କଚାଡି ଦେଲା ହାତୀ, ବୃଦ୍ଧ ମୃତ

କଣିହାଁ : ଅନଗୁଳ ଜିଲା କଣିହାଁ ବ୍ଲକ ବଜ୍ରକୋଟ ସୁବର୍ଣ୍ଣପୁର ସାହିରେ ଏକ ଅଭାବନୀୟ ଘଟଣା ଘଟିଛି । ଏକ ଦନ୍ତା ହାତୀ ଗ୍ରାମର ମାୟାଧର ବେହେରା(୬୩)କୁ କଚାଡି ମାରିଦେଇଛି । ଶୁକ୍ରବାର ସକାଳ ପ୍ରାୟ ସାଢ଼େ ୬ଟା ସମୟରେ ମାୟାଧର କ୍ଷୀର ପାଇଁ ଆସୁଥିବା ସମୟରେ ସ୍କୁଲ ପାଖରେ ଏକ ଗୋଠ ଖଣ୍ଡିଆ ଦନ୍ତା ହାବୁଡ଼ରେ ପଡ଼ିଥିଲେ । ଜୀବନ ବିକଳରେ ମାୟାଧର ଦୌଡ଼ି ପଳାଉଥିବା ସମୟରେ ଦନ୍ତା ମାୟାଧରକୁ ଶୁଣ୍ଢରେ କଚାଡି ଦେଇଥିଲା । ଗୁରୁତର  ଅବସ୍ଥାରେ ମାୟାଧରକୁ କଣିହାଁ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତି କରାଯାଇଥିଲା। ମାତ୍ର ଡ଼ାକ୍ତର ସେଠାରେ ତାଙ୍କୁ ମୃତ ଘୋଷଣା କରିଥିଲେ । ଖବର ପାଇ ପରିବାର ଲୋକ ତଥା ଗ୍ରାମବାସୀ ମେଡିକାଲରେ ପହଂଚି କ୍ଷତିପୂରଣ ଦାବି କରିଥିଲେ । କଣିହାଁ ରେଞ୍ଜର ନୀଳମଣି ଦେହୁରୀ କ୍ଷତିପୂରଣ ବାବଦକୁ ପ୍ରଥମ ପର୍ୟ୍ୟାୟରେ ୪୦ହଜାର ଟଙ୍କାର ଚେକ ପ୍ରଦାନ କରିବାସହ ବାକି କାଗଜପତ୍ର ପରେ ପ୍ରଦାନ କରାଯିବ ବୋଲି କହିଥିଲେ । ପରେ ରେଙ୍ଗାଳୀ ପୋଲିସ ଏକ ମକଦ୍ଦମା ରୁଜୁ କରି ଶବ ବ୍ୟବଚ୍ଛେଦ ପାଇଁ ତାଳଚେର ପଠାଇ ତଦନ୍ତ ଜାରି ରଖିଛନ୍ତି । ମାୟାଧର ମୃତ୍ୟୁ ଖବର ପାଇ ଢେଙ୍କାନାଳ ସାଂସଦ ମହେଶ ସାହୁ ପାଳଲହଡ଼ା ବିଧାୟକ ମୁକେଶ କୁମାର ପାଳ ମୃତକ ପରିବାରକୁ ସମବେଦନା ଜଣାଇଛନ୍ତି ।

Comments
Loading...