ଆମେ ଏକ ନୂତନ ଓ ସଶକ୍ତ ଓଡ଼ିଶା ଗଠନ ପାଇଁ ଦୃଢ଼ନିଶ୍ଚୟ, ଯାହା ଲୋକମାନଙ୍କୁ ଆଶାଆକାଂକ୍ଷାକୁ ପୂରଣ କରିବ: ମୁଖ୍ୟମନ୍ତ୍ରୀ

ଭୁବନେଶ୍ୱର : ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଓଡ଼ିଶା ବିଧାନସଭାରେ ରାଜ୍ୟପାଳ ପ୍ରଫେସର ଗଣେଶୀ ଲାଲ୍‌ଙ୍କ ଅଭିଭାଷଣ ଉପରେ ଆଗତ ଧନ୍ୟବାଦ ପ୍ରସ୍ତାବ ଅବସରରେ ବକ୍ତବ୍ୟ ରଖି କହିଛନ୍ତି ଯେ ଦୂରଦୃଷ୍ଟି ଏବଂ ବିପର୍ଯ୍ୟୟ ପରିଚାଳନା ପ୍ରସ୍ତୁତି ସହିତ ଗତବର୍ଷ ଆମ ସରକାର ଅଭୂତପୂର୍ବ କୋଭିଡ୍‌-୧୯ ସମସ୍ୟାର ମୁକାବିଲା ପାଇଁ ଅନେକ ସକ୍ରିୟ ପଦକ୍ଷେପ ନେଇଛନ୍ତି।
ମୁଖ୍ୟମନ୍ତ୍ରୀ କହିଛନ୍ତି ଯେ ରାଜ୍ୟ ସରକାର ଆବଶ୍ୟକୀୟ ହସ୍ତକ୍ଷେପ ଦ୍ୱାରା ଅର୍ଥନୀତିର ଦ୍ରୁତ ପୁନଃସ୍ଥାପନକୁ ସୁନିଶ୍ଚିତ କରିଛନ୍ତି । ଗତବର୍ଷ ୧.୨ ଲକ୍ଷ କୋଟି ଟଙ୍କାରୁ ଅଧିକ ପୁଞ୍ଜିନିବେଶ ସହିତ ଓଡ଼ିଶା ଏକ ପ୍ରମୁଖ ବିନିବେଶ ଗନ୍ତବ୍ୟସ୍ଥଳ ଭାବେ ଉଭା ହୋଇଛି ଏବଂ ଐତିହ୍ୟସ୍ଥଳୀର ବିକାଶ ଏବଂ ଲୋକସେବାରେ ରୂପାନ୍ତରଣ ପରି କାର୍ଯ୍ୟକ୍ରମ ଆରମ୍ଭ କରାଯାଇଛି ବୋଲି ସେ କହିଛନ୍ତି । ଆମେ ଏକ ନୂତନ ଓ ସଶକ୍ତ ଓଡ଼ିଶା ଗଠନ ପାଇଁ ଦୃଢ଼ନିଶ୍ଚୟ, ଯାହା ଲୋକମାନଙ୍କୁ ଆଶାଆକାଂକ୍ଷାକୁ ପୂରଣ କରିବ ଏବଂ ସେମାନଙ୍କୁ ବୃହତ ସ୍ୱପ୍ନ ଦେଖିବା ସହ ସେମାନଙ୍କ ସାମର୍ଥ୍ୟର ପରିପ୍ରକାଶ ନିମନ୍ତେ ସୁଯୋଗ ଦେବ ।

ଅନ୍ତର୍ଜାତୀୟ ମାତୃଭାଷା ଦିବସ ଅବସରରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କହିଛନ୍ତି ଯେ ସଂସ୍କୃତି ଓ ଐତିହ୍ୟକୁ ସୁରକ୍ଷିତ ରଖିବା ସହ ଏହାର ବ୍ୟାପକ ପ୍ରସାରରେ ମାତୃଭାଷାର ବଳିଷ୍ଠ ଭୂମିକା ରହିଛି। ଆମ ଓଡ଼ିଆ ଭାଷାକୁ ସମୃଦ୍ଧ କରିବା ଦିଗରେ ଅତୁଳନୀୟ ଅବଦାନ ଥିବା ମହାପୁରୁଷମାନଙ୍କୁ ସ୍ମରଣ କରି ମାତୃଭାଷାକୁ କାଳଜୟୀ କରିବା ଦିଗରେ ଆମର ଉଦ୍ୟମକୁ ଆହୁରି ଦୃଢ଼ କରିବା ପାଇଁ ସେ ଆହ୍ୱାନ ଦେଇଛନ୍ତି । ଫେବୃଆରୀ ୨୦ ତାରିଖ ସୁଦ୍ଧା ୮୨ ପ୍ରତିଶତ ଟୀକାକରଣ ସଂପାଦନ କରି କୋଭିଡ୍‌-୧୯ ଟୀକା ପ୍ରଦାନକାରୀ ଶ୍ରେଷ୍ଠ ତିନିଟି ରାଜ୍ୟ ମଧ୍ୟରେ ଓଡ଼ିଶା ସ୍ଥାନ ପାଇଥିବାରୁ ମୁଖ୍ୟମନ୍ତ୍ରୀ ସନ୍ତୋଷ ବ୍ୟକ୍ତ କରିଛନ୍ତି। ଟୀକାକରଣର ଗୁରୁତ୍ୱ ଓ ସଚେତନତାର ବାର୍ତ୍ତା ପ୍ରସାର କରିଥିବା ସମସ୍ତ ଆଗଧାଡ଼ିର କୋଭିଡ୍‌ ଯୋଦ୍ଧାଙ୍କୁ ସେ ଧନ୍ୟବାଦ ଜଣାଇଛନ୍ତି ।