MEllora 950×100

ମଧୁସ୍ମୃତି ସୁରକ୍ଷା ମଞ୍ଚର ନିତ୍ୟ ପୂଜ୍ୟପୂଜାର ୮୫ ଦିନ ପୂର୍ତ୍ତି

 ମୃତ୍ୟୁ ପରେ ବି ଅବହେଳିତ ମଧୁସୂଦନ: ପ୍ରତିଭା ରାୟ

କଟକ: ଖାଲି ଜୀବିତ ଅବସ୍ଥାରେ ନୁହେଁ, ମୃତ୍ୟୁ ପରେ ବି ଅବହେଳିତ ଅବସ୍ଥାରେ ରହିଛନ୍ତି ଉତ୍କଳ ଗୌରବ ମଧୁସୂଦନ ଦାସ । ନବ ଉତ୍କଳ ନିର୍ମାଣରେ ତାଙ୍କର ପ୍ରମୁଖ ଭୂମିକା ରହିଥିଲେ ମଧ୍ୟ ଏ ଜାତି ଆଜି ବି ତାଙ୍କ ମହତ୍ତ୍ୱକୁ ସଠିକ୍‌ ଭାବେ ବୁଝି ପାରିନି । ଏପରିକି ଗୋରାକବର ସ୍ଥିତ ତାଙ୍କ ଶେଷ ବିଶ୍ରାମ ସ୍ଥଳଟି ପ୍ରଶାସନିକ ଦୃଷ୍ଟି ଆଢ଼ୁଆଳରେ ରହିଅଛି ବୋଲି କହିଛନ୍ତି ବିଶିଷ୍ଟ ଔପନ୍ୟାସିକା ପଦ୍ମଭୂଷଣ ଡ. ପ୍ରତିଭା ରାୟ । ମଧୁସ୍ମୃତି ସୁରକ୍ଷା ମଞ୍ଚ ପକ୍ଷରୁ ମଧୁବାବୁଙ୍କ ସମାଧି ପୀଠରେ ଅନୁଷ୍ଠିତ ନିତ୍ୟ ପୂଜ୍ୟପୂଜାର ଆଜି ୮୫ ତମ ଦିନରେ ଯୋଗ ଦେଇ ଡ. ରାୟ ଏଭଳି ଅସନ୍ତୋଷ ବ୍ୟକ୍ତ କରିଛନ୍ତି ।

ମଧୁବାବୁ ଏ ଜାତିର କୁଳବୁଦ୍ଧ । ତାଙ୍କ ସମାଧି ପୀଠରେ ପ୍ରତିଦିନ ଶ୍ରଦ୍ଧାଞ୍ଜଳି ଅର୍ପଣ ଖୁସିର କଥା । ତେବେ ସ୍କୁଲ ଛାତ୍ରଛାତ୍ରୀଙ୍କୁ ମଧୁବାବୁଙ୍କ ଆଦର୍ଶରେ ଅନୁପ୍ରାଣିତ କରିବାର ଆବଶ୍ୟକ ରହିଛି । ପ୍ରତ୍ୟେକ ସ୍କୁଲର ଛାତ୍ରଛାତ୍ରୀ ଅନ୍ତତଃ ମାସକୁ ୨ଥର ଏହି ସମାଧି ପୀଠକୁ ବୁଲିୁ ଆସିବା ସହ ଶ୍ରଦ୍ଧାଞ୍ଜଳି ଅର୍ପଣ କରିବା ଦରକାର । ଯାହାଫଳରେ ପିଲାମାନଙ୍କ ମଧ୍ୟରେ ପୂଜ୍ୟପୂଜାର ନୂଆ ପରମ୍ପରା ସୃଷ୍ଟି କରାଯାଇପାରିବ ବୋଲି ସେ  କହିଛନ୍ତି ।

ଏହି ଅବସରରେ ଡ. ରାୟ ମଧୁବାବୁଙ୍କ ସମାଧି ପୀଠରେ ଶ୍ରଦ୍ଧାସୁମନ ଅର୍ପଣ କରିଥିଲେ । ସେହିପରି ସମାଧି ପୀଠର ଉନ୍ନତିକରଣ ସଂପର୍କରେ ସେ ଆଜି ସିଏମ୍‌ସି ମେୟର ସୁବାସ ସିଂହଙ୍କ ସହ ଫୋନ୍‌ ଯୋଗେ ଆଲୋଚନା କରିଥିଲେ । ଆସନ୍ତା ଫେବ୍ରୁଆରୀ ପୂର୍ବରୁ ଟେଣ୍ଡର କରାଯାଇ ସାମାଧି ପୀଠର ଉନ୍ନତିକରଣ କାର୍ଯ୍ୟ ଆରମ୍ଭ କରାଯିବ ବୋଲି ମେୟର ଶ୍ରୀ ସିଂହ ତାଙ୍କୁ ଅବଗତ କରାଇଥିଲେ ।

ସନ୍ତୋଷ ମହାରଣା, ଆଇନଜୀବୀ ଜଗନ୍ନାଥ ମହାନ୍ତି, ସ୍ଥାନୀୟ କର୍ପୋରେଟର ଲକ୍ଷ୍ମୀପ୍ରିୟା ବେହେରା, ତାପସ ମହାନ୍ତି, ସତ୍ୟଜିତ ଗୋସ୍ୱାମୀ, ଆକାଶ ପଟ୍ଟନାୟକ, କବିନ୍ଦ୍ର ବେହେରା,  ଜ୍ଞାନ ରଞ୍ଜନ ବେହେରା, ପ୍ରଦେଶ କୁମାରୀ ମହାରଣା, ଡା. ରବିରଞ୍ଜନ ସାହୁ, ଦେବାଶିଷ ସାମନ୍ତରାୟ, ପ୍ରକାଶ ପଣ୍ଡା, ଅକ୍ଷୟ ଆଚାର୍ଯ୍ୟ, ରାକେଶ ପାତ୍ର, ଗୀତି ରଞ୍ଜନ ତ୍ରିପାଠୀ, ଚୌଧୁରୀ ଶାଶ୍ୱତ ମହାପାତ୍ର ପ୍ରମୁଖ ଉପସ୍ଥିତ ଥିଲେ ।

Comments are closed.