ଆଣ୍ଟିଗ୍ବା: ବିଶ୍ବବ୍ୟାପୀ କରୋନା ଭାଇରସ୍ ଆତଙ୍କ ସୃଷ୍ଟି କରିଥିବା ବେଳେ ଗୋଟିଏ ପରେ ଗୋଟିଏ କ୍ରୀଡ଼ା ପ୍ରତିଯୋଗିତା ବାତିଲ କିମ୍ବା ସ୍ଥଗିତ ରଖାଯାଉଛି। ଏହି କ୍ରମରେ ଯୋଡ଼ି ହୋଇଯାଇଛି କ୍ରିକେଟ୍ ୱେଷ୍ଟଇଣ୍ଡିଜ (ୱେଷ୍ଟଇଣ୍ଡିଜ କ୍ରିକେଟ୍ ବୋର୍ଡ)। ଆସନ୍ତା ୩୦ ଦିନ ପର୍ୟ୍ୟନ୍ତ ସବୁପ୍ରକାର କ୍ରିକେଟ୍ ଟୁର୍ଣ୍ଣାମେଣ୍ଟ ସ୍ଥଗିତ ରଖିବାକୁ ୱେଷ୍ଟଇଣ୍ଡିଜ କ୍ରିକେଟ୍ ବୋର୍ଡ ନିଷ୍ପତ୍ତି ନେଇଛି। ଡାକ୍ତରୀ ପରାମର୍ଶଦାତା କମିଟିର ସୁପାରିସ ଅନୁଯାୟୀ ସମସ୍ତ କ୍ରିକେଟ୍ ଟୁର୍ଣ୍ଣାମେଣ୍ଟକୁ ବାତିଲ କରି ଦିଆଯାଇଥିବା କ୍ରିକେଟ୍ ୱେଷ୍ଟଇଣ୍ଡିଜ ତରଫରୁ ଗଣମାଧ୍ୟମକୁ ସୂଚନା ଦିଆଯାଇଛି।
କରୋନା ଭାଇରସ୍ ସଂକ୍ରମଣ ଯୋଗୁଁ ଯେଉଁ ଅଭାବନୀୟ ପରିସ୍ଥିତି ସୃଷ୍ଟି ହୋଇଛି ସେଥିରେ କ୍ରିକେଟର୍, ଦର୍ଶକ ଓ ସପୋର୍ଟ ଷ୍ଟାଫ୍ଙ୍କ ସ୍ବାସ୍ଥ୍ୟ ପ୍ରତି ଯେପରି କୌଣସି ପ୍ରକାର କ୍ଷତି ନହୁଏ ତାହାକୁ ଦୃଷ୍ଟିରେ ରଖି ୩୦ ଦିନ ପର୍ୟ୍ୟନ୍ତ ସମସ୍ତ କ୍ରିକେଟ୍ ଟୁର୍ଣ୍ଣାମେଣ୍ଟକୁ ବାତିଲ କରିବାକୁ ନିଷ୍ପତ୍ତି ହୋଇଥିବା କ୍ରିକେଟ୍ ୱେଷ୍ଟଇଣ୍ଡିଜ୍ ଡାକ୍ତରୀ ଦଳର ମୁଖ୍ୟ ଗଣମାଧ୍ୟମକୁ ସୂଚନା ଦେଇଛନ୍ତି। କ୍ରିକେଟ୍ ୱେଷ୍ଟଇଣ୍ଡିଜର ନିଷ୍ପତ୍ତି ଫଳରେ ୧୫ ବର୍ଷରୁ କମ୍ ବାଳକ କ୍ରିକେଟ୍ ଚମ୍ପିଆନ୍ସିପ, ୧୯ ବର୍ଷରୁକମ୍ ବାଳିକା ଚମ୍ପିଆନ୍ସିପ୍ ଓ ୱେଷ୍ଟଇଣ୍ଡିଜ ଚମ୍ପିଆନ୍ସିପର ଶେଷ ଦୁଇ ପର୍ୟ୍ୟାୟ ମ୍ୟାଚ୍କୁ ବର୍ତ୍ତମାନ ପାଇଁ ବନ୍ଦ କରି ଦିଆଯାଇଛି। ଅବସ୍ଥା ସୁଧୁରିଲେ ମ୍ୟାଚ୍ ଖେଳାଯିବା ସଂପର୍କରେ ନିଷ୍ପତ୍ତି ହେବ ବୋଲି ବୋର୍ଡ ତରଫରୁ କୁହାଯାଇଛି।
Comments are closed.