ଦୋଳି ଓ ମିନାବଜାର ଖୋଲିବାକୁ ମିଳୁ ଅନୁମତି

ଭୁବନେଶ୍ବର: ସରକାର କଟକଣାର ସହିତ ସାଂସ୍କୃତିକ କାର୍ଯ୍ୟକ୍ରମ, ଯାନିଯାତ୍ରା ଆଦିକୁ ଅନୁମତି ଦେଇଛନ୍ତି। ହେଲେ ଓଡ଼ିଶାର କଳା, ସଂସ୍କୃତି, ଐତିହ୍ୟ ଓ ପରମ୍ପରାକୁ ଲୋକାଭିମୁଖୀ ଏବଂ ପ୍ରସାରିତ କରୁଥିବା ଦୋଳି ଓ ମିନାବଜାରକୁ କିପରି ଉପେକ୍ଷା କରୁଛନ୍ତି ବୋଲି ଦୋଳି ଓ ମିନାବଜାର ମହାସଂଘ ଓଡ଼ିଶା ସଂଘ ପକ୍ଷରୁ ଅଭିଯୋଗ ହୋଇଛି। ସରକାର ଦୋଳି ଓ ମିନାବଜାର ଖୋଲିବାକୁ ଅନୁମତି ଦିଅନ୍ତୁ, ନଚେତ ଆମରଣ ଅନଶନ ଜାରି ରହିବ ବୋଲି ମହାସଂଘର ସଭାପତି ଅନନ୍ତ ଚରଣ ସାହୁ କହିଛନ୍ତି।


ମହାସଂଘ ପକ୍ଷରୁ ଲୋୟର ପିଏମ୍‌ଜିରେ ଅନଶନ ଜାରି ରହିଛି। ଅନଶନରେ ବିଭିନ୍ନ ଦଳର ବରିଷ୍ଠ ରାଜନେତା ସାମିଲ ହୋଇ ସଂଘର ଦାବି ପୂରଣରେ ସମର୍ଥନ ଦେଇଛନ୍ତି। ହେଲେ ସରକାର ଦାବି ପୂରଣ ନିମନ୍ତେ କୌଣସି ନିଷ୍ପତ୍ତି ‌େ‌ନଉ ନ ଥିବାରୁ ଅନଶନ ବ୍ୟାପକ କରାଯିବ ବୋଲି ମହାସଂଘ ପକ୍ଷରୁ ଚେତାବନୀ ଦିଆଯାଇଛି। ମହାସଂଘର ସୂଚନା ଅନୁସାରେ ଓଡ଼ିଶାରେ ୩୦ ଦୋଳି ବ୍ୟବସାୟୀ ଏବଂ ୫ହଜାରରୁ ଅଧିକ ମିନାବଜାର ବ୍ୟବସାୟୀ ନିଜର ବ୍ୟବସାୟ ଜାରି ରଖିଛନ୍ତି। ପାଖାପାଖି ୧୦ ହଜାରରୁ ଅଧିକ କର୍ମଚାରୀ କାର୍ଯ୍ୟରତ ଅଛନ୍ତି। କରୋନା ଦିନଠାରୁ ଆଜିପର୍ଯ୍ୟନ୍ତ ବ୍ୟବସାୟୀ ହାତ ବାନ୍ଧି ବସିଥିବାରୁ ସେମାନଙ୍କ ପରିବାର କଷ୍ଟରେ କାଳତିପାତ କରୁଛନ୍ତି। ସରକାର ଅନୁମତି ଦେଲେ କୋଭିଡ କଟକଣାର ସହିତ ଦୋଳି ଏବଂ ମିନାବଜାର ବ୍ୟବସାୟ ଚାଲିବ। ଏକ୍ଷେତ୍ରରେ ନିୟୋଜିତ ଲୋକଙ୍କୁ ରୋଜଗାର ମଳିବ। ତେଣୁ ପାତରଅନ୍ତର ନୀତି ଛାଡ଼ି ଆମକୁ ଅନୁମତି ଦିଆଯାଉ ବୋଲି ମହାସଂଘ ଦାବି କରିଛି।

Comments
Loading...