MEllora 950×100

ବାଲିର କୃତ୍ରିମ ଅଭାବ; ଅସମ୍ପୂର୍ଣ୍ଣ ଅବସ୍ଥାରେ ୧୫୭୨ ଆବାସ ଘର

ଉନ୍ନୟନମୂଳକ କାର୍ଯ୍ୟ ଠପ୍‌‌: ପିଇଓ, ଏବିଡିଓ ଏବଂ ସହକାରୀ ନିର୍ବାହୀ ଯନ୍ତ୍ରୀଙ୍କ ଦରମା ବନ୍ଦ

ହରଭଙ୍ଗା: ବାଲି ଉପରେ ବୌଦ୍ଧ ଜିଲ୍ଲା ପ୍ରଶାସନର ନାଲି ଆଖି ସମ୍ପ୍ରତି ଖଟିଖିଆ ଦିନ ମଜୁରିଆ ଶ୍ରମିକଠାରୁ ଆରମ୍ଭ କରି ଟ୍ରାକ୍ଟର ଡ୍ରାଇଭର, ଆବାସ ହିତାଧିକାରୀ ଏବଂ ଟ୍ରାକ୍ଟର, ସିମେଣ୍ଟ, ଲୁହାଛଡ ବ୍ୟବସାୟୀଙ୍କ ଉପରେ ଦାଉ ସାଜିଛି। ବାଲି ଉପରେ ରାଜସ୍ୱ ବିଭାଗ ଏବଂ ପୁଲିସର କଡା କାର୍ଯ୍ୟାନୁଷ୍ଠାନ ଭୟରେ ଏହି ବ୍ୟବସାୟରୁ ଲୋକେ ସମ୍ପୂର୍ଣ୍ଣ ମୁହଁ ଫେରାଇବାକୁ ବାଧ୍ୟ ହେଲେଣି। ଯାହାଫଳରେ ବାଲି ଭଳି ଅତ୍ୟାବଶ୍ୟକ ସାମଗ୍ରୀର କୃତ୍ରିମ ଅଭାବ ଯୋଗୁଁ ବର୍ତମାନ ହରଭଙ୍ଗା ବ୍ଲକରେ ଅସମ୍ପୂର୍ଣ୍ଣ ଅବସ୍ଥାରେ ଥିବା ୧୫୭୨ଟି ଆବାସ ଘର ସମ୍ପୂର୍ଣ୍ଣ ହେବା ଆଶା ମଉଳିଲାଣି। ଅନ୍ୟପଟେ ଆବାସ ଘର ସମ୍ପୂର୍ଣ୍ଣ ପାଇଁ ଜିଲ୍ଲାପ୍ରଶାସନର କଡା ଆଭିମୂଖ୍ୟ ଯୋଗୁଁ ହରଭଙ୍ଗା ବ୍ଲକର ୧୬ଜଣ ପଂଚାୟତ ପିଇଓ, ଜଣେ ଏବିଡିଓ ସାଙ୍ଗକୁ ଜଣେ ସହକାରୀ ନିର୍ବାହୀଯନ୍ତ୍ରୀଙ୍କ ଦରମା ବନ୍ଦ ହୋଇଥିବା ସୂଚନା ମିଳିଛି। ମାତ୍ର ଆବାସ ଘର ନିର୍ମାଣ ପାଇଁ ବାଲିର ଆବଶ୍ୟକତା ପଡୁଥିବାବେଳେ ପ୍ରଶାସନ ଏହା ଉପରେ ମଧ୍ୟ କଠୋର ନୀତି ଅବଲମ୍ବନ ଯୋଗୁଁ ଅସମ୍ପୂର୍ଣ୍ଣ ଅବସ୍ଥାରେ ରହିଥିବା ଆବାସଘର ସମ୍ପୂର୍ଣ୍ଣ ହେବା ମଧ୍ୟ ଅସମ୍ଭବ ହୋଇପଡ଼ିଛି। ଏପଟୁ ମାରିଲେ ଗୋ-ହତ୍ୟା, ସେପଟୁ ମାରିଲେ ବ୍ରହ୍ମ ହତ୍ୟା ନ୍ୟାୟରେ ବ୍ଲକ କର୍ମଚାରୀ ଦିନ ଗଣୁଥିବା ବେଳେ ଗରିବ ହିତାଧିକାରୀମାନେ ଘର ନିର୍ମାଣରୁ ବଂଚିତ ହୋଇ ଶୀତ କାକରରେ ରାତି କାଟୁଥିବା ଦେଖିବାକୁ ମିଳିଛି।

ସୂଚନା ଅନୁସାରେ, ବ୍ଲକରେ ସରସରା-୧୦୯, ତଳଗାଁ-୧୩୨, ଆଡେଣିଗଡ଼-୧୦୧, ବାମଣ୍ଡା-୧୧୧, ତିଲେଶ୍ୱର-୮୩, ବନ୍ଧାପଥର-୩୫, ବାଣିଭୂଷଣପୁର-୬୮, ହରଭଙ୍ଗା-୨୬, ବୀରନରସିଂହପୁର-୧୫୪, ଛତ୍ରଙ୍ଗ-୮୭, ଧଳପୁର-୭୬, କରଂଜକଟା-୭୦, କୁଶଙ୍ଗ-୪୧, ଲୁଣିବାହାଲ-୯୨, ମହାଲ୍ଲିକପଡ଼ା-୧୪୦, ମଥୁରା-୬୩, ପୁରୁଣାକଟକ-୮୧, ପିତାମ୍ବରପୁର-୩୮, ରାଧାନଗର-୨୨, ରାମଗଡ଼-୫୨, ସାମ୍ପୋଚ-୮୮ ଭଳି ୨୨ପଂଚାୟତରେ ୧୫୭୨ ଆବାସ ଘର ଅସମ୍ପୂର୍ଣ୍ଣ ରହିଛି। ସବୁ ଦୃଷ୍ଟିକୋଣରୁ ବାଲିର ଆବଶ୍ୟକତା ଆଜିର ସମୟରେ ଗୁରୁତ୍ୱ ରଖୁଥିବାବେଳେ ଏ ଦିଗରେ ରାଜସ୍ୱ ବିଭାଗ, ଜିଲ୍ଲାପ୍ରଶାସନ ବିଚାରବିମର୍ଷ କରି ଉଚିତ ପଦକ୍ଷେପ ଗ୍ରହଣ କରିବାକୁ ସବୁ ମହଲରୁ ଦାବୀ ଉଠୁଛି। ନଚେତ୍‌‌ ଆଗକୁ ନେଡିଗୁଡ କହୁଣିକୁ ବୋହିଯିବା ଅବସ୍ଥା ଆସିବ ବୋଲି ସାଧାରଣରେ ମତପ୍ରକାଶ ପାଉଛି। ତୁରନ୍ତ ଏ ଦିଗରେ ଜିଲ୍ଲାପାଳ ଦୃଷ୍ଟିଦେବାର ସମୟ ଆସିଛି।

Comments are closed.