ଚୌଦ୍ୱାର: ଚୌଦ୍ୱାର ନିକଟବର୍ତ୍ତି କଜଳଖଣାସ୍ଥିତ ଇଡ଼କୋର ଗୋପାଳପୁର ଶିଳ୍ପାଞ୍ଚଳରେ ଏକଦା ଛୋଟବଡ଼ ହୋଇ ବହୁ ଶିଳ୍ପ ଗଢ଼ି ଉଠିଥିବା ବେଳେ ପରବର୍ତ୍ତି ସମୟରେ ସମସ୍ତ ଶିଳ୍ପ ବନ୍ଦ ହୋଇ ଯାଇ ଅଞ୍ଚଳଟି ଶିଳ୍ପଶୂନ୍ୟ ହୋଇ ଯାଇଥିଲା। ଦୀର୍ଘ ଦିନ ପରେ ଉକ୍ତ ସ୍ଥାନରେ ଏକ ଟସର ସୂତା ଉତ୍ପାଦନ କେନ୍ଦ୍ର ଆରମ୍ଭ କରାଯାଇ ଥିବାରୁ ସମଗ୍ର ଚୌଦ୍ୱାର ଅଞ୍ଚଳରେ ଆନନ୍ଦ ପ୍ରକାଶ ପାଇବା ସହିତ ଏହି କାରଖାନା ଚାଲୁ ହେବା ଫଳରେ ଗୋପାଳପୁର ଅଞ୍ଚଳରେ ଶିଳ୍ପ ପୁନରୁଦ୍ଧାରର ପ୍ରକ୍ରିୟା ଅରମ୍ଭ ହେଲା ବୋଲି ଚର୍ଚ୍ଚା ହେଉଛି।
ସୂଚନାଯୋଗ୍ୟ ଯେ ଗତ ଏକ ବର୍ଷ ତଳେ ପୂର୍ବତନ କେନ୍ଦ୍ରମନ୍ତ୍ରୀ ପ୍ରତାପ କୁମାର ଷଢ଼ଙ୍ଗୀ ବନ୍ଦ ପଡ଼ିଥିବା ଉକ୍ତ କାରଖାନାକୁ ବୁଲି ଦେଖିବା ସହିତ ଏହାର ପୁନରୁଦ୍ଧାର ପାଇଁ କେନ୍ଦ୍ରିୟ ସ୍ତରରେ ପଦକ୍ଷେପ ନେଇ ପ୍ରସ୍ତାବିତ ଟସର ସୁତା ପ୍ରସ୍ତୁତି କାରଖାନାର ଶିଳାନ୍ୟାସ କରିଥିଲେ। ଗୋପାଳପୁର ଶିଳ୍ପାଞ୍ଚଳରେ ୧୯୯୯ ମସିହା ମହାବାତ୍ୟା ଠାରୁ ବନ୍ଦ ପଡ଼ିଥିବା ଖଦି ଓ ଗ୍ରାମଦ୍ୟୋଗର ୬ ଏକର ପରିମିତ ଜମି ଉପରେ ଥିବା କାରଖାନାର ଭିତ୍ତି ଭୂମି ଊପରେ ପ୍ରତିଷ୍ଠିତ ଏହି କାରଖାନାକୁ କେନ୍ଦ୍ର ଖଦିବୋର୍ଡ଼ ଅଧ୍ୟକ୍ଷ ଭିନୟ କୁମାର ସାକ୍ସେନା ଶୁକ୍ରବାର ଦିନ ଆନୁଷ୍ଠାନିକ ଭାବେ ଉଦ୍ଘାଟନ କରିଛନ୍ତି। ଏହି କାରଖାନା ସ୍ଥାନୀୟ ମହିଳାମାନଙ୍କୁ ନିଯୁକ୍ତି ସୁଯୋଗ ଦେବା ସହିତ ଆର୍ଥିକ ସ୍ୱାବଲମ୍ବି କରିବାରେ ମୁଖ୍ୟ ଭୂମିକା ଗ୍ରହଣ କରିବ ବୋଲି ପ୍ରକାଶ କରିଥିଲେ। ଓଡ଼ିଶାର ରେଶମ ଲୁଗାର ଚାହିଦା ସାରା ବିଶ୍ୱରେ ରହିଥିବାରୁ ଏହି ନୂତନ କାରଖାନାର ଉତ୍ପାଦ ରାଜ୍ୟ ତଥା ରାଜ୍ୟ ବାହାରର ରେଶମ ଲୁଗା ତିଆରି କାରଖାନାଗୁଡ଼ିକୁ ସୁତା ଯୋଗାଇବାରେ ସହାୟକ ହେବ ବୋଲି ସେ ମତବ୍ୟକ୍ତ କରିଥିଲେ। ପୂର୍ବାଂଚଳ ଖଦି ଓ ଗ୍ରାମଦ୍ୟୋଗ କମିସନ୍ର ଯୁଗ୍ମ ମୁଖ୍ୟ ପରିଚାଳନା ଅଧିକାରୀ ୱାଇ.କେ. ବନ୍ପାଟିକର ଓ ସଂଜୟ ସିଂ ପ୍ରମୁଖ ଏଥିରେ ଅତିଥି ଭାବେ ଯୋଗ ଦେଇଥିଲେ। ଏହି ଅବସରରେ କରାଖାନା ଭିତରେ ଆୟୋଜିତ ଏକ ରେଶମ ଲୁଗା ପ୍ରଦର୍ଶନୀକୁ ଖଦି ବୋର୍ଡ ଅଧ୍ୟକ୍ଷ ଶ୍ରୀ ସାକ୍ସେନା ବୁଲି ଦେଖିଥିଲେ।
Comments are closed.