ପାକିସ୍ତାନର ଭାଗ୍ୟ ନିର୍ଦ୍ଧାରଣ ଆଜି, ଏଫଏଟିଏଫରେ ହୋଇପାରେ କଳା ତାଲିକାଭୁକ୍ତ

ପ୍ୟାରିସ: ଆତଙ୍କବାଦୀଙ୍କୁ ଜନ୍ମ ଦେଉଥିବା ପାକିସ୍ତାନ ପାଇଁ ସୋମବାର ଏକ ଗୁରୁତ୍ଵପୂର୍ଣ୍ଣ ଦିବସ। ଫ୍ରାନ୍ସରେ ହେବାକୁ ଥିବା ଫାଇନାନ୍ସିଆଲ ଆକ୍ସନ ଟାସ୍କଫୋର୍ସ(ଏଫଏଟିଏଫ) ବୈଠକରେ ଆଜି ଦେଶର ଭାଗ୍ୟ ନିର୍ଦ୍ଧାରଣ ହେବ। ସର୍ବଦା ଆତଙ୍କବାଦକୁ ପ୍ରୋତ୍ସାହିତ କରିଆସୁଥିବା ଏବଂ ପାଣ୍ଠି ଯୋଗାଇ ଆସୁଥିବା ପାକିସ୍ତାନକୁ ବୈଠକରେ ଏଫଏଟିଏଫ କଳା ତାଲିକାଭୁକ୍ତ କରିବାର ଯଥେଷ୍ଟ ସମ୍ଭାବନା ରହିଛି। ଆତଙ୍କବାଦୀଙ୍କୁ ପାଣ୍ଠି ଯୋଗାଣ ବନ୍ଦ କରିବାରେ ପାକିସ୍ତାନ ବିଫଳ ହୋଇଥିବାରୁ ଏଫଏଟିଏଫ ବୈଠକରେ ଏପରି କାର୍ଯ୍ୟାନୁଷ୍ଠାନ ନିଆଯିବାର ଆଶଙ୍କା ରହିଛି।

ସୂଚନା ମୁତାବକ, ସୋମବାରଠାରୁ ଫ୍ରାନ୍ସର ରାଜଧାନୀ ପ୍ୟାରିସଠାରେ ଏଫଏଟିଏଫ ବୈଠକ ଅନୁଷ୍ଠିତ ହେବ। ଏହା ଉପରେ ସାରା ବିଶ୍ଵର ନଜର ରହିଛି। ୨୦୧୮ ଜୁନରେ ଏଫଏଟିଏଫ ପାକିସ୍ତାନୁ ଧୁସର ତାଲିକାରେ ଅନ୍ତର୍ଭୁକ୍ତ କରିଥିଲା। ଏହା ସହିତ ୨୭ଟି ମାନଦଣ୍ଡକୁ ଗୁରୁତ୍ଵ ଦିଆଯାଇ ଏକ ଯୋଜନା କାର୍ଯ୍ୟକାରୀ କରିବାକୁ ବୈଠକରେ ପରାମର୍ଶ ଦିଆଯାଇଥିଲା। ଏଥିପାଇଁ ୧ ବର୍ଷ ସମୟ ଧାର୍ଯ୍ୟ କରାଯାଇଥିଲା। ମାନଦଣ୍ଡ ଭିତରେ ବ୍ୟାଙ୍କିଙ୍ଗ ଓ ଅଣବ୍ୟାଙ୍କିଙ୍ଗ ସଂସ୍ଥା, କର୍ପୋରେଟ ଏବଂ ଅଣକର୍ପୋରେଟ ସଂସ୍ଥାଗୁଡ଼ିକରୁ ଆତଙ୍କବାଦୀ ସଂଗଠନଗୁଡ଼ିକୁ ପାଣ୍ଠି ଯୋଗାଣ ବନ୍ଦ କରିବା ବିଷୟ ରହିଥିଲା। କିନ୍ତୁ ପାକିସ୍ତାନ ଏଥିରେ ବିଫଳ ହୋଇଛି। ଗତ ଅଗଷ୍ଟରେ ମଧ୍ୟ ଏଫଏଟିଏଫର ଏସିଆ ପାସିଫିକ ଜଏଣ୍ଟ ଗ୍ରୁପ(ଏପିଜେଜି) ଉପରୋକ୍ତ ମାନଦଣ୍ଡ ପାଳନ କରାଯାଇ ନ ଥିବାରୁ ପାକିସ୍ତାନକୁ ଧୂସର ତାଲିକାରେ ବଳବତ୍ତର ରଖିଥିଲା।

Comments
Loading...