ବ୍ରହ୍ମପୁର: ବ୍ରହ୍ମପୁର ରୋଟାରୀ କ୍ଲବ, ଗଞ୍ଜାମ ଚାମ୍ବର ଅଫ କମର୍ସ ଏବଂ ମାରୱାଡ଼ି ମହିଳା ସମିତି ତରଫରୁ କରୋନା ସଚେତନତା ଗାଡ଼ିର ଶୁଭାରମ୍ଭ କରାଯାଇଛି। ଶନିବାର ଠାରୁ ବାହାରିଥିବା ଏହି ଗାଡ଼ି ୨୧ ଦିନ ପର୍ଯ୍ୟନ୍ତ ବ୍ରହ୍ମପୁର ସହର ଏବଂ ଆଖାପାଖ ଅଞ୍ଚଳରେ ବୁଲିବୁଲି ଲୋକଙ୍କୁ କରୋନାର କାରଣ ଏବଂ କିପରି ଏହାଠାରୁ ଦୂରରେ ରହିପାରିବା, ସେ ନେଇ ସଚେତନତା ବାର୍ତ୍ତା ପ୍ରଦାନ କରିବ। ଗତ ବର୍ଷ ଜୁଲାଇରେ ମଧ୍ୟ ଏଭଳି ଗାଡ଼ି ଶୁଭାରମ୍ଭ ହୋଇଥିଲା। ପରିକ୍ରମା ସମୟରେ କରୋନା ବାର୍ତ୍ତା, ପ୍ରଚାରପତ୍ର, ପଞ୍ଚସୂତ୍ର, ଟେଲି ମେଡିସିନ ଯୋଗାଯୋଗ ନମ୍ବର ଏବଂ ଟିକା କେନ୍ଦ୍ର ସଂପର୍କରେ ଲୋକଙ୍କୁ ସୂଚନା ଦିଆଯିବ।
ଏହି ପ୍ରକଳ୍ପକୁ ବ୍ରହ୍ମପୁର ମହାନଗର ନିଗମ ତରଫରୁ ସହଯୋଗ ମିଳୁଛି। ସ୍ଥାନୀୟ ଏକ କଲ୍ୟାଣ ମଣ୍ଡପରେ ଆୟୋଜିତ ଏହି ଉଦ୍ଘାଟନ କାର୍ଯ୍ୟକ୍ରମରେ ରୋଟାରୀ ସଭାପତି ଟି.ପାର୍ଥସାରଥୀ ଏବଂ ସଂପାଦକ ତରୁଣ ପତାକା ଦେଖାଇ ଶୁଭାରମ୍ଭ କରିଥିଲେ। ଗଞ୍ଜାମ ଚାମ୍ବର ଅଫ କମର୍ସର ସଂପାଦକ ଭି.ସନ୍ତୋଷ କୁମାର, ମାଣୱାଡି ମହିଳା ସମିତିର ସଭାନେତ୍ରୀ ରୁବି ଖେମାନି ପ୍ରମୁଖ ଉପସ୍ଥିତ ଥିଲେ। ସକାଳ ୮ଟାରୁ ରାତି ୮ଟା ପର୍ଯ୍ୟନ୍ତ ଏହି ଗାଡ଼ି ପରିକ୍ରମା କରିବ। କରୋନା ଦ୍ବିତୀୟ ଲହରରେ ଯେଭଳି ଭାବେ ଆକ୍ରାନ୍ତଙ୍କ ସଂଖ୍ୟା ବଢ଼ିବାରେ ଲାଗିଛି, ତାହାକୁ ନେଇ ଭୟ ଦେଖାଦେଇଛି। ଏଣୁ ସମସ୍ତେ ସଚେତନ ହେବା ଆବଶ୍ୟକ ବୋଲି ଅତିଥିମାନେ ପ୍ରକାଶ କରିଥିଲେ।
Comments are closed.