କଟକଣା ସହ ଜାନୁଆରୀ ୧୧ରୁ ଖୋଲିବ ରାଜ୍ୟର କଲେଜ ଓ ବିଶ୍ବବିଦ୍ୟାଳୟ; ବିଜ୍ଞପ୍ତି ପ୍ରକାଶ କଲା ଉଚ୍ଚଶିକ୍ଷା ବିଭାଗ

ଭୁବନେଶ୍ବର: ଆସନ୍ତା ୮ ତାରିଖରେ ଖୋଲିବ ସ୍କୁଲ । ଏ ନେଇ ସରକାର ଘୋଷଣା କରିଛନ୍ତି । ଏହାପରେ ଆସନ୍ତା ୧୧ ତାରିଖରୁ ରାଜ୍ୟର ସମସ୍ତ ବିଶ୍ବବିଦ୍ୟାଳୟ ଓ କଲେଜ ଖୋଲାଯିବା ଚୂଡ଼ାନ୍ତ ହୋଇଛି । ଉଚ୍ଚଶିକ୍ଷା ବିଭାଗ ଏ ସଂକ୍ରାନ୍ତରେ ବିଜ୍ଞପ୍ତି ପ୍ରକାଶ କରିଛି ।

ବିଜ୍ଞପ୍ତି ଅନୁସାରେ ଆସନ୍ତା ଜାନୁଆରୀ ୧୧ ତାରିଖରୁ ମାର୍ଚ ୧୫ ତାରିଖ ପର୍ଯ୍ୟନ୍ତ ଉଭୟ ୟୁଜି ଓ ପିଜି କ୍ଲାସ ଚାଲିବ । ମାର୍ଚ ୧୬ ତାରିଖରୁ ୩୧ ତାରିଖ ପର୍ଯ୍ୟନ୍ତ ସେମିଷ୍ଟାର ପରୀକ୍ଷା ଅନୁଷ୍ଠିତ ହେବ । ସେମିଷ୍ଟାର ଫଳ ଏପ୍ରିଲ ୩୦ ତାରିଖ ସୁଦ୍ଧା ପ୍ରକାଶ ପାଇବ ଏବଂ ଏପ୍ରିଲ ୨ ତାରିଖରୁ ଜୁନ୍ ୧୫ ତାରିଖ ପର୍ଯ୍ୟନ୍ତ ଶେଷ ସେମିଷ୍ଟାର କ୍ଲାସ ହେବ ।

ଜୁନ ୧୬ରୁ ୩୦ ତାରିଖ ପର୍ଯ୍ୟନ୍ତ ଶେଷ ସେମିଷ୍ଟାର ପରୀକ୍ଷା କରାଯାଇ ଜୁଲାଇ ୧୫ ସୁଦ୍ଦା ଫଳାଫଳ ପ୍ରକାଶ କରାଯିବ ବୋଲି ବିଜ୍ଞପ୍ତିରେ ଉଲ୍ଲେଖ ରହିଛି । ଏହାବ୍ୟତୀତ ଜାନୁଆରୀ ୧୦ ତାରିଖରୁ ହଷ୍ଟେଲ ଖୋଲାଯିବ ଓ ହଷ୍ଟେଲରେ କୋଭିଡ଼ ମାର୍ଗଦର୍ଶିକାର ଅନୁପାଳନ କରାଯିବ ବୋଲି କୁହାଯାଇଛି ।

ୟୁଜି, ପିଜି, ଏମଫିଲ୍ ଓ ପିଏଚଡ଼ି ଛାତ୍ରଛାତ୍ରୀମାନେ ମଧ୍ୟ ହଷ୍ଟେଲରେ ରହିପାରିବେ ବୋଲି ସରକାରଙ୍କ ଦ୍ବାରା ପ୍ରକାଶିତ ବିଜ୍ଞପ୍ତିରେ ଉଲ୍ଲେଖ କରାଯାଇଛି । ଆସନ୍ତୁ ଜାଣିବା କଲେଜ ଓ ବିଶ୍ବବିଦ୍ୟାଳୟ ଖୋଲିବା ପାଇଁ କଣ ରହିଛି ମାର୍ଗଦର୍ଶିକା –

-ନିୟମିତ ବ୍ୟବଧାନରେ କ୍ଲାସ ହେବ । ଅନଲାଇନ କ୍ଲାସରେ ବଳକା ଅଧ୍ୟାୟଗୁଡ଼ିକୁ ​‌ଶେଷ କରାଯିବ । ଶ୍ରେଣୀଗୃହରେ ଶିକ୍ଷାଦାନ ସମୟରେ ପାଠକୁ ରେକର୍ଡ଼ କରାଯିବ । ଶ୍ରେଣୀଗୃହରେ କୋଭିଡ଼ ନିୟମ ଅନୁପାଳନ ହେବ । କଣ୍ଟେନମେଣ୍ଟ ଜୋନର ଶିକ୍ଷକ, କର୍ମଚାରୀ ଓ ଛାତ୍ରଛାତ୍ରୀଙ୍କୁ କଲେଜ ଆସିବା ମନା । ଫେସ ମାସ୍କ ଓ ଫେସ କଭର ବାଧ୍ୟତାମୂଳକ । ଶ୍ରେଣୀଗୃହରେ ସାମାଜିକ ଦୂରତା ସହ ବାରମ୍ବାର ହାତ ପରିଷ୍କାର ପାଇଁ ବ୍ୟବସ୍ଥା ହେବ । ପାଠାଗାର, ପରୀକ୍ଷାଗାରକୁ ବିଭକ୍ତିକରଣ କରାଯାଇ ଅଧିକ ଛାତ୍ରଛାତ୍ରୀଙ୍କୁ ଏକ ସମୟରେ ଏକାଠି ହେବାକୁ ବନ୍ଦ ରଖାଯିବ । କଲେଜ ପରିସରରେ ଛେପ ପକାଇବା ମନା ।

Comments
Loading...