ରାସ୍ତା ପାଲଟିଛି ମରଣ ଯନ୍ତା, ମରାମତି ପାଇଁ ଦାବିି

ଚୌଦ୍ୱାର: ଚୌଦ୍ୱାର-ଚାରବାଟିଆ ରାସ୍ତାର କଳିଙ୍ଗ ଛକ ଠାରେ ରାସ୍ତା ଅବସ୍ଥା ଶୋଚନୀୟ ହୋଇ ପଡ଼ିବା ସହିତ ମରଣଯନ୍ତା ପଲଟିଛି। ଆଜକୁ ପ୍ରାୟ ଏକମାସ ହେବ ଜାତୀୟ ରାଜପଥ ଓ ଚାରବାଟଇଆ ରାସ୍ତାର ସଂଯୋଗସ୍ଥଳରେ ଆଣ୍ଠୁୁଏ ଗଭିରର ବଡ଼ ଗର୍ତ୍ତ ସୃଷ୍ଠି ହୋଇଛି। ସେଥିରେ ଜନସ୍ୱାସ୍ଥ୍ୟ ପାଇପ୍‍ରୁ ପାଣି ପଶିବା ସହିତ ପାଖ ଡ୍ରେନ୍‍ର ପାଣି ଗାଢ଼ରେ ପଶି ଜମି ରହି ପୋଖରୀ ସୃଷ୍ଠି ହେଲାଣି। ଏହି ରାସ୍ତାରେ ଚୌଦ୍ୱାର ସର୍କଲ ଜେଲ, ପ୍ରତିରକ୍ଷା ବିଭାଗର ଏଆରସି, ଇଏସ୍‍ଆଇ ହସପିଟାଲ ଆଦି ଗୁରୁତ୍ୱପୂର୍ଣ୍ଣ ଅନୁଷ୍ଠାନ ସବୁ ରହିଥିବା ବେଳେ ଚୌଦ୍ୱାର ସହର ତଥା ଗ୍ରାମାଞ୍ଚଳର ଅନ୍ୟୁନ ୧୦ଟି ପଞ୍ଚାୟତର ହଜାର ହଜାର ସଂଖ୍ୟାରେ ଲୋକ ପ୍ରତିଦିନ ଏହି ରାସ୍ତାରେ ଯାତାୟତ କରିଥାନ୍ତି। ଏଥି ସହିତ ସ୍ଥାନୀୟ ଇମ୍ଫା କାରଖାନାକୁ ପ୍ରତିଦିନ ଶହଶହ ସଂଖ୍ୟାରେ ଟ୍ରକ୍‍ ଏହି ରାସ୍ତାରେ ଯାତାୟତ କରୁଛନ୍ତି।

ରାସ୍ତା ଉପରେ ସୃଷ୍ଠି ହୋଇଥିବା ଏହି କୃତ୍ରିମ ପୋଖରୀରେ ପଡ଼ି ପ୍ରତିଦିନ ବହୁ ସଂଖ୍ୟକ ପଥଚାରୀ ଆହତ ହୋଇ ଲହୁ ଲୁହାଣ ହେବା ସହିତ ଗାଡ଼ି ମଟର ସବୁ ଜଖମ ହେଉଛନ୍ତି। ଏହି ରାସ୍ତାଟିର ମରାମତି ପାଇଁ ନାଁ ବିଭାଗୀୟ କତ୍ତୃପକ୍ଷ ନାଁ ପୌରପ୍ରଶାସନ ପଦକ୍ଷେପ ନେଉଛନ୍ତି। ଫଳରେ ସ୍ଥାନୀୟ ଲୋକେ ନାହିଁ ନଥିବା ସଂକଟର ସମ୍ମୁଖୀନ ହେଉଛନ୍ତି। ସମସ୍ୟା ଅସହ୍ୟ ହେବାରୁ ଶେଷରେ ଚୌଦ୍ୱାର ସଚେତନ ନାଗରିକ ମଞ୍ଚ ତରଫରୁ ପ୍ରତିବାଦର ସ୍ୱର ଉଠିଛି। ରାସ୍ତାର ତୁରନ୍ତ ମରାମତି ପାଇଁ ମଞ୍ଚ ତରଫରୁ ଆର ଏଣ୍ଡ ବି ନିର୍ବାହୀ ଯନ୍ତ୍ରୀ,ଚୌଦ୍ୱାର ଥାନା ଆଇଆଇସି, ପୌର ନିର୍ବାହୀ ଅଧିକାରୀ ପ୍ରମୁଖଙ୍କୁ ଦାବିପତ୍ର ପ୍ରଦାନ କରିଛନ୍ତି।ତୁରନ୍ତ ରାସ୍ତା ମରାମତି ନହେଲେ ଚୌଦ୍ୱାରବାସୀ ଆନ୍ଦୋଳନକୁ ଓହ୍ଲାଇବେ ବୋଲି ଚେତାବନୀ ଦେଇଛନ୍ତି।

Comments
Loading...