ବ୍ରଜରାଜନଗର : ଗାନ୍ଧିଛକ ଫାଣ୍ଡି ଅଞ୍ଚଳରେ ଜଣେ ୭ ବର୍ଷର ନାବାଳିକାଙ୍କୁ ପଡ଼ୋଶୀର ଜଣେ ଯୁବକ ଦୁଷ୍କର୍ମ କରିଥିବା ଅଭିଯୋଗ ହୋଇଛି । ଏ ନେଇ ପୀଡିତାଙ୍କ ପରିବାର ତରଫରୁ ଆଜି ବ୍ରଜରାଜନଗର ଥାନାରେ ଅଭିଯୋଗ କରାଯାଇଛି । ଅଭିଯୋଗ ପରେ ପୁଲିସ ଘଟଣାର ତଦନ୍ତ କରି ଅଭିଯୁକ୍ତକୁ ଧରିବା ପାଇଁ ପ୍ରୟାସ ଚଳାଇଥିବା ବ୍ରଜରାଜନଗର ଆଇଆଇସି ନଳିତା ମୋଦି ସୂଚନା ଦେଇଛନ୍ତି ।
ଏ ଘଟଣା ଗତ ୧ ତାରିଖ ଘଟିଥିଲେ ହେଁ ପୀଡ଼ିତା ଭୟରେ କିଛି କହୁ ନ ଥିବାରୁ ପରିବାର ଲୋକେ ଏତଲା ଦେଇ ପାରି ନ ଥିଲେ । ମିଳିଥିବା ସୂଚନା ଅନୁସାରେ, ଗତ ୧ ତାରିଖ ସନ୍ଧ୍ୟାରେ ପୀଡିତା ନାବାଳିକା ଟ୍ୟୁସନ ପଢିବାକୁ ଯାଇଥିଲେ । ତେବେ ଫେରିବା ବେଳେ ନାବଳିକାଙ୍କ ବାପା କୁଆଡ଼େ ଯାଇଥିବାରୁ ନାବାଳିକାକୁ ଆଣିବା ପାଇଁ ତାଙ୍କର ମା’ ପଡ଼ୋଶୀର ଜଣେ ଯୁବକକୁ ପଠାଇଥିଲେ । ହେଲେ ଯୁବକ ଜଣକ ଘରକୁ ଆଣିବା ସମୟରେ ବାଟରେ ନାବାଳିକାଙ୍କୁ ଦୁଷ୍କର୍ମ କରିଥିବା ଅଭିଯୋଗ ହୋଇଛି । ପୀଡିତା ଘରକୁ ଫେରିବା ପରେ ସେ ବିଷୟରେ କିଛି ନ କହି ସେହି ଯୁବକକୁ ଆଉ କେବେ ଆଣିବା ପାଇଁ ନ ପଠାଇବାକୁ କହି କାନ୍ଦିବାରେ ଲାଗିଥିଲେ । ଘର ଲୋକେ ଯେତେ ପଚାରିଲେ ବି ନାବାଳିକା କିଛି କହି ନ ଥିଲେ । ତେବେ ଗତରାତିରେ ନାବାଳିକା ସମସ୍ତ ଘଟଣା ପରିବାର ଲୋକଙ୍କୁ ଜଣାଇବା ପରେ ଆଜି ବ୍ରଜରାଜନଗର ଥାନାରେ ଅଭିଯୋଗ କରାଯାଇଥିଲା । ଚାଇଲ୍ଡ ଲାଇନର ସଂଯୋଜକ ଆଶିଷ ପଣ୍ଡାଙ୍କ ସମେତ ଅନ୍ୟ କର୍ମକର୍ତ୍ତା ଏତଲା ଦାୟର କରିବାରେ ପରିବାର ଲୋକଙ୍କୁ ସହାୟତା କରିଥିଲେ ।
Comments are closed.