ବେକରେ ଗାମୁଛା ବାନ୍ଧି ଆତ୍ମହତ୍ୟା

ଚୌଦ୍ୱାର: ଚୌଦ୍ୱାର ପୌରପାଳିକା ୭ ନମ୍ବର ୱାର୍ଡ଼ ଅନ୍ତର୍ଗତ ଓଟିଏମ୍‍ କଲୋନୀରେ ରହୁଥିବା ଯୁବ ସଂଗଠକ ବିରଞ୍ଚି ନାରାୟଣ ଦାସ(୫୦) ଆତ୍ମହତ୍ୟା କରିଥିବା ଜଣା ପଡ଼ିଛି।ପ୍ରକାଶଯେ ଅଞ୍ଚଳରେ ଜଣେ ସୁସଂଗଠକ ଭାବେ ଜଣାଶୁଣା ବିରଞ୍ଚି ଶୁକ୍ରବାର ରାତିରେ ଖାଇସାରି ତାଙ୍କ ଘରେ ଶୋଇଥିବା ବେଳେ ପରଦିନ ଭୋର ସମୟରେ ସେ ବେକରେ ଗାମୁଛା ବାନ୍ଧି ରୋଷେଇ ଘରେ ଝୁଲୁଥିବା ପରିବାର ଲୋକେ ଦେଖିବାକୁ ପାଇଥିଲେ।ଖବର ପାଇ ଚୌଦ୍ୱାର ପୁଲିସ ଶବକୁ ଉଦ୍ଧାର କରି ବ୍ୟବଚ୍ଛେଦ ପାଇଁ କଟକ ବଡ଼ ଡାକ୍ତରଖାନାକୁ ପଠାଇବା ସହିତ ଘଟଣାର ତଦନ୍ତ ଆରମ୍ଭ କରିଛି।ମୃତ୍ୟୁର ସଠିକ୍‍ କାରଣ ଜଣା ପଡ଼ିନାହିଁ। ବିରଞ୍ଚିଙ୍କ ପରିବାର ସୁତ୍ରରୁ ପ୍ରକାଶଯେ ବିରଞ୍ଚି ବିଭିନ୍ନ ଅର୍ଥ ଲଗାଣକାରୀ ଫଣ୍ଡ ସହିତ ସମ୍ପୃକ୍ତ ଥିବାବେଳେ ବହୁ ଲୋକ ତାଙ୍କ ପାଖରୁ ମୋଟା ଟଙ୍କା ଉଧାର ଅକାରରେ ନେଇ ଫେରସ୍ତ କରୁନଥିବାରୁ ସେ ଗତ କିଛି ଦିନ ହେଲା ମାନସିକ ଦୁଶ୍ଚିନ୍ତା ଭିତରେ ରହୁଥିଲେ। ଏପଟେ ଫଣ୍ଡରେ ଅର୍ଥ ଲଗାଇଥିବା ବ୍ୟକ୍ତି ମାନେ ସେମାନଙ୍କ ଜମା ଅର୍ଥ ମାଗିବା କାରଣରୁ ସେ ଏହାକୁ ନେଇ ବିଚଳିତ ହୋଇ ଆତ୍ମହତ୍ୟା କରିଥାଇ ପାରନ୍ତି ବୋଲି ପରିବାର ଲୋକେ ଆଶଂକା ପ୍ରକାଶ କରିଛନ୍ତି।ବିରଞ୍ଚିଙ୍କ ମୃତ୍ୟୁ ଖବର ପାଇ ପୂର୍ବତନ ବିଧାୟକ ଡ. ପ୍ରଭାତ ରଞ୍ଜନ ବିଶ୍ୱାଳ, ପୌରାଧ୍ୟକ୍ଷ ମାନସୀ ସ୍ୱର୍ଣ୍ଣପ୍ରଭା ସାମଲ,କାଉନସିଲର ଦିଲ୍ଲିପ କୁମାର ସାହୁ ଆଦିଙ୍କ ସମେତ ବହୁ ବ୍ୟକ୍ତିବିଶେଷ ତାଙ୍କ ବାସଭବନରେ ପହଞ୍ଚି ଶ୍ରଦ୍ଧାଞ୍ଜଳି ଅର୍ପଣ କରିଥିଲେ।

Comments are closed.