କୁକୁରର ମୂଲ୍ୟ ୬୦ ଲକ୍ଷ ଟଙ୍କା!

ଘର କିଣିବା କିମ୍ବା କାର୍‌ ସଉକ୍‌‌ରେ ଧନୀ ଲୋକଟେ ଲକ୍ଷାଧିକ ଟଙ୍କା ଅବା କୋଟିଏ ଟଙ୍କା ଖର୍ଚ୍ଚ କରିବାର ଯଥାର୍ଥ ବୁଝିହୁଏ। ଏସବୁକୁ ସେ ନିଜେ ନଚେତ୍ ତା’ ପରିବାରଲୋକ ଭୋଗ କରିବେ। ହେଲେ ନିଜ ଆଭିଜାତ୍ୟର ପରିଚୟ ଦେବା ପାଇଁ ଯେ ଧନୀ ଗୋଷ୍ଠୀ ୬୦ ଲକ୍ଷ ଅବା ୨କୋଟି ଟଙ୍କା ଦେଇ କୁକୁର ଛୁଆ କିଣୁଛନ୍ତି, ତାହା ଅଧିକାଂଶ ଜାଣିନଥିବେ। ବିଦେଶୀ ନୁହେଁ, ଆମ ଭାରତୀୟମାନେ ମଧ୍ୟ ଏଇ ତାଲିକାରେ ସାମିଲ ଅଛନ୍ତି। ବିଶ୍ବର ସବୁଠୁ ମହଙ୍ଗା କୁକୁର ପ୍ରଜାତି ଭାବେ ‘ତିବେତିଆନ୍ ମସ୍ତିଫ୍’ ଜଣାଯାଏ। ଚୀନ୍‌‌ ଜଳବାୟୁରେ ଭଲରେ ବଢ଼ୁଥିବା ଏହି ପ୍ରଜାତିର କୁକୁରଙ୍କ ଆୟୁ ୧୦-୧୪ ବର୍ଷ ମଧ୍ୟରେ, ସାଧାରଣ ବର୍ଗର ଲୋକ ମସ୍ତିଫ୍ ଜାତିର କୁକୁରଙ୍କ ଲାଳନପାଳନ ସମ୍ପର୍କରେ ଭାବିବା ମଧ୍ୟ ବିପଦ। କିଛି ବର୍ଷ ତଳେ ବେଙ୍ଗାଲୁରୁର ଜଣେ ବ୍ୟବସାୟୀ ୬୦ ଲକ୍ଷ ଟଙ୍କାରେ ଏଇ ପ୍ରଜାତି କୁକୁର ଆଣି ଚର୍ଚ୍ଚାକୁ ଆସିଥିଲେ। ଏଇ କୁକୁର ଆକାରରେ ବଡ଼ ହେବା ସହ ଖୁବ୍ ହିଂସ୍ର, ପ୍ରଶିକ୍ଷକଙ୍କ ପାଖେ ଏମାନେ ତାଲିମ ନେବା ଜରୁରୀ। ଚୀନ୍‌ରେ ଶିଳ୍ପପତିମାନେ ୧୦-୧୨ଟି ତିବେତିଆନ୍ ମସ୍ତିଫ୍ କୁକୁର ରଖି ନିଜ ଆଭିଜାତ୍ୟର ପରିଚୟ ଦେଉଥିବାବେଳେ କୁକୁରର ଆକାର ପାଇଁ ଆମେରିକାରେ କେତେକ ପ୍ରାନ୍ତରେ ଏଇ କୁକୁର ନ ରଖିବାକୁ କଡ଼ା ନିୟମ ରହିଛି। ତିବେତିଆନ୍ ମସ୍ତିଫ୍ ଅନ୍ୟ ପୋଷା କୁକୁରଙ୍କ ପରି ରନ୍ଧା ଖାଦ୍ୟ ଖାଇନଥାନ୍ତି। ଏମାନଙ୍କ ପାଇଁ ସ୍ବତନ୍ତ୍ର ଡବା ଖାଦ୍ୟ ମିଳେ, ଯାହାର ମୂଲ୍ୟ ମାସିକ ୭୦-୮୦ହଜାର ଟଙ୍କା। ଧନୀ ମାଲିକମାନେ ତାଙ୍କ ପ୍ରିୟ କୁକୁର ପାଇଁ ଏସବୁ ଖର୍ଚ୍ଚ କରିବାରେ ଆଦୌ ମନ ଊଣା କରିନଥାନ୍ତି। ଚୀନ୍‌‌ରେ ଧନୀ ଲୋକଙ୍କ ପରିଚୟ ହେଉଛି ତିବେତିଆନ୍ ମସ୍ତିଫ୍ କୁକୁର।

Comments
Loading...