ଅଗ୍ନିଶମ କର୍ମଚାରୀ ନିଜ ଜୀବନକୁ ବିପଦରେ ପକାଇ ଜନ ସମୁଦାୟ ଓ ଜୀବନକୁ ସୁରକ୍ଷିତ ରଖିଥାନ୍ତି: ମୁଖ୍ୟମନ୍ତ୍ରୀ

ଭୁବନେଶ୍ୱର : ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଅନ୍ତର୍ଜାତୀୟ ଅଗ୍ନିଶମ କର୍ମଚାରୀ ଦିବସ ଅବସରରେ କହିଛନ୍ତି ଯେ ଅଗ୍ନିଶମ କର୍ମଚାରୀମାନେ ଅନେକ ସମୟରେ ନିଜ ଜୀବନକୁ ବିପଦରେ ପକାଇ ଆମର ଜନ ସମୁଦାୟ ଏବଂ ଜୀବନକୁ ସୁରକ୍ଷିତ ରଖିଥାନ୍ତି। ମୁଖ୍ୟମନ୍ତ୍ରୀ ଧନଜୀବନର ନିରାପତ୍ତାକୁ ସୁନିଶ୍ଚିତ କରିବା ପାଇଁ ନିଷ୍ଠା, ପ୍ରତିବଦ୍ଧତା ଓ ତ୍ୟାଗ ପ୍ରଦର୍ଶନ କରିଥିବା ଏହି ଯୋଦ୍ଧାମାନଙ୍କୁ ସମ୍ମାନ ଜଣାଇଛନ୍ତି। ବାଲିଗୁଡ଼ାରେ ଦୁର୍ଘଟଣାଗ୍ରସ୍ତ ଜଣେ ଯୁବକଙ୍କୁ ନିଜ ଗାଡ଼ିରେ ଡାକ୍ତରଖାନା ପହଞ୍ଚାଇ କନ୍ଧମାଳର ଉପଜିଲ୍ଲାପାଳ ଶୁଭଙ୍କର ମହାପାତ୍ର ସମସ୍ତଙ୍କ ଆଗରେ ମାନବିକତାର ଉଦାହରଣ ସୃଷ୍ଟି କରିଛନ୍ତିି।  କୋଭିଡ୍‌ର ସଙ୍କଟ ସମୟରେ ତାଙ୍କର ଏପରି ମହତ କାର୍ଯ୍ୟ ଅତ୍ୟନ୍ତ ପ୍ରଶଂସନୀୟ ବୋଲି ମୁଖ୍ୟମନ୍ତ୍ରୀ ପ୍ରକାଶ କରିଛନ୍ତି।

ମୁଖ୍ୟମନ୍ତ୍ରୀ କହିଛନ୍ତି ଯେ ଓଡ଼ିଶାର କୋଭିଡ୍‌ ପରିଚାଳନାକୁ ସଶକ୍ତ କରିବା ଉଦ୍ଦେଶ୍ୟରେ ମୁଖ୍ୟମନ୍ତ୍ରୀଙ୍କ ରିଲିଫ୍‌ ପାଣ୍ଠିକୁ ଓଡ଼ିଶା ହାଉସିଂ ବୋର୍ଡ କର୍ପୋରେସନ୍‌ ୨୦ ଲକ୍ଷ ଟଙ୍କା ଏବଂ ଶ୍ରୀ ମାର୍ବଲସ୍‌ ୧.୧୧ ଲକ୍ଷ ଟଙ୍କା ପ୍ରଦାନ କରିଛନ୍ତି।