ଆୟକର ବିଭାଗରୁ ରିଫଣ୍ଡ ପାଇଲେଣି କି ? ଯଦି ନା, ତେବେ ଜାଣନ୍ତୁ କେମିତି ପାଇବେ

୮୯ ଲକ୍ଷ କରଦାତାଙ୍କୁ ୧ ଲକ୍ଷ ୪୫ ହଜାର କୋଟି ଟଙ୍କା ଫେରସ୍ତ

ନୂଆଦିଲ୍ଲୀ: କେନ୍ଦ୍ର ସରକାର କରଦାତାମାନଙ୍କୁ ରିଫଣ୍ଡ ପ୍ରଦାନ କରୁଛନ୍ତି। ଚଳିତ ଆର୍ଥିକ ବର୍ଷରେ ବର୍ତ୍ତମାନ ସୁଦ୍ଧା ପ୍ରାୟ ୮୯ ଲକ୍ଷ କରଦାତାଙ୍କୁ ୧ ଲକ୍ଷ ୪୫ ହଜାର କୋଟି ଟଙ୍କା ଫେରସ୍ତ (ରିଫଣ୍ଡ) କରାଯାଇଛି। ଏଥିରେ ବ୍ୟକ୍ତିଗତ ଆୟକର ଫେରସ୍ତ ମଧ୍ୟ ସାମିଲ ଅଛି ବୋଲି ଅର୍ଥ ମନ୍ତ୍ରଣାଳୟ ସୂଚନା ଦେଇଛି।

Image Courtesy: wikipedia

କେନ୍ଦ୍ରୀୟ ପ୍ରତ୍ୟକ୍ଷ ଟିକସ ବୋର୍ଡ (ସିବିଡିଟି) ପକ୍ଷରୁ ୨୦୨୦ ଏପ୍ରିଲ ୧ରୁ ଡିସେମ୍ବର ୮ ସୁଦ୍ଧା ୮୯ ଲକ୍ଷ ୨୯ ହଜାରରୁ ଅଧିକ କରଦାତାଙ୍କୁ ୧ ଲକ୍ଷ ୪୫ ହଜାର ୬୧୯ କୋଟିରୁ ଅଧିକ ଟଙ୍କା ଫେରସ୍ତ କରିଛି। କରୋନା ମହାମାରୀ ସମୟରେ ସରକାରଙ୍କ ଏହି ପଦକ୍ଷେପ କରଦାତାମାନଙ୍କୁ ବଡ଼ ଆଶ୍ଵସ୍ତ ଦେଇଛି। ଅର୍ଥମନ୍ତ୍ରୀ ନିର୍ମଳା ସୀତାରମଣ ଆତ୍ମନିର୍ଭରଶୀଳ ଭାରତ ଯୋଜନାର ଘୋଷଣା କରିବା ପରେ ଅର୍ଥ ଫେରସ୍ତ ପ୍ରକ୍ରିୟା ତ୍ଵାରାନ୍ବିତ ହୋଇଛି। କୌଣସି କରଦାତାଙ୍କୁ ଫେରସ୍ତ ପାଇଁ ଆୟକର ବିଭାଗକୁ ଆବେଦନ କରିବାକୁ ପଡ଼ିନାହିଁ।

କେମିତି ପାଇବେ ରିଫଣ୍ଡ ?

ସିବିଡିଟି ପକ୍ଷରୁ କୁହାଯାଇଛି ଯେ, ସମସ୍ତ କରଦାତା ତୁରନ୍ତ ଇ-ମେଲ୍‌ର ଜବାବ ଦିଅନ୍ତୁ, ଯାହାଫଳରେ ଯେଉଁମାନଙ୍କୁ ଫେରସ୍ତ ମିଳିନାହିଁ, ସେମାନଙ୍କୁ ବି ଏହାର ଲାଭ ମିଳିପାରିବ। ସମସ୍ତ ପ୍ରକ୍ରିୟା ଅନ୍‌ଲାଇନ୍‌ରେ କରାଯାଉଛି।

କରଦାତାମାନେ ଆୟକର ଫେରସ୍ତର ବର୍ତ୍ତମାନର ସ୍ଥିତି ଜାଣିବା ପାଇଁ ଆୟକର ବିଭାଗର ଇ-ଫାଇଲିଂ ପୋର୍ଟାଲ୍ କିମ୍ବା ଏନଏସଡିଏଲର ୱେବସାଇଟ୍ ପରିଦର୍ଶନ କରିପାରିବେ। ତଥାପି ଫେରସ୍ତ ପାଇଁ ବ୍ୟାଙ୍କ୍‌ ଆକାଉଣ୍ଟ ପାନ୍‌ ସହିତ ଲିଙ୍କ୍‌ ହେବା ଜରୁରୀ। ୨୦୧୯ ମାର୍ଚ୍ଚ ୧ରୁ କେବଳ ଇ-ଫେରସ୍ତ ପ୍ରଦାନ କରାଯିବ ବୋଲି ଆୟକର ବିଭାଗ ଘୋଣୋ କରିଛି। ଏହା କେବଳ ବ୍ୟାଙ୍କ ଆକାଉଣ୍ଟରେ ଜମା କରାଯିବ, ଯାହା ପାନ୍‌ କାର୍ଡ ସହିତ ସଂଯୁକ୍ତ ହୋଇଥିବ ଏବଂ ବିଭାଗର ଇ-ଫାଇଲିଂ ପୋର୍ଟାଲ ଦ୍ବାରା ଯାଞ୍ଚ ହୋଇଥିବ।

Comments
Loading...