ରାଜଧାନୀରୁ ଅଧକୋଟିର ବ୍ରାଉନସୁଗର ଜବତ, ୨ ଗିରଫ

ତମାଣ୍ଡୋ  : ଚଳିତ ବର୍ଷ ରାଜଧାନୀ‌େ‌ର ପ୍ରଥମ ବ୍ରାଉନସୁଗର ଚୋରା କାରବାର ବେଳେ ୨ ଜଣ ବ୍ୟବସାୟୀଙ୍କୁ କମିସନରେଟ୍‌ ପୁଲିସ ହାତରେ ଧରାପଡିଛନ୍ତି। ବେଶ କିଛି ମାସ ପରେ ବି‌େ‌ଶଷ ସୂତ୍ରରୁ ଖବର ପାଇ କୁଇକ୍‌ ଆକ୍ସ ଟିମ୍(କ୍ବାଟ୍‌) ଓ ତମାଣ୍ଡୋ ଥାନା ପୁଲିସ ମିଳିତ ଭାବେ ତମାଣ୍ଡୋ ଅଞ୍ଚଳରେ ଚଢ଼ଉ କରି ୨ ଜଣ ନିଶା ବେପାରୀଙ୍କଠାରୁ ୫୨୦ ଗ୍ରାମ୍‌ ବ୍ରାଉନ୍‌ସୁଗର ଜବତ କରିଛି। ଯାହାର ମୂଲ୍ୟ ୫୦ ଲକ୍ଷ ଟଙ୍କାରୁ ଅଧିକ ହେବ ବୋଲି ପୁଲିସ ଆକଳନ କରିଛି। ଦୁଇ ଜଣଙ୍କୁ ରବିବାର କୋର୍ଟ ଚାଲାଣ କରାଯାଇଛି। ପୁଲିସ ସୂଚନା ଅନୁଯାୟୀ ଧରାପଡିଥିବା ଦୁଇ ନିଶା ବେପାରି ହେଲେ ବାଲେଶ୍ବର ଜିଲା ଜଳେଶ୍ବର ଥାନା ଅଞ୍ଚଳର ସେକ୍‌ ନସିମୁଦ୍ଦିନ ଓରଫ ପପୁ(୨୩) ଓ ମଞ୍ଚେଶ୍ବର ଥାନା ରସୁଲଗଡ଼ ରାଉତରାୟ ସାହିର ଚିତ୍ତରଞ୍ଜନ ରାଉତରାୟ(୬୧)। ଶନିବାର ବାଲେଶ୍ବର ଅଞ୍ଚଳରୁ ଏକ ବାଇକ୍‌ ଯୋଗେ ବ୍ରାଉନସୁଗର ଆଣି ରାଜଧାନୀ ଉପକଣ୍ଠ ତମାଣ୍ଡୋ ଥାନା ଅଞ୍ଚଳରେ ବିକ୍ରି କରିବାକୁ ଉଦ୍ୟମ କରୁଥିବା ବେଳେ ଚଢ଼ଉ କରି ପୁଲିସ ଦୁଇ ଜଣଙ୍କୁ କାବୁ କରିଥିଲା। ସେମାନେ ରାଜଧାନୀର ବିଭିନ୍ନ ଅଞ୍ଚଳରେ ଆଣି ସବ୍‌ଡିଲରଙ୍କୁ ବିକ୍ରି କରିଥାନ୍ତି। ଏନେଇ ପୂର୍ବରୁ କ୍ବାଟ୍ ପାଖରେ ସୂଚନା ଥିଲା। ତେଣୁ ଏନେଇ କମିସନରେଟ୍‌ ପୁଲିସ ଜାଲ୍ ବିଛାଇଥିଲା।
ଶନିବାର ସେମାନେ ଜଣେ ଖୁଚୁରା ବ୍ୟବସାୟୀଙ୍କୁ ବ୍ରାଉନ୍‌ସୁଗର ହସ୍ତାନ୍ତର କରିବା ବେଳେ ପୁଲିସ ଚଢ଼ଉ କରିଥିଲା। ଖୋଜାଖୋଜି କରିବା ବେଳେ ସେମାନେ ବ୍ୟବହାର କରୁଥିବା ବାଇକ୍‌ ଡିକିରୁ ଏକାଧିକ ପୁଡିଆ ମିଳିଥିଲା। ସେସବୁକୁ ଯାଞ୍ଚ କରିବା ବେଳେ ତାହା ବ୍ରାଉନ୍‌ସୁଗର ବୋଲି ଜଣାପଡିଥିଲା। ଦୁହେଁ ବାଲେଶ୍ବରରୁ ଏସବୁ ଆଣିଥିବା ସ୍ବୀକାର କରିଛନ୍ତି। ସେମାନଙ୍କ ନିକଟରୁ ୧୧ ହଜାର ନଗଦ ଟଙ୍କା ସହ ଏକ ବାଇକ୍‌ ଜବତ କରାଯାଇଛି। ଦୁହେଁ ବାଲେଶ୍ବର ଓ ଜଳେଶ୍ବରରୁ ବାଇକ୍‌ରେ ଧରି ବିଭିନ୍ନ ରାସ୍ତା ଦେଇ ରାଜଧାନୀକୁ ଆସିଥାନ୍ତି। ସେମାନେ ରାଜଧାନୀର ବିଭିନ୍ନ ଖୁଚୁରା ବ୍ୟବସାୟୀ ବା ସବ୍‌ଡିଲରଙ୍କୁ ବ୍ରାଉନ୍‌ସୁଗର ହସ୍ତାନ୍ତର କରିଥାନ୍ତି। ଚିତ୍ତ ବିରୋଧରେ ମଞ୍ଚେଶ୍ବର, ଏବଂ ବିଭିନ୍ନ ଥାନାରେ ୧୩ଟି ମାମଲା ରହିଛି। ସେଥିରେ ଚୋରା ଗଞ୍ଜେଇ ବ୍ୟବସାୟ, ହତ୍ୟା ଉଦ୍ୟମ ଓ ବନ୍ଧୁକ କାରବାର ଆଦି ମାମଲା ରହିଥିବା ଜଣାପଡିଛି।

Comments
Loading...