ୍ରର ସ୍କ୍ରିପ୍ଟ ଉପରେ କାମ ଚାଲିଛି। ଏହାକୁ ଏକ ପ୍ରେମ କାହାଣୀ ରୂପେ ନିର୍ମାଣ କରାଯିବ। ବର୍ତ୍ତମାନ ଆମେ ସ୍ଥିତ ଟିକେ ସୁଧୁରିବାକୁ ଅପେକ୍ଷା କରିଛୁ, କାରଣ ଏବେ ସବୁ କିଛି ବନ୍ଦ। ସ୍ଥିତି ନିୟନ୍ତ୍ରଣକୁ ଆସିବା ପରେ ଶୁଟିଂ ଆରମ୍ଭ କରିଦେବୁ।
ସୂଚନାଯୋଗ୍ୟ, ଇରୋସ୍ ବ୍ୟତୀତ ଆହୁରି ଅନେକ ଚଳଚ୍ଚିତ୍ର ନିର୍ମାଣକାରୀ କମ୍ପାନୀ ଓ ନିର୍ମାତା କରୋନା ଉପରେ ଚଳଚ୍ଚିତ୍ର ନିର୍ମାଣ କରିବାକୁ ଚିନ୍ତା କରିଛନ୍ତି। ଇଣ୍ଡିଆନ୍ ମୋଶନ୍ ପିକ୍ଚର୍ ପ୍ରଯୋଜକ ସଂଘର କହିବାନୁସାରେ କିଛି ନିର୍ମାତା ଏଥିପାଇଁ ପ୍ରସ୍ତାବ ଦେଇଛନ୍ତି। ତାଙ୍କ ପାଖକୁ ଚଳଚ୍ଚିତ୍ର ପାଇଁ ଏକ ଟାଇଟଲ ମଧ୍ୟ ଆସିଛି, ଯାହାର ନାଁ ରହିଛି ‘ଡେଡ୍ଲୀ କରୋନା’।
Comments are closed.