ସେଭିଲ୍ (ସ୍ପେନ୍)/ସେଣ୍ଟ ପିଟର୍ସବର୍ଗ: ଚଳିତ ୟୁରୋ କପ୍ ଫୁଟ୍ବଲରେ ସୋମବାର ରାତିରେ ଖେଳା ଯାଇଥିବା ଏକ ଗ୍ରୁପ୍ ‘ଇ’ ମୁକାବିଲା ଅମୀମାସିଂତ ରହିଛି। ସ୍ପେନ୍ ଓ ସ୍ବିଡେନ୍ ମଧ୍ୟରେ ଖେଳା ଯାଇଥିବା ମୁକାବିଲା ଗୋଲ୍ଶୂନ୍ୟ ରହିଛି। ମ୍ୟାଚ୍ରେ ଜିତିବାକୁ ସ୍ପେନ୍ ବଡ଼ ଦାବିଦାର ଥିଲେ ହେଁ ସ୍ବିଡେନ୍ର ରକ୍ଷାପନ୍ଥୀ ଲଢ଼ୁଆ ପ୍ରଦର୍ଶନ କରି ପୂରା ୯୦ ମିନିଟରେ ସ୍ପେନ୍କୁ ଗୋଲ୍ ସ୍କୋର୍ କରିବାକୁ ଦେଇନଥିଲେ। ଏହି ଫଳାଫଳରେ ସ୍ବିଡେନ୍ ସନ୍ତୁଷ୍ଟ ରହିବ ନିଶ୍ଚୟ। ହେଲେ ସ୍ପେନ୍ ନିଶ୍ଚିତ ଭାବେ ନିରାଶ ହୋଇଛି।
ଗ୍ରୁପ୍ ‘ଇ’ର ଅନ୍ୟ ଏକ ମ୍ୟାଚ୍ରେ ପୋଲାଣ୍ଡକୁ ୨-୧ ଗୋଲ୍ରେ ସ୍ଲୋଭାକିଆ ପରାସ୍ତ କରିଛି। ପୋଲାଣ୍ଡ ଏକ ଆତ୍ମଘାତୀ ଗୋଲ୍ ବରଣ କରିଥିବା ବେଳେ ପରେ ଏହା ଗୋଲ୍ ସୁଝାଇ ଦେଇଥିଲା। ମିଲାନ୍ ସ୍କ୍ରିନିଆର ସ୍ଲୋଭାକିଆ ପାଇଁ ବିଜୟସୂଚକ ୨ୟ ଗୋଲ୍ ଦେଇଥିଲେ। ୧୮ ମିନିଟରେ ସ୍ଲୋଭାକିଆ ପ୍ରଥମ ଗୋଲ୍ ଦେଇଥିଲା। ସ୍ଲୋଭାକିଆର ରବର୍ଟ ମ୍ୟାକ୍ ବଲ୍ ନେଇ ପେନାଲ୍ଟି ଏରିଆ ମଧ୍ୟରୁ ଏକ ଜୋର୍ଦାର ସଟ୍ ମାରିଥିଲେ। ବଲ୍ ପୋଲାଣ୍ଡର ଗୋଲ୍ରକ୍ଷକ ୱସିଏଚ୍ ଜେଜେସ୍ନିଙ୍କ ଦେହରେ ବାଜି ପରେ ଗୋଲ୍ପୋଷ୍ଟରେ ବାଜି ଭିତରେ ପଶି ଯାଇଥିଲା। ଏହାକୁ ପୋଲାଣ୍ଡର ଜେଜେସ୍ନିଙ୍କ ଆତ୍ମଘାତୀ ଗୋଲ୍ ଭାବେ ଗଣା ଯାଇଥିଲା। ଦ୍ବିତୀୟାର୍ଦ୍ଧ ଆରମ୍ଭହେବାର ୩୦ ସେକେଣ୍ଡରେ ପୋଲାଣ୍ଡ ଗୋଲ୍ ସୁଝାଇ ଦେଇଥିଲା।
Comments are closed.