ଭୁବନେଶ୍ୱର ମହାନଗର ନିଗମ ସ୍ତରୀୟ ‘ଶିକ୍ଷା ଶିଖର’ ଅନ୍‍ଲାଇନ୍‍ ସଭା

ଭୁବନେଶ୍ୱର : ଭୁବନେଶ୍ୱର ମହାନଗର ନିଗମ ସ୍ତରୀୟ ମନୋନୀତ ଉଚ୍ଚ ବିଦ୍ୟାଳୟଗୁଡ଼ିକର ପ୍ରଧାନ ଶିକ୍ଷୟିତ୍ରୀ, ଅଭିଜ୍ଞ ଶିକ୍ଷକ/ଶିକ୍ଷୟିତ୍ରୀ ଏବଂ ଆଞ୍ଚଳିକ ସାଧନ କେନ୍ଦ୍ର ସଂଯୋଜକମାନଙ୍କୁ ନେଇ ଅନ୍‍ଲାଇନ୍‍ ଗୁଗୁଲ୍‍ ମାଧ୍ୟମରେ ଏକ ସଭା ଗୁରୁବାର ଅନୁଷ୍ଠିତ ହୋଇଯାଇଛି। ଏହି କାର୍ଯ୍ୟକ୍ରମରେ ଗୋଷ୍ଠୀ ଶିକ୍ଷା ଅଧିକାରୀ ଡକ୍ଟର ସନ୍ତୋଷ କୁମାର ରାଉତ ସଭାପତିତ୍ୱ କରି ‘ଶିକ୍ଷା ଶିଖର’ କାର୍ଯ୍ୟକ୍ରମର ଆଭିମୁଖ୍ୟ ସଂପର୍କରେ ପ୍ରକାଶ କରି କହିଥିଲେ ଯେ ‘ଶିକ୍ଷା ଶିଖର’ ହେଉଛି ଖୋର୍ଦ୍ଧା ଜିଲା ଶିକ୍ଷା ଅଧିକାରୀ ବନ୍ଦନା ମହାପାତ୍ରଙ୍କ ମାନସପୁତ୍ର। ସମଗ୍ର ଖୋର୍ଦ୍ଧା ଜିଲାରେ ସମସ୍ତ ଉଚ୍ଚ ବିଦ୍ୟାଳୟ ଗୁଡ଼ିକର ମେଧାବୀ ଛାତ୍ରଛାତ୍ରୀମାନଙ୍କ ବୌଦ୍ଧିକ ବିକାଶ କରିବା ଏହାର ଲକ୍ଷ୍ୟ ରହିଛି।

ଏହି ଅନ୍‍ଲାଇନ୍‍ ଗୁଗୁଲ୍‍ ସଭାରେ ୧୦୦ରୁ ଊର୍ଦ୍ଧ୍ବ ପ୍ରଧାନ ଶିକ୍ଷକ ଓ ଶିକ୍ଷୟିତ୍ରୀ, ଅଭିଜ୍ଞ ଶିକ୍ଷକ ଓ ଶିକ୍ଷୟିତ୍ରୀ ଏବଂ ଆଞ୍ଚଳିକ ସାଧନ କେନ୍ଦ୍ର ସଂଯୋଜକ ଯୋଗଦାନ କରିଥିଲେ। ଜିଲା ଶିକ୍ଷା ଅଧିକାରୀ ବନ୍ଦନା ମହାପାତ୍ର ଏହି ଅନ୍‍ଲାଇନ୍‍ ସଭାରେ ଯୋଗ ଦେଇ ‘ଶିକ୍ଷା ଶିଖର’ ମହାନଗର ନିଗମ ଅନ୍ତର୍ଗତ ପ୍ରତ୍ୟେକ ଉଚ୍ଚ ବିଦ୍ୟାଳୟର ୧୦ମ ଶ୍ରେଣୀର ୫ଜଣ ମେଧାବୀ ଛାତ୍ରଛାତ୍ରୀମାନଙ୍କର ବୌଦ୍ଧିକ ବିକାଶ ପାଇଁ ପଦକ୍ଷେପ ନେବାକୁ ମାର୍ଗଦର୍ଶନ କରିଥିଲେ। ଏଥିପାଇଁ ମହାନଗର ନିଗମ ସ୍ତରରେ ଗୋଟିଏ ଗ୍ରୁପରେ ୫୦ରୁ ୬୦ଜଣ ଛାତ୍ରଛାତ୍ରୀଙ୍କୁ ନେଇ ୫ଟି ଗ୍ରୁପ୍‍ ଯଥା ‘ଏ, ବି, ସି, ଡି ଏବଂ ଇ’ ଗଠନ କରାଯାଇଥିଲା। ଏହାର ପ୍ରତ୍ୟେକ ଗ୍ରୁପରେ ପ୍ରଧାନ ଶିକ୍ଷକ ଶିକ୍ଷୟିତ୍ରୀମାନଙ୍କୁ ପର୍ଯ୍ୟବେକ୍ଷକ ଓ ମେଣ୍ଟର ଭାବେ ଦାୟିତ୍ୱ ଦିଆଯାଇଛି। ପ୍ରତ୍ୟହ ଅଭିଜ୍ଞ ଶିକ୍ଷକ ଓ ଶିକ୍ଷୟିତ୍ରୀମାନଙ୍କ ଦ୍ୱାରା ସେହି ଛାତ୍ରଛାତ୍ରୀମାନଙ୍କ ପାଇଁ ଅପରାହ୍ଣ ୫ଟାରୁ୭ଟା ପର୍ଯ୍ୟନ୍ତ ଅନ୍‍ଲାଇନ୍‍ କ୍ଲାସ କରାଯିବ ବୋଲି ସୂଚନା ପ୍ରଦାନ କରାଯାଇଛି।

Comments
Loading...