ନୂଆଦିଲ୍ଲୀ: ମହାରାଷ୍ଟ୍ରର ପୂର୍ବତନ ଗୃହମନ୍ତ୍ରୀ ଅନିଲ ଦେଶମୁଖଙ୍କ ବିରୋଧରେ ପ୍ରବର୍ତ୍ତନ ନିର୍ଦେଶାଳୟ (ଇଡି) ଏକ ମାମଲା ରୁଜୁ କରିଛି। ଦେଶମୁଖଙ୍କ ବିରୋଧରେ କେନ୍ଦ୍ରୀୟ ତଦନ୍ତ ବ୍ୟୁରୋ (ସିବିଆଇ) ରୁଜୁ କରିଥିବା ଦୁର୍ନୀତି ମାମଲାକୁ ଆଧାର କରି ଇଡି ପକ୍ଷରୁ ଆର୍ଥିକ ଅନିୟମିତତା ନରୋଧୀ ଆଇନ (ପିଏମଏଲଏ) ଅଧୀନରେ ପ୍ରବର୍ତ୍ତନ ମାମଲା ସୂଚନା ରିପୋର୍ଟ (ଇସିଆଇଆର) ରୁଜୁ କରାଯାଇଛି।
ସିବିଆଇ ପକ୍ଷରୁ କୁହାଯାଇଛି ଯେ, ଦେଶମୁଖ ନିଜକୁ ଫାଇଦାରେ ରଖିବା ଲାଗି ପଦବୀର ଅପବ୍ୟବହାର କରି ମୁମ୍ବଇ ପୁଲିସ କର୍ମଚାରୀଙ୍କୁ ପ୍ରଭାବିତ କରିବା ସହିତ ସେମାନଙ୍କ ବଦଳି କରୁଥିବା ନେଇ ପୂର୍ବତନ ମୁମ୍ବଇ ପୁଲିସ କମିଶନର ପରମବୀର ସଂହି ଅଭିଯୋଗ କରିଥିଲେ। ଏ ନେଇ ସିବିଆଇ ଦେଶମୁଖଙ୍କ ବିରୋଧରେ ଏକ ମାମଲା ରୁଜୁ କରିଛି। ଦେଶମୁଖଙ୍କ ନିର୍ଦେଶରେ ମୁମ୍ବଇର ବାର୍ ଏବଂ ରେଷ୍ଟୁରାଣ୍ଟଗୁଡ଼ିକଠାରୁ ମାସିକ ୧୦୦ କୋଟି ଟଙ୍କାର ବଟି ଆଦାୟ କରାଯାଉଥିବା ନେଇ ଅଭିଯୋଗ ହୋଇଥିବାରୁ ଇଡି ମାମଲାର ଆର୍ଥିକ ଦିଗ ଉପରେ ତଦନ୍ତ କରିବ ବୋଲି ଏହାର ଅଧିକାରୀଙ୍କ ସୂତ୍ରରୁ ସୂଚନା ମିଳିଛି।
ସୂଚନାଯୋଗ୍ୟ, ଗତ ମାର୍ଚ୍ଚ ୨୦ରେ ମୁମ୍ବଇର ପୂର୍ବତନ ପୁ-ଲିସ କମିଶନର ପରମବୀର ସିଂହ ମୁଖ୍ୟମନ୍ତ୍ରୀ ଉଦ୍ଧବ ଠାକରେଙ୍କୁ ଚିଠି ଲେଖି ଦେଶମୁଖଙ୍କ ବିରୋଧରେ ସାଂଘାତିକ ଅଭିଯୋଗ ଆଣିଥିଲେ। ଆଣ୍ଟିଲିଆ ମାମଲାରେ ଗିରଫ ହୋଇଥିବା ମୁମ୍ବଇ ପୁଲିସର ଜଣେ କର୍ମଚାରୀ ସଚିନ ୱାଜେଙ୍କୁ ଦେଶମୁଖ ମାସିକ ୧୦୦ ଟଙ୍କା ବଟି ଆଦାୟ କରିବାକୁ ନିର୍ଦେଶ ଦେଇଥିବା ପରମବୀର ସିଂହ ଅଭିଯୋଗରେ ଦର୍ଶାଇଥିଲେ। ଏ ନେଇ ବମ୍ବେ ହାଇକୋର୍ଟରେ ପରମବୀର ମାମଲା ଦାୟର କରିବା ପରେ ହାଇକୋର୍ଟ ଦେଶମୁଖଙ୍କ ବିରୋଧରେ ସିବିଆଇ ତଦନ୍ତ ପାଇଁ ନିର୍ଦେଶ ଦେଇଥିଲେ।
Comments are closed.