ଲାଞ୍ଜିଗଡ଼ : କଳାହାଣ୍ଡି ଜିଲ୍ଲା ଲାଞ୍ଜିଗଡ଼ ବ୍ଲକର ଲାଞ୍ଜିଗଡ଼ ସହରରୁ ଜଗନ୍ନାଥପୁରକୁ ସଂଯୋଗ କରୁଥିବା ରାସ୍ତା ସଂକୀର୍ଣ୍ଣ ତଥା ଖାଲଖମାରେ ଭର୍ତ୍ତି ହୋଇ ଥିବାବେଳେ ଏହି ରାସ୍ତାରେ ନିତିଦିନ ଦୁର୍ଘଟଣା ଘଟି ଧନଜୀବନ ହାନି ହେଉଛି । ସେହିପରି ଗତକାଲି ଜଗନ୍ନାଥପୁର ପମ୍ପ ହାଉସ ନିକଟରେ ଜଣେ ସ୍କୁଟି ଆରୋହୀଙ୍କ ମୃତ୍ୟୁ ଘଟିଥିବାବେଳେ ପୂର୍ବରୁ ଜଗନ୍ନାଥପୁର ଗାଁର ଦଶରୁ ଅଧିକ ଲୋକେ ଆହତ ହୋଇଛନ୍ତି । ତେବେ ପ୍ରଶାସନ ନିକଟରେ ରାସ୍ତା ନିର୍ମାଣ ସହିତ ଏହାକୁ ଚଉଡା ବୃଦ୍ଧି ପାଇଁ ବାରମ୍ବାର ଅଭିଯୋଗ କରାଯାଉଥିଲେ ହେଁ କୌଣସି ସୁଫଳ ମିଳିନାହିଁ । ଏହାକୁ ନେଇ ଜଗନ୍ନାଥପୁର ଗ୍ରାମବାସୀ ଗଭୀର କ୍ଷୋଭ ପ୍ରକାଶ କରିବା ସହିତ ରବିବାର ଜଗନ୍ନାଥପୁର ତିନିଛକ ନିକଟରେ ଚଉଡା ରାସ୍ତା ନିର୍ମାଣ ଦାବିରେ ରାସ୍ତା ଅବରୋଧ କରିଥିଲେ। ସକାଳୁ ରାସ୍ତା ଅବରୋଧ କରାଯିବା ଫଳରେ ଏହି ରାସ୍ତା ଦେଇ ଯାତାୟତ କରିବା ମୁସ୍କିଲ ହୋଇପଡିଥିଲା । ସେହିପରି ବଳଭଦ୍ରପୁର, ବିଜେପୁର, ତ୍ରିଲୋଚନପୁରକୁ ମଧ୍ୟ ଯାତାୟତ ଠପ୍ ହୋଇଯାଇଥିଲା । ଗ୍ରାମବାସୀଙ୍କ ଧାରଣା ଓ ରାସ୍ତା ଅବରୋଧ ପରେ ଏହାର ସମାଧାନ ପାଇଁ ଲାଞ୍ଜିଗଡ ପୁଲିସ ପକ୍ଷରୁ ଉଦ୍ୟମ କରାଯାଇଥିଲେ ହେଁ ଲୋକେ ପ୍ରଶାସନ ପକ୍ଷରୁ ନିର୍ଭର ପ୍ରତିଶ୍ରୁତି ନମିଳିବା ଯାଏଁ ହଟିବେ ନାହିଁ ବୋଲି ପ୍ରକାଶ କରିଛନ୍ତି। ଗ୍ରାମବାସୀଙ୍କ ତରଫରୁ ଜିତେନ୍ଦ୍ର କୁମାର ନାଏକ, ଲକ୍ଷ୍ମୀ ଚଣ୍ଡି, ତରଣୀସେନ ନାଏକ, ହୃଷିକେଶ ନାଏକ, ସୁବାସ ଶୃଗାଳ, ମୁଗାନା ମାଝୀ, କାଳିଆ ମାଝୀ, ବିମଳ ମାଝୀ, ଧନତିରି ମାଝୀ, ଶ୍ୟାମସୁନ୍ଦର ମାଝୀ, ଭୂବନ ସୁନା, ଲକ୍ଷ୍ମଣ ନାଏକ ପ୍ରମୁଖଙ୍କ ନେତୃତ୍ୱରେ ଗ୍ରାମବାସୀ ରାସ୍ତା ଅବରୋଧ କରିଥିଲେ।
Comments are closed.