ଚୌଦ୍ୱାରରେ ଜନ୍ମାଷ୍ଟମୀ ମହୋତ୍ସବ ପାଳିତ

ଚୌଦ୍ୱାର: ଚୌଦ୍ୱାର ସହର ଓ ଏହାର ଆଖପାଖ ଗ୍ରାମାଞ୍ଚଳରେ ପବିତ୍ର ଜନ୍ମାଷ୍ଟମୀ ମହୋତ୍ସବ ଧୁମଧାମରେ ପାଳିତ ହୋଇଛି  । ପୌରପାଳିକା ୭ନମ୍ବର ୱାର୍ଡ ଓଟିଏମ୍‌ କଲୋନୀସ୍ଥିତ ନାରାୟଣ ମନ୍ଦିରରେ ପୂଜାର୍ଚ୍ଚନା ପାଇଁ ସାରାଦିନ ବ୍ୟାପି ଶ୍ରଦ୍ଧାଳୁମାନଙ୍କ ଭିଡ଼ ଲାଗି ରହିଥିଲା  । ସଂଧ୍ୟାରେ ଭଜନ ସମାରୋହ ସହିତ ଆୟୋଜିତ ଆନନ୍ଦ ବଜାରରେ ହଜାର ହଜାର ସଂଖ୍ୟାରେ ଭକ୍ତ ଯୋଗ ଦେଇଥିଲେ  । ସେହିପରି କଳିଙ୍ଗ ଛକ ସ୍ଥିତ ଲକ୍ଷ୍ମୀନାରାୟଣ ମନ୍ଦିରରେ ଶ୍ରଦ୍ଧାଳୁ ମାନଙ୍କ ଭିଡ଼ ଜମିବା ସହିତ ସାରାଦିନ ବ୍ୟାପି ନାମ ସଂକୀର୍ତ୍ତନ, ଭଜନ ସମାରୋହ ଓ ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା  । ଆଗ୍ରାହାଟ ସ୍ଥିତ ମାଧବ ମନ୍ଦିରରେ କୃଷ୍ଣ ଜନ୍ମାଷ୍ଟମୀ ଜାକଜମକରେ ପାଳିତ ହୋଇଛି  ।

ଏହି ଉପଲକ୍ଷେ ବିବେକାନନ୍ଦ ଶିଶୁ ବିଦ୍ୟାମନ୍ଦିର ତରଫରୁ ବଡ଼ବଜାର ସ୍ଥିତ ସତ୍ୟ ନାରାୟଣ ପୂଜା ମଣ୍ଡପରେ ଏକ ସାଂସ୍କୃତିକ ଉତ୍ସବ ଅନୁଷ୍ଠିତ ହୋଇଥିଲା  । ଅନୁଷ୍ଠାନର ମୁଖ୍ୟ ମାନସ କୁମାର ସାହୁଙ୍କ ପୌରୋହିତ୍ୟରେ ଆୟୋଜିତ ଏହି କାର୍ଯ୍ୟକ୍ରମରେ ପଦ୍ମଶ୍ରୀ ଡ. ଉଚ୍ଛବ ଚରଣ ଦାସ, ବ୍ଲକ୍‌ ଏବିଇଓ ନମିତାରାଣୀ ଉତ୍ତରରାୟ, ପାଲାକାର ସିଦ୍ଧେଶ୍ୱର ନାୟକ, କାଉନସିଲର ଅଜୟ କୁମାର ବେହେରା ପ୍ରମୁଖ ଅତିଥି ଭାବେ ଯୋଗଦେଇଥିଲେ  । ଏହି ଅବସରରେ କବି ଅନାମ ଚରଣ ବେହେରାଙ୍କ ରଚିତ କବିତା ସଂକଳନ ‘ଝରାଫୁଲ’ ଉନ୍ମୋଚିତ ହୋଇଥିଲା  ।

ଆୟୋଜିତ ବିଭିନ୍ନ ପ୍ରତିଯୋଗିତାରେ କୃତି ଛାତ୍ରଛାତ୍ରୀଙ୍କୁ ଅତିଥି ମାନେ ପୁରସ୍କାର ଦେଇଥିଲେ  । ପ୍ରଧାନ ଆଚାର୍ଯ୍ୟା ଗାୟତ୍ରୀ ସାହୁ ସ୍ୱାଗତ ଭାଷଣ ଓ ରାଜେଶ କୁମାର ଓଝା ଧନ୍ୟବାଦ ଅର୍ପଣ କରିଥିଲେ  । ଗାନ୍ଧୀଛକସ୍ଥିତ ସରସ୍ୱତୀ ଶିଶୁ ବିଦ୍ୟା ମନ୍ଦିରରେ ଅନୁରୂପଭାବେ ସାଂସ୍କୃତିକ କାର୍ଯ୍ୟକ୍ରମ ଓ ଜନ୍ମାଷ୍ଟମୀ ଉତ୍ସବ ପାଳିତ ହୋଇଥିଲା  ।

Comments are closed.