ପ୍ରଧାନମନ୍ତ୍ରୀ ଆବାସ ଯୋଜନାରେ ଦୁର୍ନୀତି, ରାଜ୍ୟପାଳଙ୍କୁ ଭେଟିଲା ବିଜେପି

ରାଜ୍ୟରେ ଜାତୀୟ ଫ୍ଲାଗସିପ କାର୍ଯ୍ୟକ୍ରମ ପ୍ରଧାନମନ୍ତ୍ରୀ ଆବାସ ଯୋଜନାକୁ ସଠିକ୍‍ ଢଙ୍ଗରେ କ୍ରିୟାନ୍ୱୟନ କରାଯାଉ ନାହିଁ ବୋଲି ବିଜେପି ଅଭିଯୋଗ କରିଛି। ଏହା ବିରୁଦ୍ଧରେ ରାଜ୍ୟ ସଭାପତି ସମୀର ମହାନ୍ତିଙ୍କ ନେତୃତ୍ୱରେ ବିଜେପିର ଏକ ଉଚ୍ଚସ୍ତରୀୟ ପ୍ରତିନିଧୀ ଦଳ ମହାମାହିମ ରାଜ୍ୟପାଳଙ୍କୁ ଭେଟି ଏକ ସ୍ମାରକ ପତ୍ର ପ୍ରଦାନ କରିଛନ୍ତି। ଏହି ଅଭିଯୋଗରେ ରାଜ୍ୟର ୩୧୪ ବ୍ଲକ, ମ୍ୟୁନିସିପାଲିଟି ଏବଂ ଏନଏସିଗୁଡିକରେ ପକ୍କା ଘର ଯୋଗାଇ ଦେବାରେ ବ୍ୟାପକ ଦୁର୍ନୀତି ଓ ଭ୍ରଷ୍ଟାଚାର ଚାଲିଥିବା କୁହାଯାଇଛି।

ଶାସକ ବିଜେଡିର ବିଧାୟକ ଓ ନେତାମାନେ ହିତାଧିକାରୀମାନଙ୍କ ଠାରୁ ୨୦-୨୫ ହଜାର ଟଙ୍କା ଆଦାୟ କରୁଛନ୍ତି। ପ୍ରଥମ କିସ୍ତିର ଅର୍ଥକୁ ଶାସକ ଦଳର ନେତାମାନେ ପିସି ଆକାରରେ ନେଉଥିବାରୁ ଗରିବ ଯୋଗ୍ୟ ହିତାଧିକାରୀ ଘର କରିପାରୁ ନାହିଁ। ପ୍ରଧାନମନ୍ତ୍ରୀ ଆବାସ ଯୋଜନାର ଯୋଗ୍ୟ ହିତାଧିକାରୀଙ୍କ ତାଲିକା ୨୦୧୧ ଜନଗଣନା ଅନୁଯାୟୀ ହୋଇଥିବାବେଳେ ଶାସକ ଦଳର ଅଯୋଗ୍ୟ ହିତାଧିକାରୀଙ୍କୁ ଏହି ତାଲିକାରେ ପଛରେ ସାମିଲ କରାଯାଇଥିଲା। ୨୦୧୯ରେ ଏହା ବିରୁଦ୍ଧରେ ବିଜେପି ପ୍ରତିବାଦ କରିବା ଯୋଗୁଁ ରାଜ୍ୟସରକାର ସମସ୍ତ ବ୍ଲକ ଅଫିସରେ ସାନି ଆବେଦନ ପାଇଁ ନୋଟିସ ଜାରି କରିଥିଲେ। ଫେବୃଆରୀ ୨୦୨୦ ସୁଦ୍ଧା ଆବେଦନ ପତ୍ର ହିତାଧିକାରୀମାନେ ଦେବା ସତ୍ୱେ ୨୦୧୯ରୁ ଗୋଟିଏ ବି ୱାର୍କ ଅର୍ଡର ଇସ୍ୟୁ କରାଯାଇନାହିଁ।

