ଟୀକା ଆଶା ଦେଲା ରୁଷ: ୭୫୦ ଟଙ୍କାରୁ କମ୍ ମୂଲ୍ୟରେ ମିଳିବ ସ୍ପୁଟନିକ-ଭି

ମାସେ ଦୁଇମାସ ମଧ୍ୟରେ କରୋନା ଟୀକା ଉପଲବ୍ଧ ହେବ ବୋଲି ଖବର ପ୍ରଚାର ପରେ ଲୋକଙ୍କ ମଧ୍ୟରେ ବଢ଼ିଛି ଉତ୍ସୁକତା । ଟୀକା କେବେ ମିଳିବ? ଏହାର ମୂଲ୍ୟ କେତେ ହେବ? କେଉଁମାନଙ୍କୁ ପ୍ରଥମେ ମିଳିବ ? ମିଳୁଥିବା ଟୀକାର ସଫଳତା କେତେ ଆଦିକୁ ନେଇ ଲୋକଙ୍କ ମନରେ ପ୍ରଶ୍ନବାଚୀ ସୃଷ୍ଟି ହୋଇଛି । ସାରା ବିଶ୍ବର ଲୋକମାନେ ଟୀକାକୁ ଉତ୍ସୁକତାର ସହ ଚାହିଁ ରହିଛନ୍ତି । ଏପରି ସ୍ଥିତିରେ ରୁଷ ଦେଇଛି ଭଲ ଖବର । ରୁଷ ପ୍ରସ୍ତୁତ କୋଭିଡ଼ ଟୀକା ସ୍ପୁଟନିକ୍-ଭି ୯୫% ପର୍ଯ୍ୟନ୍ତ ପ୍ରଭାବଶାଳୀ ରହିବ ଏବଂ ଏହାର ମୂଲ୍ୟ ମଧ୍ୟ ଅନ୍ୟ ଟୀକାଗୁଡ଼ିକଠାରୁ କମ୍ ରହିବ ବୋଲି ସୂଚନା ମିଳିଛି । ଆନ୍ତର୍ଜାତୀୟ ବଜାର ପାଇଁ ଗୋଟିଏ ଡ଼ୋଜ ଟୀକାର ମୂଲ୍ୟ ୧୦ ଡ଼ଲାର (୭୫୦ ଟଙ୍କା)ରୁ କମ୍ ହେବ ବୋଲି ବୋଲି ରୁଷ ପକ୍ଷରୁ କୁହାଯାଇଛି । ସାର୍ସ-ସିଓଭି-୨ରୁ ଲୋକଙ୍କୁ ରକ୍ଷା ଲାଗି ଏହି ଟୀକାର ୨ଟି ଡ଼ୋଜ ନେବାକୁ ପଡ଼ିବ ଓ ହାରାହାରି ଏଥିପାଇଁ ପ୍ରତ୍ୟେକ ବ୍ୟକ୍ତିଙ୍କୁ ୧୪୮୦ ଟଙ୍କାରୁ ୧୫୦୦ ଟଙ୍କା ଖର୍ଚ କରିବାକୁ ହେବ । ଏହା ସରକାର ବହନ କରିବେ କି ବ୍ୟକ୍ତିବିଶେଷ ପ୍ରଦାନ କରିବେ ତାହା ସେହି ଦେଶର ସରକାର ନିର୍ଧାରଣ କରିବେ ।

ରୁଷ ସରକାର ନିଜ ଦେଶର ନାଗରିକଙ୍କ ପାଇଁ ମାଗଣାରେ ଟୀକା ବ୍ୟବସ୍ଥା କରିଛନ୍ତି ଏବଂ ଜାନୁଆରୀ ମାସରେ ଏହା ପ୍ରଦାନ ଆରମ୍ଭ ହେବ । ସେହିପରି ସ୍ପୁଟନିକ୍ ଭିକୁ ଜାନୁଆରୀରେ ଆନ୍ତର୍ଜାତୀୟ ବଜାରକୁ ଛଡ଼ାଯିବ । ଭାରତରେ ମଧ୍ୟ ଏହି ଟୀକା ପ୍ରସ୍ତୁତ କରାଯିବ ବୋଲି ଏହି ସୂତ୍ରରୁ ଜଣାପଡ଼ିଛି । ଉତ୍ତରପ୍ରଦେଶ ସରକାର ନିଜ ରାଜ୍ୟର କିଛି ମେଡ଼ିକାଲ କଲେଜରେ ଏହି ଟୀକାର ମାନବିକ ପରୀକ୍ଷଣ ଖୁବ୍ ଶୀଘ୍ର ଆରମ୍ଭ କରିବାକୁ ଯାଉଛନ୍ତି ।

ସୂଚନା ଅନୁସାରେ ପ୍ରଥମ ପର୍ଯ୍ୟାୟ ଟୀକା ନେବାର ୪ ସପ୍ତାହ ପରେ ଦ୍ବିତୀୟ ଟୀକା ନେବାକୁ ପଡ଼ିବ । ଏହି ଟୀକା ରୁଷର ୪୦ ହଜାରରୁ ଉର୍ଧ୍ବ ବ୍ୟକ୍ତିଙ୍କ ଉପରେ ପରୀକ୍ଷା କରାଯାଇଛି ଓ ସଫଳତା ହାର ୯୫%ରୁ ଅଧିକ ବୋଲି କୁହାଯାଇଛି ।

Comments
Loading...