ଦେବଗଡ଼ : ଜଙ୍ଗଲକୁ ଛତୁ ତୋଳିବାକୁ ଯାଇଥିବା ଜଣେ ଯୁବକ ହାତୀ ଆକ୍ରମଣରେ ଗୁରୁତର ଆହତ ହୋଇଥିବା ଜଣାପଡିଛି । ଚିକିତ୍ସା ନିମନ୍ତେ ତାଙ୍କୁ ପ୍ରଥମେ ଦେବଗଡ ଜିଲା ମୂଖ୍ୟ ଚିକିତ୍ସାଳୟ ଏବଂ ପରେ ବୁର୍ଲା ଡାକ୍ତରଖାନାକୁ ସ୍ଥାନାନ୍ତରିତ କରାଯାଇଛି । ମିଳିଥିବା ସୂଚନା ଅନୁଯାୟୀ ଆଜି ପୂର୍ବାହ୍ନରେ ରିଆମାଳ ବନାଂଚଳ ନୂଆଁଡିହୀ ଫରେଷ୍ଟ ସେକ୍ସନ ଅନ୍ତର୍ଗତ ଖିଲେଇ ଗ୍ରାମର ଲୋକନାଥ ଗଡନାୟକଙ୍କ ପୁଅ ଭୂବନେଶ୍ୱର ଗଡନାୟକ(୪୬)ଅନ୍ୟ ୨ ଜଣ ସାଥିଙ୍କ ସହ ନିକଟସ୍ଥ ଗୋଗୁଆ ସଂରକ୍ଷିତ ଜଙ୍ଗଲକୁ ଛତୁ ତୋଳିବା ପାଇଁ ଯାଇଥିଲେ । ତେବେ ଦିନ ପ୍ରାୟ ୧ ଟା ସମୟରେ ହାତୀ ମାନଙ୍କର ଏକ ଦଳ ସେମାନଙ୍କୁ ଗୋଡାଇବା ସହ ଆକ୍ରମଣ ପାଇଁ ଉଦ୍ୟମ କରିଥିଲେ। ତେବେ ପ୍ରାଣ ବିକଳରେ ଅନ୍ୟ ୨ ଜଣ ସାଥୀ ଦୌଡି ପଳାଇଥିବା ବେଳେ ଉକ୍ତ ହାତୀ ଦଳ ଭୂବନେଶ୍ୱରଙ୍କୁ ଆକ୍ରମଣ କରିବାରୁ ଭୂବନେଶ୍ୱରଙ୍କ ଡାହାଣ ଜଙ୍ଘ ଭାଙ୍ଗିଯାଇଥିଲା। ତାଙ୍କର ଅନ୍ୟ ସାଥୀ ଦ୍ୱୟ ଏନେଇ ଭୂବନେଶ୍ୱରଙ୍କ ପରିବାର ଲୋକଙ୍କୁ ଜଣାଇବା ପରେ ସେମାନେ ବନ ବିଭାଗର ସହାୟତା ଲୋଡିଥିଲେ। ସୂଚନା ପାଇ ନୁଆଁଡିହୀ ଫରେଷ୍ଟର ଲାଣ୍ଡୁ କିରେଇ ବିଭାଗୀୟ କର୍ମଚାରୀଙ୍କ ସହ ସଦଳବଳେ ସେଠାରେ ପହଂଚିବା ସହ ଗ୍ରାମବାସୀ ଏବଂ ଭୂବନେଶ୍ୱରଙ୍କ ପରିବାର ସହାୟତାରେ ଜଙ୍ଗଲ ମଧ୍ୟରୁ ଭୂବନେଶ୍ୱରଙ୍କୁ ଉଦ୍ଧାର କରି ଚିକିତ୍ସା ନିମନ୍ତେ ଦେବଗଡ ଜିଲା ମୂଖ୍ୟ ଚିକିତ୍ସାଳୟରେ ଭର୍ତ୍ତୀ କରିଥିଲେ। ମାତ୍ର ତାଙ୍କର ଅବସ୍ଥା ଗୁରୁତର ଥିବାରୁ ଅଧିକ ଚିକିତ୍ସା ନିମନ୍ତେ ବୁର୍ଲା ଡାକ୍ତରଖ।।ନାକୁ ସ୍ଥାନାନ୍ତରିତ କରାଯାଇଛି।
Comments are closed.