ନୂଆ କରୋନା ଭୂତାଣୁର ହଟସ୍ପଟ୍‍ ପାଲଟିଛି ଚୀନ ଓ ଦକ୍ଷିଣ ପୂର୍ବ ଏସିଆ

ନ୍ୟୁୟର୍କ: ବିଶ୍ୱରେ ଆତଙ୍କ ଖେଳାଇଥିବା କରୋନା ଭୂତାଣୁ ପାଇଁ ଚୀନର ଅଧିକାଂଶ ଅଞ୍ଚଳ ହଟସ୍ପଟ ଭାବେ ପରିଚିତ ହୋଇଛି। କାରଣ ସେହିସବୁ ସ୍ଥାନରେ ମାଂସଜାତୀୟ ଖାଦ୍ୟର ଚାହିଦା ବୃଦ୍ଧି ସହିତ ବ୍ୟବସାୟିକ ଭିତ୍ତିରେ ଗୋସମ୍ପଦ ପାଳନ ଦ୍ରୁତ ସଂପ୍ରସାରିତ ହେବାରେ ଲାଗିଛି। ଏଭଳି ଏକ ପରିସ୍ଥିତିରେ ସଂପ୍ରତି କରାଯାଇଥିବା ଏକ ନୂଆ ଅଧ୍ୟୟନମୂଳକ ରିପୋର୍ଟରେ କୁହାଯାଇଛି ଯେ ଚୀନ, ଜାପାନ, ଫିଲିପାଇନ୍ସ ଏବଂ ଥାଇଲାଣ୍ଡର ଅନେକ ସ୍ଥାନ ବାଦୁଡିଙ୍କ ପାଇଁ ଉପଯୋଗୀ ସ୍ଥଳରେ ପରିଣତ ହେବାକୁ ଯାଉଛି, ଯେଉଁମାନେ କରୋନା ଭୂତାଣୁ ବହନ କରୁଛନ୍ତି ଏବଂ ଏହିସବୁ ସ୍ଥାନରେ କରୋନା ଭୂତାଣୁ ବାଦୁଡିଙ୍କ ଶରୀରରୁ ମଣିଷକୁ ବ୍ୟାପିବା ପରିବେଶ ଅଧିକ ଉପଯୋଗୀ ହୋଇପାରେ ବୋଲି କୁହାଯାଇଛି। ନେଚର ଫୁଡ୍‍ ନାମକ ଏକ ପତ୍ରିକାରେ ଏହି ଅଧ୍ୟୟନ ରିପୋର୍ଟ ପ୍ରକାଶ ପାଇଛି। ଏଥିରେ କୁହାଯାଇଛି, ବିଶ୍ୱରେ ସ୍ଥଳଭାଗ ବ୍ୟବହାର ଢାଞ୍ଚାରେ ପରିବର୍ତ୍ତନ ଘଟିବା, ଜଙ୍ଗଲଗୁଡିକ ଖଣ୍ଡବିଖଣ୍ଡିତ ହେବା, କୃଷି କାର୍ଯ୍ୟ ସମ୍ପ୍ରସାରଣ ଏବଂ ବ୍ୟବସାୟିକ ଭିତ୍ତିରେ ପ୍ରାଣୀପାଳନ ଆଦି ବାଦୁଡିଙ୍କ ଜୀବନଚକ୍ରରେ ପରିବର୍ତ୍ତନ ଆଣିଛି। ଅଧ୍ୟୟନ ରିପୋର୍ଟ ମୁତାବକ କରୋନା ଭୂତାଣୁ ସଂକ୍ରମଣ ସମ୍ଭାବନା ଥିବା ଅଧିକାଂଶ ହଟସ୍ପଟ୍‍ ଚୀନରେ ରହିଛି। ତାହାସହିତ ଜାପାନର କିଛି ଭାଗ, ଉତ୍ତର ଫିଲିପାଇନ୍ସ ଏବଂ ସାଂଘାଇର ଦକ୍ଷିଣକୁ ଚୀନର କିଛି ଅଞ୍ଚଳ ମଧ୍ୟ ହଟସ୍ପଟ୍‍ ପାଲଟିବା ଆଶଙ୍କା ରହିଛି। କାରଣ ସେହିସବୁ ଅଞ୍ଚଳରେ ଜଙ୍ଗଲ ଧ୍ୱଂସ ହୋଇଚାଲିଛି। କାଲିଫଣ୍ଣିଆ ବିଶ୍ୱବିଦ୍ୟାଳୟ, ବର୍କଲେ, ପଲିଟେକନିକ ୟୁନିଭରସିଟି ଅଫ ମିଲାନ୍‍ ଏବଂ ମାସେ ୟୁନିଭରସିଟି ଅଫ ନ୍ୟୁଜିଲାଣ୍ଡର ଗବେଷକ ଦଳଙ୍କୁ ନେଇ ଏହି ଅଧ୍ୟୟନ କରାଯାଇଥିଲା।

Comments
Loading...