ଇବ ନଦୀରେ ନୂତନ ୪ ଲେନ ସେତୁ ପାଇଁ ସୁପାରିଶ କଲା ଭାରତୀୟ ଜାତୀୟ ରାଜପଥ ପ୍ରାଧିକରଣ

ବ୍ରଜରାଜନଗର:୪୯ ନମ୍ବର ଜାତୀୟ ରାଜପଥ ଇବ ନଦୀ ଉପରେ  ନୂତନ ୪ ଲେନ ସେତୁର ନିର୍ମାଣ ପାଇଁ ଭାରତୀୟ ଜାତୀୟ ରାଜପଥ ପ୍ରାଧିକରଣ (ଏନଏଚଏଆଇ), ପ୍ରକଳ୍ପ କାର୍ୟନ୍ଵୟନ ସମ୍ଭାଗ, ସମ୍ବଲପୁର ସୁପାରିଶ କରିଛି, ଯାହା ଅନୁମୋଦନର ଅପେକ୍ଷା ରହିଛି। ଇବ ନଦୀ ଉପରେ ନୂତନ ସେତୁ ନିର୍ମାଣ ସଂକ୍ରାନ୍ତରେ ସରକାରଙ୍କୁ କୌଣସି ପ୍ରସ୍ତାବ କିମ୍ବା ଅଭିଯୋଗ ହସ୍ତଗତ ହୋଇଥିବା ନେଇ ଗତ ୪.୩.୨୦୨୧ ତାରିଖ ଦିନ ବ୍ରଜରାଜନଗର ସୂଚନା ଅଧିକାର କର୍ମୀ ରବି କୁମାର ସୋନି ଭାରତୀୟ ଜାତୀୟ ରାଜପଥ ପ୍ରାଧିକରଣ (ଏନଏଚଏଆଇ)କୁ ସୂଚନା ଅଧିକାର ଆଇନ ଆଧାରରେ ତଥ୍ୟ ମାଗିଥିଲେ। ତେବେ ୪୯ ନମ୍ବର ଜାତୀୟ ରାଜପଥର ୬୨.୯୧୦ କିଲୋମିଟର ଇବ ନଦୀ ଉପରେ ଏକ ନୂତନ ୪ ଲେନ ବିଶିଷ୍ଟ ସେତୁ ନିର୍ମାଣ ପାଇଁ ଭାରତୀୟ ଜାତୀୟ ରାଜପଥ ପ୍ରାଧିକରଣ, ପ୍ରକଳ୍ପ କାର୍ୟନ୍ଵୟନ ସମ୍ଭାଗ, ସମ୍ବଲପୁର ତରଫରୁ ସୁପାରିଶ କରାଯାଇଛି ଏବଂ ଏହା ଅନୁମୋଦନରେ ଅପେକ୍ଷା ରହିଥିବା ତଥ୍ୟରେ ଉଲ୍ଲେଖ ରହିଛି।

ସୂଚନା ଯୋଗ୍ୟ ଯେ, ଖଣି ଖଦାନ ସମୃଦ୍ଧ ଝାରସୁଗୁଡା ଜିଲ୍ଲାକୁ ୪୯ ନମ୍ବର ଜାତୀୟ ରାଜପଥ ଛତିଶଗଡ଼ର ପ୍ରମୁଖ ବ୍ୟବସାୟିକ ସହର ଗୁଡିକ ସହିତ ସଂଯୋଗ କରୁଛି। ଦୈନିକ ଶହ ଶହ କୋଇଲା ଟ୍ରକ, ଶିଳ୍ପାନୁଷ୍ଠାନରେ ବ୍ୟବହୃତ ଯନ୍ତ୍ରାଂଶ ପରିବହନକାରୀ ଗାଡି, ବସ, କାର ଆଦି ଚଳପ୍ରଚଳ ଯୋଗୁଁ ଜାତୀୟ ରାଜପଥରେ ଚାପ ବୃଦ୍ଧି ପାଇବା ସହିତ ଟ୍ରାଫିକ ସମସ୍ୟା ଓ ଛୋଟ ବଡ଼ ସଡକ ଦୁର୍ଘଟଣା ଘଟି ପ୍ରାଣହାନି ଘଟୁଛି। ହେଲେ ଏହି ରାଜପଥରେ ଥିବା ଇବ ସେତୁ ପ୍ରାୟ ୬୦ ଦଶକରେ ବାଉଁଶ ବୋଝେଇ ଟ୍ରକ ଗୁଡିକର କ୍ଷମତାକୁ ନେଇ ତିଆରି କରାଯାଇଥିଲା। କିନ୍ତୁ ଏବେ ଏହି ସେତୁ ଦେଇ ଅହରହ ଭାରିଯାନ ଚଳାଚଳ କରୁଥିବାରୁ ବିପଦଜନକ ହୋଇ ପଡିଛି। ତେଣୁ ଏଥି ପାଇଁ ଇବ ନଦୀରେ ଏକ ନୂତନ ସେତୁର ନିର୍ମାଣ ପାଇଁ ଦାବି ଜୋର ଧରିଛି।

Comments
Loading...