ନିୟନ୍ତ୍ରଣ ରେଖାରେ ‘ଚାଏ ପେ ଚର୍ଚ୍ଚା’; ଉରିରେ ଭାରତୀୟ ସେନା ଖୋଲିଲା ନୂଆ କାଫେ

ଉରି: ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଦ୍ୱାରା ଆରମ୍ଭ ହୋଇଥିବା ଚାଏ ପେ ଚର୍ଚ୍ଚା ଏବେ ଦେଶର ବିଭିନ୍ନ ସ୍ଥାନରେ, ବିଭିନ୍ନ ରୂପରେ ଦେଖିବାକୁ ମିଳୁଛି। ଭାରତୀୟ ସେନା ମଧ୍ୟ ଏଥିରୁ ବାଦ୍‍ ପଡିନାହିଁ। ଭାରତୀୟ ସେନା ପକ୍ଷରୁ ଉରି ସୀମାନ୍ତରେ ଥିବା ଏକ ଆଗୁଆ ଘାଟିରେ ଏକ କାଫେ ପ୍ରତିଷ୍ଠା କରାଯାଇଛି। ସୀମାନ୍ତ ଅଞ୍ଚଳ ପରିଦର୍ଶନରେ ଆସୁଥିବା ଜନସାଧାରଣଙ୍କୁ ସେଠାକାର ବାସ୍ତବ ସ୍ଥିତି କିଭଳି ରହିଛି, ସେ ସମ୍ପର୍କରେ ଜଣାଇବା ଲକ୍ଷ୍ୟରେ ଏହି କାଫେ ସ୍ଥାପନ କରାଯାଇଛି। କମାନ ଅମତ ସେତୁ ନିକଟରେ ଏହି କାଫେ ଖୋଲାଯାଇଛି ଏବଂ ଭାରତୀୟ ସେନା ଏହା ପରିଚାଳନା କରୁଛି। କିଛିମାସ ତଳେ ଏହି ଅଞ୍ଚଳରେ ଭାରତ ଓ ପାକିସ୍ତାନ ସେନା ମଧ୍ୟରେ ବ୍ୟାପକ ଗୁଳି ଗୋଳା ଆକ୍ରମଣ ହେଉଥିବାବେଳେ ସଂପ୍ରତି ଜଣେ ସେଠାରେ ବସି ସ୍ୱଚ୍ଛନରେ ଚା’ ଅଥବା କଫି ପିଇ
ପାରିବେ, ସେକଥା କେହି କେବେ ଭାବିନଥିଲେ ବୋଲି କାଫେକୁ ଆସିଥିବା ଜଣେ ସ୍ଥାନୀୟ ଅଧିବାସୀ କହିଛନ୍ତି। ଚଳିତ ବର୍ଷ ଫେବ୍ରୁଆରୀରେ ଦୁଇଦେଶର ସେନା ମଧ୍ୟରେ ଅସ୍ତ୍ରବିରତି ରାଜିନାମା ହେବାପରେ ଉକ୍ତ ଅଞ୍ଚଳରେ ଶାନ୍ତି ବିରାଜମାନ କରୁଛି। ସେଥିପାଇଁ କମାନ ଅଞ୍ଚଳରେ ଏହି କଫି ଦୋକାନ ଖୋଲାଯାଇଛି ଏବଂ ଏହା ଜାମ୍ମୁ କାଶ୍ମୀର ଜନସାଧାରଣଙ୍କୁ ଶାନ୍ତି ପ୍ରତିଷ୍ଠା ଦିଗରେ ପ୍ରେରିତ ବୋଲି କହିଛନ୍ତି କଫି ଦୋକାନରେ ଅବସ୍ଥାପିତ ଜଣେ ଭାରତୀୟ ଯବାନ। ଏହା ସ୍ଥାନୀୟ ଜନସାଧାରଙ୍କ ମନରେ ଶାନ୍ତି ପ୍ରତିଷ୍ଠା ନେଇ ଆସ୍ଥା ଓ ବିଶ୍ୱାସ ବୃଦ୍ଧିରେ ସହାୟକ ହେଉଥିବା ସେ କହିଛନ୍ତି।

Comments
Loading...