ଦେଶରେ କରୋନା ଭୂତାଣୁ ସଂକ୍ରମଣ ସ୍ଥିତି ନିୟନ୍ତ୍ରଣାଧିନ : ସ୍ୱାସ୍ଥ୍ୟ ମନ୍ତ୍ରଣାଳୟ

ନୂଆଦିଲ୍ଲୀ : କରୋନା ଭୂତାଣୁ ବ୍ୟାପିବା ପରେ ପରେ ଦେଶର ୩୨ଟି ରାଜ୍ୟ ସହିତ କେତେକ କେନ୍ଦ୍ରଶାସିତ ଅଞ୍ଚଳର ପ୍ରାୟ ୯,୪୦୦ରୁ ଅଧିକ ଲୋକଙ୍କୁ ଗୋଷ୍ଠୀ ପର୍ଯ୍ୟବେକ୍ଷଣରେ ରଖାଯାଇଛି ବୋଲି ସ୍ୱାସ୍ଥ୍ୟ ମନ୍ତ୍ରଣାଳୟ ପକ୍ଷରୁ କୁହାଯାଇଛି। ହଂକଂ ଏବଂ ଚୀନରୁ ଆସୁଥିବା ସମସ୍ତ ବିମାନ ସହିତ ସିଙ୍ଗାପୁର ଏବଂ ଥାଇଲାଣ୍ଡରୁ ଆସୁଥିବା ସମସ୍ତ ବିମାନ ଯାତ୍ରୀଙ୍କ ଉପରେ ସତର୍କ ଦୃଷ୍ଟି ରଖାଯାଇଛି। ସମ୍ପ୍ରତି ୨୧ଟି ବିମାନ ବନ୍ଦର, ଆର୍ନ୍ତଜାତୀୟ ସାମୁଦ୍ରିକ ବନ୍ଦର ଏବଂ ସୀମା ପାରହୋଇ ଆସୁଥିବା ସମସ୍ତ ଯାତ୍ରୀଙ୍କ ସ୍ୱାସ୍ଥ୍ୟ ଉପରେ ତୀକ୍ଷ୍ମ ନଜର ରଖାଯାଇଛି। ବର୍ତ୍ତମାନ ସୁଦ୍ଧା ୨୧ଟି ବିମାନ ବନ୍ଦରର ୧୮୧୮ଟି ବିମାନରେ ଆସିଥିବା ଅନ୍ୟୁନ ୧ଲକ୍ଷ ୯୭ହଜାର ଯାତ୍ରୀମାନଙ୍କର ସ୍ୱାସ୍ଥ୍ୟ ପରୀକ୍ଷା କରାଯାଇଛି।

କରୋନା ଭୂତାଣୁର ମୁକାବିଲା କରିବା ପାଇଁ ରାଜ୍ୟଗୁଡିକ ସମେତ ଅନ୍ୟାନ୍ୟ କେନ୍ଦ୍ରଶାସିତ ଅଞ୍ଚଳଗୁଡିକୁ ସମସ୍ତ ସମ୍ଭାବ୍ୟ ସାହାଯ୍ୟ ଯୋଗାଇ ଦିଆଯାଇଛି ବୋଲି ସ୍ବରାଷ୍ଟ୍ର ମନ୍ତ୍ରଣାଳୟ ପକ୍ଷରୁ ସୂଚନା ଦିଆଯାଇଛି। ବର୍ତ୍ତମାନ ସୁଦ୍ଧା ୧୫୧୦ଟି କରୋନା ଭୂତାଣୁର ନମୁନା ପରୀକ୍ଷା ହୋଇଥିବାବେଳେ ତନ୍ମଧ୍ୟରୁ ୧୫୦୭ଟି ନମୁନା ନେଗେଟିଭ ବାହାରିଥିବାବେଳେ କେରଳ ଅବଶିଷ୍ଟ ୩ଟି ପଜେଟିଭ ବାହାରିଥିବାର ଜଣାପଡିଛି। ଏ ନେଇ ପରିସ୍ଥିତିର ଯୁଦ୍ଧକାଳୀନ ଭିତ୍ତିରେ ମୁକାବିଲା କରାଯାଉଛି। ତେବେ ଯେକୌଣସି ପ୍ରକାର ସମ୍ଭାବ୍ୟ ପରିସ୍ଥିତିର ମୁକାବିଲା କରିବା ପାଇଁ ସମସ୍ତ ରାଜ୍ୟଗୁଡିକ ସେମାନଙ୍କର ର‍୍ୟାପିଡ ରେସପନ୍‍ ଦଳକୁ ସଜାଗ କରାଯାଇଥିବା ଜଣାପଡିଛି।