MEllora 950×100

ଚାଷୀର ଦୁଃଖ

ଚାଷ ପ୍ରତି ସମନ୍ବିତ ଯୋଜନାବଦ୍ଧ ପ୍ରୟାସ ଅଭାବରୁ ବିଭିନ୍ନ ବିଲକ୍ଷଣ ପରିଲକ୍ଷିତ ହେଉଛି ଏବଂ ଚାଷୀ ପାଇଁ ଦୁଃଖର କାରଣ ପାଲଟିଛି

ଏ ବର୍ଷ ଋତୁକାଳୀନ ପ୍ରତିକୂଳ ପରିସ୍ଥିତି ଉପୁଜିନି। ତେଣୁ ବଜାରରେ ଶୀତକାଳୀନ ପନିପରିବା ଯାହାକୁ ଯେତେ। ଗଦା ହୋଇ ରହିଥିବା ପରିବା ତୁଳନାରେ ଗ୍ରାହକଙ୍କ ଚାହିଦା ହ୍ରାସ ପାଉଥିବାରୁ ଅପେକ୍ଷାକୃତ କମ୍‌ ମୂଲ୍ୟରେ ଚାଷୀ ବିକିବାକୁ ବାଧ୍ୟ ହେଉଛି। ଅଳ୍ପକିଛି ଟଙ୍କା ବିନିମୟରେ ବ୍ୟାଗଭର୍ତ୍ତି ପରିବା ନେଇ ତମ ଆମ ଭଳି ଗ୍ରାହକ ଖୁସି; କିନ୍ତୁ କେହି ଚିନ୍ତା କଲେନି ଚାଷୀର ମେହନତି ଏହି ବିକ୍ରିଲବ୍ଧ ଅର୍ଥରେ ମଜୁରା ହେଉଛି ତ? ଏଭଳି ପରିସ୍ଥିତିରେ ଭାଙ୍ଗିପଡୁଥିବା ଚାଷୀର ମନ ଓ ଉଜୁଡ଼ି ଯାଇଥିବା ସଂସାର ସମ୍ପର୍କରେ ଗ୍ରାହକ ନୁହେଁ ସରକାର ଚିନ୍ତା କରିବା ଉଚିତ। ପରିସ୍ଥିତି ଏପରି ହୋଇଛି ଯେ କ୍ଷେତରୁ ମଣ୍ଡିକୁ ଆଣିବା ପାଇଁ ହେଉଥିବା ଖର୍ଚ୍ଚ ବିକ୍ରିଲବ୍ଧ ଅର୍ଥରେ ଭରଣା ହେଉନି। ତେଣୁ ଅନେକ ସମୟରେ ପରିବା କ୍ଷେତରେ ସେ ମଇ ଚଢ଼ାଇଦେଉଛି; ବରଂ ସେହି ପରିବା ସବୁଜ ସାରରେ ପରିଣତ ହେଲେ ତାହା ଭବିଷ୍ୟତରେ ଅନ୍ୟ ଫସଲକୁ ସହାୟକ ହେବ। ଏପରି କି ବିଲରେ ସେ ଗୋରୁ ଚରାଇ ଦେଉଛି। ରାସ୍ତାରେ କୁଢ଼କୁଢ଼ ପରିବା ଓଜାଡ଼ି ସେ ପ୍ରତିବାଦ କରୁଛି। ଏଭଳି ଏକ ପ୍ରତିକୂଳ ପରିସ୍ଥିତି ନେଇ ଆମ ପକ୍ଷରୁ କୌଣସି ଉଦ୍‌ବେଗ କିମ୍ବା କ୍ଷୋଭ ନାହିଁ। ଶସ୍ତାରେ ପରିବା ପାଇଲେ ଆମର ଆନନ୍ଦ। କେହି ଦିନେ ଚିନ୍ତା କଲେନି ଏତେ କ୍ଷତି ସହି ଚାଷୀ ପରବର୍ତ୍ତୀ ଋତୁ ପାଇଁ କାହିଁକି ପରିବା ଚାଷ କରିବ? ସମୟ ଆସିବ, ଆମ ଚାହିଦା ମୁତାବକ ସତେଜ ପରିବା ବଜାରକୁ ଆସିବ ନାହିଁ। ରାଜ୍ୟ ବାହାରୁ ଆସୁଥିବା ପରିବାକୁ ଆମେ ଅଧିକ ମୂଲ୍ୟ ଦେଇ କିଣିବା। ଏଥିସହ ଏବେ ଚାଲିଥିବା ଧାନ ଅମଳ ପାଇଁ ମଣ୍ଡି ସଂଖ୍ୟା ପୂର୍ବଭଳି ଅତୁଟ ରହିଛି। କେବଳ ଟୋକନ ବ୍ୟବସ୍ଥାର ସରଳୀକରଣ ନୁହେଁ, ମିଲରମାନଙ୍କ ଅନୈତିକ କାରବାର ପ୍ରତି କର୍ତ୍ତୃପକ୍ଷ ଆଖିବୁଜି ଦେଇଛନ୍ତି। ଆମକୁ ଏଠାରେ ଦୁଃଖର ସହ କହିବାକୁ ପଡୁଛି ଯେ ପେକ୍ସ ଓ ଅନ୍ୟାନ୍ୟ ସ୍ତରରେ ଯେଉଁ ଦୁର୍ନୀତି ଘଟୁଛି ତାହାର ପୃଷ୍ଠପଟରେ ଅଛନ୍ତି ମିଲର୍‌ମାନେ। ସରକାରଙ୍କ କ୍ବିଣ୍ଟାଲ ପିଛା ଧାନ ମୂଲ୍ୟ ୨୦୪୦ ଟଙ୍କା ଧାର୍ଯ୍ୟ କରାଯାଇଥିବାବେଳେ ପଡ଼ୋଶୀ ଛତିଶଗଡ଼ରେ ତାହା ଆଉ ହଜାରେ ଟଙ୍କା ଅଧିକ। ଧାନମଣ୍ଡିରେ ଉପୁଜୁଥିବା ପ୍ରତିକୂଳ ପରିସ୍ଥିତିରେ ବିରକ୍ତି ପ୍ରକାଶ କରି କିଛି ଚାଷୀ ବେସରକାରୀ ଏଜେନ୍ସିକୁ ଧାନ ବିକୁଛନ୍ତି। ସେମାନେ ପଡ଼ୋଶୀ ରାଜ୍ୟ ଛତିଶଗଡ଼କୁ ଧାନ ଯୋଗାଇ ବେଶ୍‌ ଦୁଇ ପଇସା ଲାଭବାନ ହେଉଛନ୍ତି। ଏ ସବୁ କଥା ଏଠାରେ ଉଲ୍ଲେଖ କରିବାର ଉଦ୍ଦେଶ୍ୟ ହେଲା, ସରକାର ଚାଷୀଙ୍କ ଆର୍ଥିକ ସ୍ଥିତିରେ ଉନ୍ନତି ପାଇଁ କମ୍‌ ସୁଧରେ ଋଣ ସମେତ ଅନ୍ୟାନ୍ୟ କାର୍ଯ୍ୟକ୍ରମ ମାଧ୍ୟମରେ ସହାୟତା ରାଶି ଯୋଗାଉଥିଲେ ମଧ୍ୟ ତାହା ଠିକଣା କାମରେ ଲାଗୁନି। ତେଣୁ ଚାଷବନ୍ଦୀ ଲୋକଙ୍କ ଅବସ୍ଥାରେ ଉନ୍ନତି ଘଟୁନି।

