ଭୁବନେଶ୍ୱର: ଜନଜାତି ଉନ୍ନୟନ ସେବା ନିଗମ ଲିଃ (ଟିଡିସିସି) ସୁନ୍ଦରଗଡ ଜିଲା ପରିଚାଳକ ଜୟପ୍ରକାଶ ମହାନ୍ତିଙ୍କୁ ରାଉରକେଲା ମଣ୍ଡଳ ଦୁର୍ନୀତି ନିବାରଣ ଅଧିକାରୀ ଅଟକ ରଖିଛନ୍ତି। ତାଙ୍କ ନିକଟରୁ ୧୮ଲକ୍ଷ ୮୦ ହଜାର ୫୦୦ ଟଙ୍କା ଜବତ ହୋଇଛି। ଶ୍ରୀ ମହାନ୍ତିଙ୍କ ବିରୋଧରେ ପୂର୍ବରୁ ବେଆଇନ ଅର୍ଥ ଆଦାୟ କରୁଥିବା ନେଇ ଅଭିଯୋଗ ହୋଇ ଆସୁଥିଲା। ଏହାପରଠାରୁ ଦୁର୍ନୀତି ନିବାରଣ ଅଧିକାରୀମାନେ ତାଙ୍କ ଉପରେ ନଜର ରଖିଥିଲେ।
ବୁଧବାର ସକାଳୁ ଶ୍ରୀ ମହାନ୍ତି ଉପରୋକ୍ତ ଟଙ୍କା ଧରି କାର୍ଯ୍ୟାଳୟରେ ଭଡାସୂତ୍ରରେ ଲାଗିଥିବା ଏକ ଘରୋଇ ଗାଡିରେ ସୁନ୍ଦରଗଡରୁ ଝାରସୁଗୁଡା ଅଭିମୁଖେ ଯାଉଥିଲେ। ଦୁର୍ନୀତି ନିବାରଣ ଅଧିକାରୀମାନେ ତାଙ୍କୁ ସୁନ୍ଦରଗଡ ମାସୁନିକାଣି ଟୋଲ ଗେଟରେ ଅଟକାଇ ଗାଡି ଯାଞ୍ଚ କରିଥିଲେ। ଏହି ସମୟରେ ତାଙ୍କ ନିକଟରୁ ୧୮ଲକ୍ଷ ୮୦ ହଜାର ୫୦୦ ଟଙ୍କା ଜବତ ହୋଇଥିଲା। ଏତେଗୁଡିଏ ଟଙ୍କା ସମ୍ପର୍କରେ ଶ୍ରୀ ମହାନ୍ତି କୌଣସି ସନ୍ତୋଷଜନକ ଉତ୍ତର ଦେଇ ପାରି ନ ଥିଲେ। ଏହାଛଡା ଶ୍ରୀ ମହାନ୍ତିଙ୍କ ସୁନ୍ଦରଗଡସ୍ଥିତ ସରକାରୀ ବାସଭବନ ଓ ଭୁବନେଶ୍ୱର ଧଉଳିଠାରେ ଥିବା ବାସଭବନ ଉପରେ ମଧ୍ୟ ଚଢଉ କରାଯାଇଛି। ଦୁର୍ନୀତି ନିବାରଣ ବିଭାଗ ପକ୍ଷରୁ ଶ୍ରୀ ମହାନ୍ତିଙ୍କ ବିରୋଧରେ ମାମଲା ରୁଜୁ କରାଯାଇଛି।
Comments are closed.