ପୁରୁଣାପାଣି ତଳସାହିରେ ଲୋକ ପାଇଁ ବିଲର ଚୁଆପାଣି ଭରସା

ଠାକୁରମୁଣ୍ଡା : ମୟୂରଭଞ୍ଜ ଜିଲ୍ଲାରେ ଆଜି ବି ବହୁ ଗାଁ ଅଛି ଯେଉଁଠି ଲୋକ ଟୋପାଏ ବିଶୁଦ୍ଧ ପାନୀୟ ଜଳ ପାଇ ପାରୁନାହାନ୍ତି। ସରକାର ମାଳମାଳ ଯୋଜନା ପ୍ରସ୍ତୁତ କରୁଛନ୍ତି ହେଲେ ପ୍ରକୃତରେ ଏହା ଗ୍ରାମାଞ୍ଚଳରେ ପହଞ୍ଚି ପାରୁନି ଯୋଜନା ଯୋଜନାରେ ହିଁ ରହିଯାଉଛି। ଏବେ ବି ଲୋକଙ୍କ ପାଇଁ ବିଶୁଦ୍ଧ ପାଣି ସାତ ସ୍ବପ୍ନ ହୋଇ ରହିଛି। ଏମିତି ଏକ ଉଦାହରଣ ଦେଖିବାକୁ ମିଳିଛି ମୟୂରଭଞ୍ଜ ଜିଲ୍ଲା ଠାକୁରମୁଣ୍ଡା ବ୍ଲକ କେଶଡିହା ପଞ୍ଚାୟତ  ଅନ୍ତର୍ଗତ ପୁରୁଣାପାଣି ଗାଁ ତଳସାହିରେ ଗ୍ରାମବାସୀ ଏବେ ଚୁଆ ପାଣିରେ ଶୋଷ ମେଣ୍ଟାଉଛନ୍ତି। ୫୦ରୁ ଊର୍ଦ୍ଧ୍ବ ପରିବାରର ୨୫୦ରୁ ଅଧିକ ଜନସଂଖ୍ୟା ଗ୍ରାମରେ ପିଇବା ପାଣି ଯୋଗାଇବାରେ ପ୍ରଶାସନ ବିଫଳ ହୋଇଛି। ଗ୍ରାମରେ ଥିବା ଗୋଟିଏ ନଳକୂପ ଅନେକ ଦିନ ହେଲା ଅଚଳ ହୋଇପଡି ଥିବାବେଳେ ଅନ୍ୟଟି ଅଧଘଣ୍ଟେ ମାରିଲେ ବାଲ୍‌ଟିଏ ପାଣି ମିଳୁଛି ଗ୍ରାମବାସୀ ଅଭିଯୋଗ କରି କରି ଥକି ପଡିଥିବା ବେଳେ କେହି ଶୁଣୁନାହାନ୍ତି।

ଗ୍ରାମବାସୀଙ୍କ ପାଣି ସମସ୍ୟା ବର୍ତ୍ତମାନର ନୁହେଁ, ବହୁଦିନର। ଟୋପାଏ ପାଣି ପାଇଁ କେତେବେଳେ ବିଲ ଚୁଆ ଅନ୍ୟ କେତେବେଳେ ନଦୀ ଝରଣ ପାଣି  ଉପରେ ବର୍ଷ ତମାମ ନିର୍ଭର କରୁଛନ୍ତି ବୋଲି ଗ୍ରାମବାସୀ ଅଭିଯୋଗ କରିଛନ୍ତି। ଗ୍ରାମର ସାଲୁକା ସୁଣ୍ଡି, ପ୍ରଧାନ ସିଂ ଗାଗରାଇ, ମଙ୍ଗଲ ସିଂ ସୁଣ୍ଡି, ଠାକୁର ବାନ୍ଦିଆ, ସିଲାଇ ସୁଣ୍ଡି, ଶାନ୍ତି ଗାଗରାଇ, ସବିତା ସୋଏ ସୁନାରାମ ଗାଗରାଇ ଅନ୍ୟ ଗ୍ରାମବାସୀମାନେ ଏଥିପ୍ରତି ଜିଲ୍ଲା ପ୍ରଶାସନ ଦୃଷ୍ଟି ଦେବାକୁ ଗ୍ରାମବାସୀ ନିବେଦନ କରିଛନ୍ତି।

Comments
Loading...