ରାଜ୍ୟ ସରକାର ଜାତୀୟ ସ୍ତରରେ କ୍ରମାଗତ ୪ ବର୍ଷ ଧରି କୃଷି କର୍ମଣ ପୁରସ୍କାର ପାଇଥିଲେ ମଧ୍ୟ ଅସଲରେ ଯେଉଁମାନଙ୍କ ଉଦ୍ଦେଶ୍ୟରେ ଏହି ପୁରସ୍କାର ସେମାନଙ୍କ ଅବସ୍ଥାର ଉନ୍ନତି ଘଟୁନି। ଶୀତଳଭଣ୍ଡାର ସମସ୍ୟାର ଏ ପର୍ଯ୍ୟନ୍ତ ସମାଧାନ ହୋଇପାରିନି। ସରକାରୀ ବ୍ୟବସ୍ଥାରେ ଥିବା ସଂସ୍ଥାଗୁଡ଼ିକ ଅଚଳ ହୋଇପଡ଼ିଛି। ଫାଇଲ ଚାଷର ପ୍ରଭାବ କ୍ଷେତରେ ଉପଲବ୍ଧ ହେଉନଥିବାରୁ କ୍ଷେତ ମାଲିକ ଯେଉଁ ତିମିରେକୁ ସେଇ ତିମିରେ ରହିଛି। ସେହିଭଳି ଖାଦ୍ୟ ପ୍ରକ୍ରିୟାକରଣ ଶିଳ୍ପ ପ୍ରତିଷ୍ଠା ସକାଶେ ସରକାର ସ୍ବତନ୍ତ୍ର ଆଗ୍ରହ ପ୍ରକାଶ କରୁଥିଲେ ମଧ୍ୟ ତାହାର କାର୍ଯ୍ୟକାରିତା କେବଳ ସମୟ ଓ ସୁବିଧାକୁ ଅପେକ୍ଷା କରିଛି। ଏଠାରେ ଉଲ୍ଲେଖଯୋଗ୍ୟ କି ଧାନକୁ ବାଦ ଦେଇ କ୍ଷେତରେ ବିକଳ୍ପ ଚାଷ ରୂପେ କପା ଓ ମକାକୁ ଆଦରି ନେବାକୁ ପରାମର୍ଶ ଦିଆଯାଇଥିଲା। ରାଜ୍ୟର କେତେକ ଅଞ୍ଚଳରେ ହେଉଥିବା ମକା ଓ କପା ମଧ୍ୟ ଉଚିତ ମୂଲ୍ୟରେ ବିକ୍ରି ହୋଇପାରୁନି। ମକାରୁ ପ୍ରସ୍ତୁତ ହେଉଥିବା ବିଭିନ୍ନ ପ୍ରକାରର ଖାଦ୍ୟ ସାମଗ୍ରୀର ମୂଲ୍ୟ ବଜାରରେ ଦେଖିଲେ ଆଖି ଖୋସି ହୋଇଯାଉଛି; ଅଥଚ ଅସଲ କଞ୍ଚାମାଲ ଆମ ପାଖରେ। ଯଦି ତାହାର ପ୍ରକ୍ରିୟାକରଣ ହୋଇପାରନ୍ତା ତେବେ ଉଭୟ ଚାଷୀ ଓ ସମ୍ପୃକ୍ତ ଶିଳ୍ପ ସଂସ୍ଥା ଲାଭବାନ ହୋଇପାରନ୍ତେ। ଯେମିତି ଗୋଟିଏ ସମୟରେ ଏକା ପ୍ରକାରର ପରିବା ସମଗ୍ର ରାଜ୍ୟରେ ଚାଷ ହେଉଥିବାରୁ ଏହି ବିପୁଳତା ବିପର୍ଯ୍ୟୟର କାରଣ ହେଉଛି। ତେଣୁ ପର୍ଯ୍ୟାୟକ୍ରମେ ସମୟ ବ୍ୟବଧାନରେ ଚାଷ ସକାଶେ ଉଦ୍ୟାନ ବିଭାଗ ପକ୍ଷରୁ ପ୍ରଭାବୀ ଢଙ୍ଗରେ କାର୍ଯ୍ୟ କରାଯିବାର ଆବଶ୍ୟକତା ରହିଛି। ଏହା ଫଳରେ ଉଭୟ ଚାଷୀ ଓ ଖାଉଟି ଉପକୃତ ହୋଇପାରନ୍ତେ। ଆମକୁ ଏଠାରେ କହିବାକୁ ପଡୁଛି ଯେ ଚାଷ ପ୍ରତି ସମନ୍ବିତ ଯୋଜନାବଦ୍ଧ ପ୍ରୟାସ ଅଭାବରୁ କେବଳ ଏହି ବିଲକ୍ଷଣ ପରିଲକ୍ଷିତ ହେଉଛି।