ଅନ୍ୟପକ୍ଷରେ ଦୁର୍ନୀତି ବିରୁଦ୍ଧରେ ପ୍ରତିବାଦ କରିବା ଯୋଗୁଁ ବିଜେପି କର୍ମୀମାନଙ୍କୁ ମରଣାନ୍ତକ ଆକ୍ରମଣ ସହ ହତ୍ୟା କରାଯାଉଛି ବୋଲି ବିଜେପି କହିଛି। କଟକ ଜିଲ୍ଲା ମାହାଙ୍ଗା ନିର୍ବାଚନ ମଣ୍ଡଳୀ ନୃତଙ୍ଗ ଠାରେ ବିଜେପି ନେତା କୁଳମଣି ବରାଳ ଓ ଦିବ୍ୟସିଂହ ବରାଳଙ୍କୁ ହତ୍ୟା କରାଯିବା ଘଟଣା। ବିଜେପି ନେତା କୁଳମଣି ବରାଳ ପ୍ରଧାନମନ୍ତ୍ରୀ ଆବାସ ଯୋଜନାରେ ଚାଲିଥିବା ଦୁର୍ନୀତି ବିରୁଦ୍ଧରେ ଦୃଢ ପ୍ରତିବାଦ କରିବା ଯୋଗୁଁ ଅଯୋଗ୍ୟ ହିତାଧିକାରୀଙ୍କ ନାଁ ତାଲିକାରୁ କଟାଯାଇଥିଲା ଏବଂ କିଛି ସ୍ଥାନୀୟ ସରକାରୀ ଅଧିକାରୀଙ୍କୁ ନିଲମ୍ବନ କରାଯାଇଥିଲା। ଶାସକ ଦଳ ମନ୍ତ୍ରୀ ପ୍ରତାପ ଜେନାଙ୍କ ପ୍ରରୋଚନାରେ ବିଜେଡି ଗୁଣ୍ଡାମାନେ ବିଜେପି ନେତା କୁଳମଣି ବରାଳ ଓ ଦିବ୍ୟସିଂହ ବରାଳଙ୍କୁ ହତ୍ୟା କରିଥିଲେ। ଏଭଳି ଅନେକ ଘଟଣା ରାଜ୍ୟରେ ସବୁଦିନ ଘଟୁଛି।

ପ୍ରଧାନମନ୍ତ୍ରୀ ଆବାସ ଯୋଜନାରେ ହୋଇଥିବା ପକ୍କା ଘର ଆଗରେ ବିଜୁ ପକ୍କା ଘର ଲେଖି ରାଜ୍ୟସରକାର ନିଜର ଆତ୍ମପ୍ରଚାର କରୁଛନ୍ତି। ଏହାକୁ ନେଇ ବିଭିନ୍ନ ଗାଁରେ ଆଇନ ଶୃଙ୍ଖଳା ପରିସ୍ଥିତି ବିଗିଡି ଥିଲା। ଏଣୁ ପ୍ରଧାନମନ୍ତ୍ରୀ ଆବାସ ଯୋଜନାରେ ଚାଲିଥିବା ବ୍ୟାପକ ଦୁର୍ନୀତି ବିରୁଦ୍ଧରେ ହସ୍ତକ୍ଷେପ କରିବା ନେଇ ପ୍ରତିନିଧୀ ଦଳ ମହାମାହିମ ରାଜ୍ୟପାଳଙ୍କ ଆଗରେ ଦାବି ରଖିଛି।

ଏହି ଅବସରରେ ବିରୋଧୀ ଦଳ ନେତା ପ୍ରଦୀପ୍ତ ନାଏକ, ରାଷ୍ଟ୍ରୀୟ ପବକ୍ତା ସମ୍ବିତ ପାତ୍ର, ଉପନେତା ବିଷ୍ଣୁ ସୋଠି, ମୁଖ୍ୟ ସଚେତକ ମୋହନ ମାଝୀ, ବରିଷ୍ଠ ନେତା ତଥା ବିଧାୟକ ଜୟନାରାୟଣ ମିଶ୍ର, ସୁବାଷ ପାଣିଗ୍ରାହୀ, ଗଣେଶ ରାମ ଖୁଂଟିଆ, ଭବାନୀ ଭୋଇ, କୁସୁମ ଟେଟେ, ଲଲିତେନ୍ଦୁ ବିଦ୍ୟାଧର ମହାପାତ୍ର, ନାଉରୀ ନାୟକ, ବୁର୍ଦ୍ଧାନ ମୁର୍ମୁ, ଆଦିତ୍ୟ ମାଢୀ, ସୁକାନ୍ତ ନାୟକ, ପ୍ରକାଶ ସୋରେନ୍‍, ରାଜ୍ୟ ସାଧାରଣ ସଂପାଦିକା ଡ. ଲେଖାଶ୍ରୀ ସାମନ୍ତସିଂହାର, ମୁଖପାତ୍ର ଠାକୁର ରଂଜିତ ଦାସ ପ୍ରମୁଖ ଉପସ୍ଥିତ ଥିଲେ।

Comments
Loading...