ବିଲରୁ ମିଳିଲା ଯୁବକଙ୍କ ମୃତ ଦେହ; ବୀମା ପ୍ରିମିୟମ ଦେବାକୁ ଯାଇ ୨ଦିନ ହେଲା ଥିଲେ ନିଖୋଜ

ବେଲଗାଁ : ବେଲଗାଁ ଫାଣ୍ଡି ତଥା ସଇଁନ୍ତଲା ଥାନା ଅନ୍ତର୍ଗତ ନୂଆପଡା ଗ୍ରାମର ଲେମ୍ବୁ ସାହୁ ଗତ ୩୧ ତାରିଖ ପୁର୍ବାହ୍ନ ୧୧ଟାରୁ ନିଖୋଜ ଥିବା ବେଳେ ଆଜି ତାଙ୍କ ମୃତଦେହ ଘୁନସର ଗ୍ରାମ ନିକଟସ୍ଥ ଏକ ବିଲରୁ ଉଦ୍ଧାର ହୋଇଛି। ୩୧ ପୂର୍ବାହ୍ନରେ ସେ ବୀମା ପ୍ରିମିୟମ ବାନ୍ଧିବାକୁ  ଘରୁ ବାହାରିଥିଲେ।  ସେଦିନ ସେ ଘରକୁ ଆଉ ନ ଫେରିବାରୁ ପରିବାର ଲୋକେ ଖୋଜାଖୋଜି ଆରମ୍ଭ କରିଥିଲେ। ଗତକାଲି ରକ୍ତ ଛିଟା ଲଗା ତାଙ୍କର ବାଇକ ତଥା ଜୋତା ଏବଂ ଟୋପି ଗ୍ରାମରୁ କିଛି ଦୂର ଘୁନସର କଲେଜ ନିକଟସ୍ଥ ରାସ୍ତା କଡ ଜଙ୍ଗଲରେ ପରିବାର ଲୋକେ ଦେଖି ପୁଲିସକୁ ଜଣାଇଥିଲେ। ଲେମ୍ବୁଙ୍କୁ କେହି ହତ୍ୟା କରିଥିବା ପରିବାର ଲୋକେ ଅଭିଯୋଗ କରିଥିଲେ। ଏନେଇ ଟିଟିଲାଗଡ ଏସଡିପିଓ ସୁରେନ୍ଦ୍ରନାଥ ଶତପଥି, ସଇଁନ୍ତଲା ଥାନା ଆଇଆଇସି ବାରିଣୀ ଦାଶ, ବେଲଗାଁ ପୁଲିସ ଅଧିକାରୀ ଅନାଦି ମଟାରି, ବଡମାଲ ପୁଲିସ ଅଧିକାରୀ କୁନୁ ସାହୁ, ବଲାଙ୍ଗିର ସାଇନ୍ଟିଫିକ ଟିମ, ସନ୍ଧାନୀ କୁକୁର, ସଇଁନ୍ତଲା ଅଗ୍ନିଶମ ବିଭାଗ କର୍ମଚାରୀ ପୀଡିତ ପରିବାର ଲୋକ ତଥା ଗ୍ରାମବାସୀଙ୍କ ସହଯୋଗରେ ଖୋଜାଖୋଜି ସହ ତଦନ୍ତ ଜୋରଦାର କରିଥିଲେ। ରାତି ସାରା ପୁଲିସ ଅନୁସନ୍ଧାନ ଜାରି ରଖିଥିବା ବେଳେ ଆଜି ତାଙ୍କ ମୃତଦେହ ଏକ ଚାଷ ଜମିରେ ପଡିଥିବା ପରିବାର ଲୋକେ ଚିହ୍ନଟ କରିଥିଲେ। ଦୀର୍ଘ ସମୟ ଧରି ଚାଷ ଜମି ପାଣିରେ ମୃତଦେହ ପଡିରହିଥିବା ଯୋଗୁଁ ପଚି ଯାଇଥିବା ଜଣାଯାଇଛି। ଏନେଇ ପୁଲିସ ମୃତଦେହ ଜବତ କରିବା ସହ ଅଧିକ ତଦନ୍ତ ଜାରି ରଖିଛି। ଅନ୍ୟପକ୍ଷରେ ଘଟଣାର ପୃଷ୍ଠଭୂମି ଏବଂ ପରିବାର ଲୋକଙ୍କ ଅଭିଯୋଗ କ୍ରମେ ପୁଲିସ କିଛି ସନ୍ଦିଗ୍ଧଙ୍କୁ ନେଇ ଖୋଲତାଡ ଜୋରଦାର କରିଥିବା ଟିଟିଲାଗଡ ଏସଡିପିଓ ଶ୍ରୀ ଶତପଥି କହିଛନ୍ତି। ଏନେଇ ଦୋଷୀଙ୍କୁ ଗିରଫ ସହ କଠୋର ଦଣ୍ଡ ଦେବାକୁ ଗ୍ରାମବାସୀ ତଥା ପରିବାରବର୍ଗ ମହଲରେ ଦାବି ହୋଇଛି।

Comments
Loading...