ଖାଉଟି ମୂଲ୍ୟ ସୂଚକାଙ୍କରେ ମୁଦ୍ରାସ୍ଫୀତି ହ୍ରାସ ସରକାରଙ୍କ ଚାପ ହ୍ରାସ କରିଛି। ଗତ ଅକ୍ଟୋବର ମାସରେ ଏହା ୬.୭୭ ପ୍ରତିଶତ ଥିଲାବେଳେ ନଭେମ୍ବରରେ ୫.୮୮ ପ୍ରତିଶତକୁ ହ୍ରାସ ପାଇଥିଲା; ଯାହା ୧୧ ମାସ ମଧ୍ୟରେ ସର୍ବନିମ୍ନ। ଏହାର ମୁଖ୍ୟ କାରଣ କ’ଣ ସେଥିପ୍ରତି କାହାର ନଜର ନାହିଁ। ଏ ବର୍ଷ ଶୀତକାଳୀନ ପନିପରିବା ଓ ଫଳ ମୂଲ୍ୟ ବଜାରରେ ମାତ୍ରାଧିକ ହ୍ରାସ ପାଇଥିବାରୁ ଏହି ମୂଲ୍ୟସୂଚୀ ଖସିଛି। ଏହା କାହା ସ୍ବାର୍ଥ ବିନିମୟରେ? ଚାଷୀ କ୍ଷତି ସହିଲେ, ଖାଉଟି ଶସ୍ତାରେ ପରିବା ଓ ଫଳ ପାଇ ଖୁସି। ବର୍ଦ୍ଧିତ ମୂଲ୍ୟସୂଚୀକୁ ନେଇ ସରକାର ଓ ରିଜର୍ଭ ବ୍ୟାଙ୍କ ମଧ୍ୟରେ ଚାପା ଉତ୍ତେଜନା ମଧ୍ୟ ପ୍ରଶମିତ ହୋଇଛି; ହେଲେ ଚାଷୀର ଦୁଃଖ କେହି ବୁଝିଲେନି, ଅଥଚ ସେମାନେ ହେଲେ ଆମ ବ୍ୟବସ୍ଥାର ମେରୁଦଣ୍ଡ।

Comments are closed.