ନାବାଳିକାର ବିବାହ ରୋକିଲା ଚାଇଲ୍‌ଡ ଲାଇନ

ଟିଟିଲାଗଡ଼ : ଟିଟିଲାଗଡ ଥାନା ଅଞ୍ଚଳର ଏକ ଗ୍ରାମରେ ରବିବାର ସନ୍ଧ୍ୟାରେ ଜଣେ ନାବାଳିକାର ବିବାହ କାର୍ଯ୍ୟକ୍ରମ ଚାଲିଥିବା ବେଳେ ସୂଚନା ପାଇ ଚାଇଲ୍‌ଡ ଲାଇନ କର୍ମକର୍ତ୍ତା ପହଞ୍ଚି ବିବାହ ବନ୍ଦ କରାଇଥିବା ଜଣାପଡିଛି।

ଝିଅ ମଙ୍ଗୁଳା ସରିଥିଲା। ଘରେ ପହଞ୍ଚି ସାରିଥିଲେ କୁଣିଆ। ବରଯାତ୍ରୀଙ୍କ ପାଇଁ ଖାଇବା ବ୍ୟବସ୍ଥା ବି ସରି ଯାଇଥିଲା। ବାହାଘର ପାଇଁ ବାଜା ବି ବାଜୁଥିଲା। କିନ୍ତୁ ରବିବାର ଦିନ ଦେଢଟାରେ ଜଣେ ସମାଜସେବୀ ଚାଇଲ୍‌ଡ ଲାଇନ ୧୦୯୮କୁ ଫୋନ ଯୋଗେ ଜଣାଇଥିଲେ। ସନ୍ଧ୍ୟାରେ ଟିଟିଲାଗଡ ଚାଇଲ୍ଡ ଲାଇନ ସଦସ୍ୟ ଶିବାନନ୍ଦ ବେହେରା, ଶିଶୁ ବିକାଶ ପ୍ରକଳ୍ପ ଅଧିକାରୀ ମୃଣ୍ମୟୀ ଭୋଇ, ଥାନା ଏସଆଇ ମୋହିନୀ ମଲ୍ଲିକ, ଏଏସଆଇ ଅକୃର ପାତ୍ର, ମିଶନ ଶକ୍ତି ସଂଯୋଜକ ପିତାମ୍ବର ବାଗ, ଅଙ୍ଗନବାଡି ସୁପରଭାଇଜର ଲଚ୍ଛମନି ବାଗ ପ୍ରମୁଖ ଗ୍ରାମରେ ପହଞ୍ଚି ବିବାହ ରୋକିବାକୁ ବୁଝାସୁଝା କରିଥିଲେ। ତେବେ ନାବାଳିକାର ବିବାହ ପାଇଁ ପରିବାର ଲୋକେ ତଥା କୁଣିଆ ଜିଦ ଧରିଥିଲେ। ଏଏନ୍ଏମ୍ ଜନ୍ମ ପୁସ୍ତିକା, ଟୀକା ଦାନ ପଞ୍ଜିକା ଆଦିରୁ ଝିଅର ଜନ୍ମ ୧୬ ଜୁଲାଇ ୨୦୦୫ରେ ଜନ୍ମ ହୋଇଥିବା ସ୍ପଷ୍ଟ ହୋଇଥିଲା। ମାତ୍ର ୧୫ ବର୍ଷ ୫ ମାସ ୧୧ ଦିନର ନାବାଳିକା ବିବାହ କଲେ ବିପଦ ରହିଛି। ଆଗକୁ ଗର୍ଭଧାରଣ କଲେ ଉଭୟ ମାଁ ଏବଂ ଶିଶୁର ଜୀବନ ପ୍ରତି ଭୟ ରହିଛି ବୋଲି ଶିଶୁ ବିକାଶ ପ୍ରକଳ୍ପ ଅଧିକାରୀ ଶ୍ରୀମତି ଭୋଇ ବହୁ ବୁଝାଇଥିଲେ। ଆଇନ ଅନୁଯାୟୀ ନାବାଳିକା ବିବାହ ଉଦ୍ୟମ କଲେ ୨ ବର୍ଷ ଜେଲ ଓ ୧ ଲକ୍ଷ ଟଙ୍କା ଜୋରିମାନା ରହିଛି। ଉଭୟ ବର ଓ କନ୍ୟାର ପିତାମାତା ଏନେଇ ଦୋଷୀ ଭାବରେ ଗିରଫ ହେବେ ବୋଲି ପୁଲିସ ଏସଆଇ ମଲ୍ଲିକ ଚେତାଇ ଦେଇଥିଲେ। ପରେ ପୁଲିସ ପକ୍ଷରୁ ବର ଘରକୁ ଫୋନ କରି ବରଯାତ୍ରୀ ଆସିଲେ ଏଠି ଗିରଫ ହେବେ ବୋଲି ଚେତାବନୀ ଦିଆଯାଇଥିଲା। ପରେ କନ୍ୟା ପକ୍ଷ ୧୮ ବର୍ଷ ହେଲା ପର୍ଯ୍ୟନ୍ତ ଝିଅକୁ ବାହା ଦେବୁ ନାହିଁ ବୋଲି ଲିଖିତ ପ୍ରତିଶ୍ରୁତି ଦେଇଥିଲେ।

Comments
Loading...